საქართველოს ფინანსთა სამინისტროს საბაჟო დეპარტამენტის საბაჟო ორგანოების სამოქმედო ტერიტორიების, საბაჟო გაფორმების ადგილისა და დროის განსაზღვრის შესახებ

სახელმწიფო სარეგისტრაციო კოდი 230.210.000.11.117.005.878

საქართველოს ფინანსთა მინისტრის

ბრძანება №309

2003 წლის 13 ივნისი

ქ. თბილისი

საქართველოს ფინანსთა სამინისტროს საბაჟო დეპარტამენტის საბაჟო ორგანოების სამოქმედო ტერიტორიების, საბაჟო გაფორმების ადგილისა და დროის განსაზღვრის შესახებ

საქართველოს საბაჟო კოდექსის 77-ე მუხლისა და "საქართველოს ფინანსთა სამინისტროს საბაჟო დეპარტამენტის სტრუქტურისა და რეფორმის პირველი რიგის ღონისძიებების შესახებ" საქართველოს პრეზიდენტის 2002 წლის 2 აგვისტოს №358 ბრძანებულების მოთხოვნათა შესაბამისად, ვბრძანებ:

1. საქართველოს ფინანსთა სამინისტროს საბაჟო დეპარტამენტის (შემდგომში – საბაჟო დეპარტამენტი) საბაჟო ორგანოებს და მათ სტრუქტურაში არსებულ საბაჟო გაფორმების განყოფილებებს განესაზღვროთ შემდეგი სამოქმედო ტერიტორიები:

ა) აჭარის ავტონომიური რესპუბლიკის საბაჟო სამმართველოს – ქ. ბათუმი, ბათუმის, ხელვაჩაურის, ქობულეთის, ხულოსა და ქედის რაიონები;

ბ) რეგიონალურ საბაჟოს "აღმოსავლეთი" – ქ. თბილისი, ქ. რუსთავი, გარდაბნის, მარნეულის, ბოლნისის, თეთრიწყაროს, დმანისის, წალკის, საგარეჯოს, გურჯაანის, თელავის, ახმეტის, ლაგოდეხის, ყვარლის, დედოფლისწყაროსა და სიღნაღის რაიონები;

გ) რეგიონალურ საბაჟოს "ჩრდილოეთი" – ყაზბეგის, დუშეთის, მცხეთის, თიანეთის, ახალგორის, ხაშურის, გორის, ქარელის, კასპის, თიანეთის, ყორნისის, ჯავისა და ცხინვალის რაიონები;

დ) რეგიონალურ საბაჟოს "დასავლეთი" – ქ. ფოთი, ქ. ქუთაისი, ოზურგეთის, ჩოხატაურის, ლანჩხუთის, სენაკის, აბაშის, ხობის, მარტვილის, წყალტუბოს, ონის, ამბროლაურის, ცაგერის, ლენტეხის, ტყიბულის, ხონის, თერჯოლის, ვანის, ბაღდათის, საჩხერის, ჭიათურის, ზესტაფონის, ხარაგაულის, სამტრედიის, ზუგდიდის, ჩხოროწყუს, წალენჯიხისა და მესტიის რაიონები;

ე) რეგიონალურ საბაჟოს "სამხრეთი" – ახალციხის, ბორჯომის, ადიგენის, ასპინძის, ნინოწმინდისა და ახალქალაქის რაიონები;

ვ) რეგიონალურ საბაჟოს "რკინიგზა" – ქ. თბილისი, ქ. ფოთი, ქ. ქუთაისი, ქ. რუსთავი, ახალციხის, ბორჯომის, ადიგენის, ასპინძის, ნინოწმინდის, ახალქალაქის, ხაშურის, გორის, ქარელის, კასპის, მცხეთის, ყაზბეგის, დუშეთის, თიანეთის, ყორნისის, ჯავის, ცხინვალის, ახალგორის, გარდაბნის, მარნეულის, ბოლნისის, თეთრიწყაროს, დმანისის, წალკის, საგარეჯოს, გურჯაანის, თელავის, ახმეტის, ლაგოდეხის, ყვარლის, დედოფლისწყაროს, სიღნაღის, წყალტუბოს, ონის, ამბროლაურის, ცაგერის, ლენტეხის, ტყიბულის, ხონის, თერჯოლის, ვანის, ბაღდათის, საჩხერის, ჭიათურის, ზესტაფონის, ხარაგაულის, სამტრედიის, ოზურგეთის, ჩოხატაურის, ლანჩხუთის, სენაკის, აბაშის, ხობის, მარტვილის, ზუგდიდის, ჩხოროწყუს, წალენჯიხისა და მესტიის რაიონები;

ზ) რეგიონალურ საბაჟოს "ენერგეტიკის საბაჟო" – საქართველოს საბაჟო ტერიტორია.

2. საქონლისა და სატრანსპორტო საშუალებების (შემდგომში საქონელი – საქართველოს საბაჟო კოდექსის მიხედვით) გამგზავნს, მიმღებს ან მათ სტრუქტურულ ქვედანაყოფს, თუ კანონმდებლობით სხვა რამ არაა დადგენილი, საბაჟო გაფორმების ადგილად განესაზღვროს იმ საბაჟო ორგანოს სამოქმედო ტერიტორია, სადაც იმყოფება:

ა) იურიდიული პირი – საქართველოს სამოქალაქო კოდექსის მიხედვით;

ბ) ინდივიდუალური საწარმო – ეკონომიკური საქმიანობის ადგილის მიხედვით – საქართველოს საგადასახადო კოდექსის შესაბამისად;

გ) ფიზიკური პირი – საცხოვრებელი ადგილის მიხედვით – საქართველოს სამოქალაქო კოდექსის შესაბამისად.

3. საბაჟო ორგანოებს საბაჟო გაფორმების ადგილებად განესაზღვროთ:

ა) აჭარის ავტონომიური რესპუბლიკის საბაჟო სამმართველოს საბაჟო გაფორმების განყოფილებას – ქ. ბათუმი, ადლია, ქ. ბათუმის ნავსადგური, შავშვეთის ქ. №4;

ბ) რეგიონალური საბაჟო "აღმოსავლეთის" საბაჟო გაფორმების განყოფილებას – ქ. თბილისი, იუმაშევის ქ. №14, დავით აღმაშენებლის გამზ. №95, ქ. თბილისის აეროპორტი; ქ. რუსთავი, ფიროსმანის ქ. № 38; ქ. თელავი, თბილისის გზატკეცილის მე-2 შესახვევი;

გ) რეგიონალური საბაჟო "ჩრდილოეთის" საბაჟო გაფორმების განყოფილებას – ქ. გორი, ცხინვალის გზატკეცილი №2; ქ. მცხეთა, ნარეკვავის დასახლება ნატახტარის ქ. №1;

დ) რეგიონალური საბაჟო "დასავლეთის" საბაჟო გაფორმების განყოფილებას – ქ. ფოთი, ხობის ქ. №7; წყალტუბოს რაიონი, სოფ. ქვიტირი, "საბაჟო-კემპინგი"; ქ. ზუგდიდი, ჯანაშიას ქ. №1;

ე) რეგიონალური საბაჟო "სამხრეთის" საბაჟო გაფორმების განყოფილებას – ადიგენის რაიონი, სოფ. ორჭოსანი;

ვ) რეგიონალური საბაჟო "რკინიგზის" საბაჟო გაფორმების განყოფილებას – ქ, თბილისი, თამარ მეფის გამზ. №154; ქ. რუსთავი, ფიროსმანის ქ. №38; წყალტუბოს რაიონი, სოფ. ქვიტირი, "საბაჟო-კემპინგი";

ზ) აფხაზეთის ავტონომიური რესპუბლიკის საბაჟო სამმართველოს საბაჟო გაფორმების განყოფილებას – ქ. თბილისი, იუმაშევის ქ. №14;

თ) რეგიონალური საბაჟო "ენერგეტიკის საბაჟოს" გაფორმების განყოფილებას – ქ. თბილისი, მარშალ გელოვანის გზატკეცილი №2.

4. დაინტერესებული პირის თხოვნით და საბაჟო დეპარტამენტის წერილობითი თანხმობით საბაჟო გაფორმება შეიძლება განხორციელდეს განცხადებაში მითითებულ ადგილზე.

5. საბაჟო დეპარტამენტის წერილობითი თანხმობა არაა საჭირო მუდმივ და დროებით საცხოვრებლად გადაადგილებულ პირთა, დიპლომატიურ და მასთან გათანაბრებულ წარმომადგენლობათა, დიპლომატიურ და ადმინისტრაციულ ტექნიკური პერსონალის (მათთან მცხოვრები ოჯახის წევრების ჩათვლით) კუთვნილი საქონლისა და სატრანსპორტო საშუალებების, ასევე ჰუმანიტარული დახმარებისა და გრანტით შემოტანილი საქონლის საბაჟო გაფორმებისას.

6. ფიზიკური პირის მიერ საქართველოს საბაჟო საზღვარზე გადაადგილებული 700 ლარამდე ღირებულების საქონელი, ამ პირის თხოვნის საფუძველზე, ექვემდებარება გაფორმებას იმ სასაზღვრო საბაჟო გამშვებ პუნქტში, სადაც მის მიერ ხორციელდება საქონლით საბაჟო საზღვრის გადაკვეთა.

7. აფხაზეთის ავტონომიური რესპუბლიკის საბაჟო სამმართველო, საქართველოს ტერიტორიული მთლიანობის აღდგენამდე, აწარმოებს აფხაზეთის ავტონომიური რესპუბლიკის ტერიტორიიდან იძულებით გადაადგილებულ პირთა მიერ საქართველოს საბაჟო საზღვარზე ნებისმიერი საბაჟო რეჟიმებით გადასაადგილებელი საქონლის საბაჟო გაფორმებას.

8. საბაჟო გაფორმების დროდ განისაზღვროს 10 საათიდან 18 საათამდე. დაინტერესებული პირის თხოვნით, მისი ხარჯითა და საბაჟო ორგანოს წერილობითი თანხმობით, საბაჟო გაფორმება შეიძლება განხორციელდეს საბაჟო ორგანოს არასამუშაო დროსაც.

9. ბრძანება ამოქმედდეს ოფიციალურ ბეჭდვით ორგანოში გამოქვეყნებიდან მე-10 დღეს.

მ. გოგიაშვილი