დოკუმენტის სტრუქტურა
განმარტებების დათვალიერება
დაკავშირებული დოკუმენტები
დოკუმენტის მონიშვნები
კონსოლიდირებული პუბლიკაციები
აჭარის ავტონომიური რესპუბლიკის სოციალური პარტნიორობის სამმხრივი ტერიტორიული კომისიის შექმნისა და დებულების დამტკიცების შესახებ | |
---|---|
დოკუმენტის ნომერი | 10 |
დოკუმენტის მიმღები | აჭარის ავტონომიური რესპუბლიკის მთავრობა |
მიღების თარიღი | 24/04/2018 |
დოკუმენტის ტიპი | ავტონომიური რესპუბლიკის მთავრობის დადგენილება |
გამოქვეყნების წყარო, თარიღი | ვებგვერდი, 27/04/2018 |
სარეგისტრაციო კოდი | 010240020.32.057.016276 |
კონსოლიდირებული პუბლიკაციები |
დოკუმენტის კონსოლიდირებული ვარიანტის ნახვა ფასიანია, აუცილებელია სისტემაში შესვლა და საჭიროების შემთხვევაში დათვალიერების უფლების ყიდვა, გთხოვთ გაიაროთ რეგისტრაცია ან თუ უკვე რეგისტრირებული ხართ, გთხოვთ, შეხვიდეთ სისტემაში
პირველადი სახე (27/04/2018 - 25/09/2019)
|
აჭარის ავტონომიური რესპუბლიკის სოციალური პარტნიორობის სამმხრივი ტერიტორიული კომისიის შექმნისა და დებულების დამტკიცების შესახებ
|
მუხლი 1 |
საქართველოს ორგანული კანონის „საქართველოს შრომის კოდექსი“ 522 მუხლის მე-3 პუნქტის შესაბამისად:
1. შეიქმნას აჭარის ავტონომიური რესპუბლიკის სოციალური პარტნიორობის სამმხრივი ტერიტორიული კომისია. 2. დამტკიცდეს აჭარის ავტონომიური რესპუბლიკის სოციალური პარტნიორობის სამმხრივი ტერიტორიული კომისიის დებულება, თანახმად დანართისა. 3. დაევალოს აჭარის ავტონომიური რესპუბლიკის ჯანმრთელობისა და სოციალური დაცვის სამინისტროს, უზრუნველყოს სამმხრივი კომისიის სამდივნოს ჩამოყალიბება ამ დადგენილების ამოქმედებიდან 20 კალენდარული დღის ვადაში. 4. ეთხოვოს აჭარის ავტონომიური რესპუბლიკის მასშტაბით სხვადასხვა სექტორში მოქმედ დამსაქმებელთა გაერთიანებებსა და დასაქმებულთა გაერთიანებებს, მათ წარმომადგენლობით უფლებამოსილ პირებს უზრუნველყონ შიდა კონსულტაციებისა და სხვა კანონიერი პროცედურების შედეგად სამმხრივი კომისიის შესაბამისი მხარის უფლებამოსილი წარმომადგენელი კომისიის წევრობისა და დანარჩენი 3-3 სამმხრივი კომისიის წევრობის კანდიდატურების შერჩევა და სამმხრივი კომისიის თავმჯდომარისათვის წარდგენა, არაუგვიანეს ამ დადგენილების ამოქმედებიდან 30 კალენდარული დღისა.
|
მუხლი 2 |
დადგენილება ამოქმედდეს გამოქვეყნებისთანავე. |
|
დანართი
|
აჭარის ავტონომიური რესპუბლიკის სოციალური პარტნიორობის სამმხრივი
ტერიტორიული კომისიის დებულება |
მუხლი 1.
ზოგადი დებულებანი |
1. აჭარის ავტონომიური რესპუბლიკის სოციალური პარტნიორობის სამმხრივი ტერიტორიული კომისია (შემდგომში – სამმხრივი კომისია) არის სათათბირო ორგანო, რომელიც ანგარიშვალდებულია სამმხრივი კომისიის თავმჯდომარის – აჭარის ავტონომიური რესპუბლიკის მთავრობის თავმჯდომარის წინაშე.
2. სამმხრივი კომისია საქმიანობისას ხელმძღვანელობს საქართველოს კონსტიტუციით, საქართველოს საერთაშორისო ხელშეკრულებებით, საქართველოს კანონებით, საქართველოს პარლამენტის დადგენილებებით, საქართველოს პრეზიდენტის ბრძანებულებებითა და განკარგულებებით, საქართველოს მთავრობის დადგენილებებითა და განკარგულებებით, საქართველოს პრემიერ-მინისტრის ბრძანებებით, ამ დებულებით და სხვა სამართლებრივი აქტებით. |
მუხლი 2.
სამმხრივი კომისიის სტრუქტურა და შემადგენლობა |
1. სამმხრივი კომისიის მხარეები არიან აჭარის ავტონომიური რესპუბლიკის მთავრობა, აჭარის ავტონომიურ რესპუბლიკაში სხვადასხვა სექტორში მოქმედი დამსაქმებელთა გაერთიანებები და დასაქმებულთა გაერთიანებები
2. თითოეულ მხარეს სამმხრივ კომისიაში ჰყავს 5 წევრი, რომლებიც შესაძლებელია სხვადასხვა ორგანიზაციას წარმოადგენდნენ. ამ ორგანიზაციების წარმომადგენელთა სამმხრივი კომისიის შემადგენლობაში შეყვანის შესახებ გადაწყვეტილებას იღებს სამმხრივი კომისიის თავმჯდომარე. 3. თითოეული დამსაქმებელთა გაერთიანება და დასაქმებულთა გაერთიანება, რომელიც სამმხრივი კომისიის მონაწილეა, თავად იღებს გადაწყვეტილებას სამმხრივი კომისიის წევრებად წარსადგენად საკუთარ წარმომადგენელთა შერჩევის თაობაზე. 4. სამმხრივი კომისიის წევრებად წარდგენილი უნდა იქნენ მხარეთა წარმომადგენლობითი უფლებამოსილების მქონე პირები, რომლებიც, თავის მხრივ, სამმხრივი კომისიის თავმჯდომარეს წარუდგენენ კომისიის დანარჩენ 4-4 წევრს. 5. სამმხრივ კომისიაში აჭარის ავტონომიური რესპუბლიკის მთავრობას სამმხრივი კომისიის თავმჯდომარესთან ერთად წარმოადგენენ: ა) აჭარის ავტონომიური რესპუბლიკის ჯანმრთელობისა და სოციალური დაცვის მინისტრი; ბ) აჭარის ავტონომიური რესპუბლიკის ფინანსთა და ეკონომიკის მინისტრი; გ) აჭარის ავტონომიური რესპუბლიკის განათლების, კულტურისა და სპორტის მინისტრი; დ) სსიპ აჭარის ავტონომიური რესპუბლიკის დასაქმების სააგენტოს დირექტორი. 6. სამმხრივი კომისიის წევრთა უფლებამოსილების ვადაა ორი წელი. სამმხრივი კომისიის ახალი შემადგენლობა განისაზღვრება წინა შემადგენლობის უფლებამოსილების ვადის გასვლამდე. 7. ამ მუხლის მე-6 პუნქტით განსაზღვრული მოთხოვნების შესრულებისათვის: აჭარის ავტონომიური რესპუბლიკის მასშტაბით სხვადასხვა სექტორში მოქმედი დამსაქმებელთა გაერთიანებები და დასაქმებულთა გაერთიანებები უზრუნველყოფენ შიდა კონსულტაციებისა და სხვა კანონიერი პროცედურების შედეგად შესაბამის მხარეთა უფლებამოსილი წარმომადგენელი სამმხრივი კომისიის წევრობის კანდიდატურების ან/და დანარჩენი 4-4 წევრობის კანდიდატურების შერჩევას და სამმხრივი კომისიის თავმჯდომარისათვის წარდგენას ამ მუხლის მე-3 და მე-4 პუნქტების მოთხოვნათა დაცვით, არაუგვიანეს სამმხრივი კომისიის შესაბამისი წევრების უფლებამოსილების ვადის ამოწურვამდე 30 დღით ადრე. 8. სამმხრივი კომისიის წევრის (გარდა სამმხრივი კომისიის შესაბამისი მხარის წარმომადგენლობითი უფლებამოსილების მქონე პირისა) უფლებამოსილების ნებისმიერი მიზეზით ვადამდელი შეწყვეტის შემთხვევაში სამმხრივი კომისიის შესაბამისი მხარის წარმომადგენლობითი უფლებამოსილების მქონე პირი სამმხრივი კომისიის თავმჯდომარეს წარუდგენს შესაბამისი მხარის შემადგენლობაში სამმხრივი კომისიის წევრობის ახალ კანდიდატს, რომლის შერჩევა ხდება ამ მუხლის მე-3 და მე-4 პუნქტების მოთხოვნათა დაცვით, როგორც წესი, არაუგვიანეს კომისიის წევრის უფლებამოსილების შეწყვეტიდან 30 კალენდარული დღისა. 9. სამმხრივი კომისიის მხარის წარმომადგენლობითი უფლებამოსილების მქონე პირის, როგორც სამმხრივი კომისიის წევრის, უფლებამოსილების ნებისმიერი მიზეზით ვადამდელი შეწყვეტის შემთხვევაში შესაბამისი მხარის დაკომპლექტებაში მონაწილე დასაქმებულთა ან დამსაქმებელთა გაერთიანებები მართავენ შიდა კონსულტაციებსა და ახორციელებენ სხვა კანონიერ პროცედურებს სამმხრივი კომისიის წევრობის კანდიდატის – შესაბამისი მხარის წარმომადგენლობითი უფლებამოსილების მქონე პირის ამ მუხლის მე-3 და მე-4 პუნქტების მოთხოვნათა დაცვით შერჩევისა და ამ პირის მეშვეობით შესაბამისი კანდიდატურის სამმხრივი კომისიის თავმჯდომარისთვის წარსადგენად, როგორც წესი, არა უგვიანეს სამმხრივი კომისიის შესაბამისი მხარის წარმომადგენლობითი უფლებამოსილების მქონე პირის, როგორც სამმხრივი კომისიის წევრის, უფლებამოსილების შეწყვეტიდან 30 კალენდარული დღის ვადაში. 10. აჭარის ავტონომიური რესპუბლიკის მთავრობის მხრიდან სამმხრივი კომისიის წევრის/მინისტრის/სააგენტოს დირექტორის უფლებამოსილების შეწყვეტის შემთხვევაში შესაბამისი სამინისტროს ახალი მინისტრი, სააგენტოს ახალი დირექტორი ავტომატურად ხდება სამმხრივი კომისიის წევრი. 11. აჭარის ავტონომიური რესპუბლიკის მთავრობის თავმჯდომარის უფლებამოსილების შეწყვეტა იწვევს სამმხრივი კომისიის თავმჯდომარის უფლებამოსილების შეწყვეტას. მთავრობის ახალი თავმჯდომარე ავტომატურად ხდება სამმხრივი კომისიის თავმჯდომარე. |
მუხლი 3.
სამმხრივი კომისიის საქმიანობის პრინციპები |
სამმხრივი კომისიის საქმიანობა ეფუძნება შემდეგ პრინციპებს:
ა) მხარეთა თანასწორობა და დამოუკიდებლობა; ბ) სოციალური პარტნიორის ინტერესების პატივისცემა; გ) კოორდინაცია და პასუხისმგებლობა; დ) ინფორმირებულობა; ე) ვალდებულებათა შესრულება; ვ) ტრიპარტიზმი; ზ) კონსენსუსი. |
მუხლი 4.
სამმხრივი კომისიის ფუნქციები |
სამმხრივი კომისიის ფუნქციებია:
ა) აჭარის ავტონომიურ რესპუბლიკაში სოციალური პარტნიორობის განვითარების, აგრეთვე დასაქმებულებს, დამსაქმებლებსა და აჭარის ავტონომიური რესპუბლიკის მთავრობას შორის სოციალური დიალოგის წარმართვის ხელშეწყობა ყველა დონეზე; ბ) შრომით და მის თანმდევ ურთიერთობებში სხვადასხვა საკითხზე წინადადებებისა და რეკომენდაციების შემუშავება.; გ) კონკრეტული პრობლემების განხილვა, რომელსაც წამოჭრის რომელიმე მხარე და შესაბამისი რეკომენდაციების შემუშავება. |
მუხლი 5.
სამმხრივი კომისიის უფლებამოსილებები |
თავისი ფუნქციების შესასრულებლად, საკუთარი კომპეტენციის ფარგლებში, სამმხრივი კომისია უფლებამოსილია:
ა) საქართველოს კანონმდებლობით დადგენილი წესით განიხილოს მხარეთა მიერ დასმული საკითხები; ბ) კომისიის სხდომაზე მოისმინოს მხარეთა ინფორმაციები მისი კომპეტენციისათვის მიკუთვნებულ საკითხებზე; გ) საქართველოს კანონმდებლობით დადგენილი წესით მოითხოვოს აღმასრულებელი ხელისუფლებისა და შესაბამისი ადგილობრივი თვითმმართველობის ორგანოებისაგან, აგრეთვე სხვა დაწესებულებებისაგან მის მიერ საკითხების განსახილველად საჭირო მასალები, ინფორმაცია; დ) საჭიროების შემთხვევაში, საქართველოს კანონმდებლობით დადგენილი წესით, სათანადო წინადადებებისა და რეკომენდაციების შესამუშავებლად მოიწვიოს სხვადასხვა უწყების წარმომადგენლები, შესაბამისი დარგის სპეციალისტები და ექსპერტები. მათი მოწვევის დროს უნდა გამოირიცხოს ინტერესთა კონფლიქტი; ე) შეიმუშაოს და დაინტერესებულ პირებს წარუდგინოს წინადადებები მისი კომპეტენციისათვის მიკუთვნებულ საკითხებზე. |
მუხლი 6.
სამმხრივი კომისიის საქმიანობის წესი |
1. სამმხრივი კომისია, როგორც წესი, იკრიბება კალენდარული წლის განმავლობაში კვარტალში ერთხელ. ამასთან, შესაძლებელია მოწვეულ იქნეს რიგგარეშე სხდომა, რის თაობაზეც გადაწყვეტილება მიიღება სამმხრივი კომისიის მხარეების ხმათა 2/3-ით. თითოეულ მხარეს უფლება აქვს, წელიწადში ერთხელ საკუთარი ინიციატივით მოიწვიოს რიგგარეშე სხდომა. რიგგარეშე სხდომა მოიწვევა, როგორც წესი, სამმხრივი კომისიის სამდივნოსათვის სამმხრივი კომისიის შესაბამისი მხარის მიერ მიმართვიდან არა უგვიანეს 14 კალენდარული დღისა.
2. სამმხრივი კომისიის სხდომები წარიმართება სამმხრივი კომისიის მხარეთა მიერ შემუშავებული გეგმის შესაბამისად. 3. სამმხრივი კომისიის სხდომა უფლებამოსილია, თუ მას ესწრება თითოეული მხარის არანაკლებ ორი წევრისა და დამსწრეთა შორის არიან დამსაქმებელთა გაერთიანებების მხარისა და დასაქმებულთა გაერთიანებების მხარის წარმომადგენლობითი უფლებამოსილების მქონე პირები. ამასთან, როგორც დამსაქმებელთა გაერთიანებების მხარისა, ისე დასაქმებულთა გაერთიანებების მხარის შემთხვევაში, სამმხრივი კომისიის სხდომას უნდა ესწრებოდეს შესაბამისი მხარის შემადგენლობაში შემავალი ერთი ორგანიზაციის წარმომადგენელი სამმხრივი კომისიის წევრი მაინც. 4. სამმხრივი კომისიის სხდომაზე ცალკეული საკითხის შესწავლის შუამდგომლობას აყენებს ერთ-ერთი მხარე. სამმხრივი კომისიის მხარეთა 2/3-ის თანხმობის შემთხვევაში, სამმხრივი კომისია ვალდებულია, შეისწავლოს აღნიშნული საკითხი. 5. სამმხრივ კომისიის სხდომაზე გადაწყვეტილების მიღებისას თითოეული მხარის მიერ გადაწყვეტილება მიიღება შესაბამისი მხარის სამმხრივი კომისიის სხდომაზე დამსწრე წევრების ხმათა უბრალო უმრავლესობით. ამასთან, მხარის წევრთა ხმების გაყოფის შემთხვევაში გადამწყვეტია შესაბამისი მხარის წარმომადგენლობითი უფლებამოსილების მქონე პირის ხმა. 6. სამმხრივი კომისია შესრულებული სამუშაოს შესახებ ყოველწლიურ ანგარიშს განსახილველად წარუდგენს აჭარის ავტონომიური რესპუბლიკის მთავრობას. 7. სამმხრივი კომისიის შეხვედრები, როგორც წესი, იმართება აჭარის ავტონომიური რესპუბლიკის მთავრობის აპარატში ან აჭარის ავტონომიური რესპუბლიკის ჯანმრთელობისა და სოციალური დაცვის სამინისტროში. შესაბამისად, სამმხრივი კომისიის ორგანიზაციულ-ტექნიკურ მხარდაჭერას უზრუნველყოფს ის უწყება, რომლის ადმინისტრაციულ შენობაშიც ხდება სამმხრივი კომისიის შეხვედრის გამართვა. ამასთან, მხარეთა შეთანხმებით, სამმხრივი კომისიის შეხვედრები შესაძლოა გაიმართოს სხვა ადგილას, რომელთა ორგანიზაციულ-ტექნიკურ უზრუნველყოფას სამმხრივი კომისიის სამდივნოსთან ერთად ახორციელებს სამმხრივი კომისიის ის მხარე, რომლის ინიციატივითაც ხდება სამმხრივი კომისიის სხდომის სხვა ადგილას გამართვა. 8. სამმხრივ კომისიას აქვს სამდივნო, რომლის ფუნქციონირებაზე პასუხისმგებელია აჭარის ავტონომიური რესპუბლიკის ჯანმრთელობისა და სოციალური დაცვის სამინისტრო. სამდივნოს შემადგენლობა განისაზღვრება აჭარის ავტონომიური რესპუბლიკის ჯანმრთელობისა და სოციალური დაცვის მინისტრის ინდივიდუალური ადმინისტრაციულ-სამართლებრივი აქტით. 9. სამმხრივი კომისიის სამდივნო უზრუნველყოფს სამმხრივი კომისიის საქმიანობის ორგანიზაციულ-ტექნიკურ მხარეს (შეხვედრების ორგანიზება, ოქმების წარმოება, ექსპერტებისა და სპეციალისტების მოწვევა, სხდომის მასალებით უზრუნველყოფა და სხვა ორგანიზაციული საკითხების გადაწყვეტა). 10. სამმხრივ კომისიას შეუძლია საკითხის შესწავლის მიზნით, თავისი გადაწყვეტილებით შექმნას სამუშაო ჯგუფი და განსაზღვროს მისი შემადგენლობა, კომპეტენცია და საქმიანობის პერიოდი. სამუშაო ჯგუფი იქმნება პარიტეტულ საწყისებზე. |
მუხლი 7.
სამმხრივი კომისიის სხდომის თავმჯდომარის უფლება-მოვალეობანი |
1. სამმხრივი კომისიის სხდომებს, როგორც წესი, წარმართავს სამმხრივი კომისიის თავმჯდომარე, მისი არყოფნის ან სხვა გამონაკლის შემთხვევაში - სამმხრივი კომისიის აჭარის ავტონომიური რესპუბლიკის მთავრობის მხარის ერთ-ერთი წევრი, როგორც წესი - აჭარის ავტონომიური რესპუბლიკის ჯანმრთელობისა და სოციალური დაცვის მინისტრი.
2. სამმხრივი კომისიის სხდომის თავმჯდომარე: ა) აუწყებს სამმხრივი კომისიის წევრებს სამმხრივი კომისიის სხდომის გახსნისა და დახურვის შესახებ; ბ) უძღვება საკითხების განხილვას; გ) უზრუნველყოფს ამ დებულების მოთხოვნათა დაცვას; დ) აძლევს სიტყვას სამმხრივი კომისიის წევრებსა და მოწვეულ პირებს; ე) აყენებს კენჭისყრაზე საკითხს და აცხადებს მის შედეგებს; ვ) ხელს აწერს სამმხრივი კომისიის სხდომის ოქმს და საოქმო გადაწყვეტილებებს; ზ) ახორციელებს საქართველოს კანონმდებლობით განსაზღვრულ სხვა უფლება-მოვალეობებს. |
მუხლი 8.
სამმხრივი კომისიის წევრის უფლება-მოვალეობები |
1. სამმხრივი კომისიის წევრობა ნებაყოფლობითია.
2. სამმხრივი კომისიის წევრი კეთილსინდისიერად და ანაზღაურების გარეშე ეწევა სამმხრივი კომისიის წევრობასთან დაკავშირებულ საქმიანობას. 3. სამმხრივი კომისიის წევრი იღებს ყველა ზომას, რათა პირადად მიიღოს მონაწილეობა სამმხრივი კომისიის სხდომებში. ამასთან, სამმხრივი კომისიის წევრი არ არის უფლებამოსილი, მოახდინოს სამმხრივი კომისიის სხდომებში მონაწილეობის უფლების სხვა პირზე დელეგირება. 4. სამმხრივი კომისიის წევრს, გარდა სამმხრივი კომისიის თავმჯდომარისა, შეუძლია მოიხსნას ამ კომისიის წევრობის უფლებამოსილება: ა) სამმხრივი კომისიის თავმჯდომარის წინაშე წერილობითი მიმართვის გზით, თუ სამმხრივი კომისიის ეს წევრი აჭარის ავტონომიური რესპუბლიკის მთავრობის მხარის შემადგენლობაშია; ბ) სამმხრივი კომისიის თავმჯდომარის წინაშე წერილობითი მიმართვის გზით, თუ კომისიის ეს წევრი არის დამსაქმებელთა გაერთიანებების ან დასაქმებულთა გაერთიანებების მხარის წარმომადგენლობითი უფლებამოსილების მქონე პირი; გ) დამსაქმებელთა გაერთიანებების ან დასაქმებულთა გაერთიანებების იმავე მხარის წარმომადგენლობითი უფლებამოსილების მქონე პირის წინაშე წერილობითი მიმართვის გზით, რომელი მხარის შემადგენლობაშიც ის არის წარმოდგენილი. 5. სამმხრივი კომისიის წევრს კომისიის წევრთა 2/3-ის გადაწყვეტილებით შესაძლებელია შეუწყდეს უფლებამოსილება: ა) საქმიანობის იმ სფეროს შეცვლის გამო რომელ მხარესაც ის წარმოადგენს; ბ) კომისიის საქმიანობაში მონაწილეობის მიუღებლობის გამო უწყვეტი 1 წლის განმავლობაში. 6. სამმხრივი კომისიის წევრი უფლებამოსილია სხდომის მიმდინარეობის პროცესში მოითხოვოს სიტყვა, დააყენოს განსახილველი საკითხი, მიიღოს მონაწილეობა განხილვებსა და კენჭისყრაში, გაეცნოს სამმხრივი კომისიის მიერ განსახილველ საკითხებზე მოძიებულ მასალებს (შესაბამის შემთხვევაში მათი კონფიდენციალობის დაცვით), შეითანხმოს და მოაწეროს ხელი სამმხრივი კომისიის სხდომათა ოქმებს და განახორციელოს კანონმდებლობით გათვალისწინებული სხვა უფლება-მოვალეობები. |
მუხლი 9.
სამმხრივი კომისიის წევრის, კომისიის სამდივნოსა და სამუშაო ჯგუფის წევრების საქმიანობის ანაზღაურება |
სოციალური პარტნიორობის სამმხრივი კომისიის წევრის, კომისიის სამდივნოსა და სამუშაო ჯგუფების წევრების მიერ ამ დებულებით გათვალისწინებული საქმიანობა არ ანაზღაურდება.
|
დოკუმენტის კომენტარები