„საჯარო სამართლის იურიდიული პირის – საქართველოს იუსტიციის სასწავლო ცენტრის დებულების დამტკიცების შესახებ“

სახელმწიფო სარეგისტრაციო კოდი 040.030.000.22.027.013.784

საქართველოს იუსტიციის მინისტრის

ბრძანება №214

2009 წლის 17 ნოემბერი

ქ. თბილისი

საჯარო სამართლის იურიდიული პირის – საქართველოს იუსტიციის სასწავლო ცენტრის დებულების დამტკიცების შესახებ

„საჯარო სამართლის იურიდიული პირის შესახებ“ საქართველოს კანონისა და „საქართველოს იუსტიციის სამინისტროს დებულების დამტკიცების შესახებ“ საქართველოს პრეზიდენტის 2008 წლის 7 ნოემბრის №541 ბრძანებულებით დამტკიცებული დებულების მე-5 მუხლის მე-2 პუნქტის „პ“ ქვეპუნქტის და მე-10 მუხლის „ა“ ქვეპუნქტის საფუძველზე, ვბრძანებ:

1. დამტკიცდეს საჯარო სამართლის იურიდიული პირის – საქართველოს იუსტიციის სასწავლო ცენტრის თანდართული დებულება.

2. ძალადაკარგულად გამოცხადდეს „საქართველოს იუსტიციის სასწავლო ცენტრის წესდების დამტკიცების შესახებ“ საქართველოს იუსტიციის მინისტრის 2000 წლის 19 აპრილის №50 ბრძანება.

3. ბრძანება ამოქმედდეს გამოქვეყნებისთანავე.

ზ. ადეიშვილი

საჯარო სამართლის იურიდიული პირის – საქართველოს იუსტიციის სასწავლო ცენტრის დებულება

თავი I

ზოგადი დებულებები

    მუხლი 1

საქართველოს იუსტიციის სასწავლო ცენტრი (შემდგომში – ცენტრი) არის საქართველოს იუსტიციის სამინისტროს მმართველობის სფეროში მოქმედი საჯარო სამართლის იურიდიული პირი, რომელიც შექმნილია „საჯარო სამართლის იურიდიული პირის შესახებ“ საქართველოს კანონის შესაბამისად.

    მუხლი 2

ცენტრი თავის საქმიანობაში ხელმძღვანელობს საქართველოს კონსტიტუციით, საქართველოს საერთაშორისო ხელშეკრულებებითა და შეთანხმებებით, საქართველოს საკანონმდებლო და კანონქვემდებარე ნორმატიული აქტებითა და წინამდებარე დებულებით.

    მუხლი 3

ცენტრს აქვს დამოუკიდებელი ბალანსი, საბანკო ანგარიში, ბეჭედი საქართველოს სახელმწიფო გერბის გამოსახულებით და იურიდიული პირის სხვა რეკვიზიტები.

    მუხლი 4

ცენტრი საკუთარი სახელით იძენს უფლებებსა და მოვალეობებს, დებს გარიგებებს და შეუძლია სასამართლოში გამოვიდეს მოსარჩელედ ან მოპასუხედ.

    მუხლი 5

ცენტრი ანგარიშვალდებულია საქართველოს იუსტიციის მინისტრის წინაშე.

    მუხლი 6

ცენტრის იურიდიული მისამართია: ქ. თბილისი, გორგასლის ქ. №24.

თავი II

ცენტრის მიზნები, ფუნქციები და საქმიანობის საგანი

    მუხლი 7

ცენტრის მიზანია საქართველოში მიმდინარე სამართლებრივი რეფორმის ყოველმხრივ ხელშეწყობა, საქართველოს იუსტიციის სამინიტროს ცენტრალური აპარატის, იუსტიციის სამინისტროს მმართველობაში მოქმედი საჯარო სამართლის იურიდიული პირებისა და საქართველოს პროკურატურის თანამშრომელთა მომზადება-გადამზადება.

    მუხლი 8

დებულებით განსაზღვრული მიზნების განსახორციელებლად ცენტრი:

ა) ატარებს ტრენინგებს, სემინარებს, სამუშაო შეხვედრებს, უწყებათაშორის კონფერნეციებსა და სხვა ღონისძიებებს იუსტიციის სამინისტროს სისტემის თანამშრომელთა და სხვა უწყებების თანამშრომელთათვის;

ბ) შეიმუშავებს სამართლის სხვადასხვა დარგებში მიღებული ახალი კანონმდებლობის კომენტარებს და ამზადებს მათ გამოსაცემად;

გ) აწარმოებს სამეცნიერო და კვლევით საქმიანობას სამართლის ცალკეულ პრობლემებზე;

დ) შეიმუშავებს დამხმარე და მეთოდოლოგიურ ლიტერატურას, შეიმუშავებს და ავითარებს კვალიფიკაციის ასამაღლებელი კურსების ცალკეულ სტანდარტებს;

ე) ქმნის ბიბლიოთეკას სასწავლო ცენტრის მსმენელთა და იუსტიციის სისტემის თანამშრომელთათვის;

ვ) ამზადებს დისტანციური სწავლების მეთოდიკას;

ზ) თანამშრომლობს სხვა სახელმწიფო უწყებებთან, საგანმანათლებლო დაწესებულებებთან და საერთაშორისო ორგანიზაციებთან ერთობლივი ღონისძიებების დაგეგმვისა და განხორციელების მიზნით;

თ) მონაწილეობს იუსტიციის სამინისტროს თანამშრომლთა შერჩევის პროცესში;

ი) ატარებს სხვადასხვა ტიპის სასწავლო კურსებს იურიდიული განათლების პოპულარიზაციისა და განვითარების ხელშესაწყობად.

თავი III

ცენტრის მართვის ორგანოები, მათი შექმნის წესი და კომპეტენცია

    მუხლი 9

ცენტრს ხელმძღვანელობს დირექტორი, რომელსაც თანამდებობაზე ნიშნავს და თანამდებობიდან ათავისუფლებს საქართველოს იუსტიციის მინისტრი.

    მუხლი 10

ცენტრის დირექტორი:

ა) საქართველოს იუსტიციის მინისტრთან შეთანხმებით თანამდებობაზე ნიშნავს და თანამდებობიდან ათავისუფლებს ცენტრის თანამშრომლებს, გარდა ცენტრის დირექტორის მოადგილისა;

ბ) ხელმძღვანელობს და წარმართავს ცენტრის საქმიანობას დებულებით გათვალისწინებული მიზნების მისაღწევად და ახორციელებს ცენტრის საერთო, ყოველდღიურ ხელმძღვანელობას;

გ) დებს ხელშეკრულებებს ტრენერებთან და სხვა მოწვეულ ექსპერტებთან;

დ) ცენტრის სახელით დებს გარიგებებს და წარმოადგენს ცენტრს მესამე პირებთან ურთიერთობაში;

ე) ხსნის და ხურავს საბანკო ანგარიშებს;

ვ) დებულებით გათვალისწინებული ფუნქციების განხორციელების მიზნით ახორციელებს ცენტრის ფინანსური სახსრებისა და სხვა მატერიალური ქონების მართვას და პასუხიმგებელია მის სწორ გამოყენებაზე;

ზ) თავისი კომპეტენციის ფარგლებში გამოსცემს ინდივიდუალურ ადმინისტრაციულ-სამართლებრივ აქტებს, ხელს აწერს ცენტრის ოფიციალურ, მათ შორის, საფინანსო დოკუმენტებს;

თ) საქართველოს იუსტიციის სამინისტროს გენერალური ინსპექციის მიერ სამსახურებრივი შემოწმების შედეგების საფუძველზე წარდგენილი მოთხოვნის შესაბამისად, ვალდებულია გამოიყენოს დისციპლინური პასუხისმგებლობის ღონისძიება დისციპლინური გადაცდომის ჩამდენი პირის მიმართ;

ი) განსაზღვრავს ცენტრის თანამშრომელთა სამუშაო აღწერილობებს;

კ) ასრულებს ამ დებულებითა და კანონმდებლობით გათვალისწინებულ სხვა ფუნქციებს.

    მუხლი 11

1. ცენტრის დირექტორი ანგარიშვალდებულია საქართველოს იუსტიციის მინისტრის წინაშე და ყოველკვარტალურად წარუდგენს მას ანგარიშს ცენტრის მუშაობის შესახებ.

 2. ცენტრის დირექტორის არყოფნის ან მის მიერ სამსახურებრივი უფლებამოსილების განხორციელების შეუძლებლობის შემთხვევაში ცენტრის დირექტორის მოვალეობას ასრულებს ცენტრის დირექტორის მოადგილე, რომელსაც თანამდებობაზე ნიშნავს და თანამდებობიდან ათავისუფლებს საქართველოს იუსტიციის მინისტრი.

თავი IV

ცენტრის ქონება და დაფინანსება

    მუხლი 12

ცენტრის დაფინანსების წყაროებია:

ა) ბიუჯეტიდან გამოყოფილი მიზნობრივი სახსრები;

ბ) საქართველოს კანონმდებლობით ნებადართული სხვა შემოსავლები.

    მუხლი 13

1. ცენტრი ვალდებულია საქართველოს კანონმდებლობით დადგენილი წესით აწარმოოს საფინანსო-ეკონომიკური საქმიანობის აღრიცხვა-ანგარიშგება, შეადგინოს ბალანსი და დასამტკიცებლად წარუდგინოს სახელმწიფო კონტროლის განმახორციელებელ ორგანოს.

2.  ცენტრის წლიურ ბალანსს ამოწმებს სახელმწიფო კონტროლის განმახორციელებელი ორგანოს მიერ დანიშნული დამოუკიდებელი აუდიტორი.

    მუხლი 14

1. ცენტრი ექვემდებარება სახელმწიფო კონტროლს, რაც გულისხმობს მის მიერ განხორციელებული საქმიანობის კანონიერების, მიზანშეწონილობის, ეფექტიანობისა და საფინანსო-ეკონომიკური საქმიანობის ზედამხედველობას.

2. ცენტრის სახელმწიფო კონტროლს ახორციელებს საქართველოს იუსტიციის სამინისტრო.

    მუხლი 15

ცენტრი ვალდებულია შესაბამისი მოთხოვნის საფუძველზე სახელმწიფო მაკონტროლებელ ორგანოს მიაწოდოს სათანადო ინფორმაცია.

    მუხლი 16

1. ცენტრმა საქართველოს იუსტიციის სამინისტროს თანხმობით შეიძლება განახორციელოს შემდეგი ქმედებები:

ა) უძრავი ქონების შეძენა, გასხვისება და დატვირთვა;

ბ) სესხის აღება;

გ) თავდებობა;

დ) საშტატო განრიგისა და ხელფასის ფონდის განსაზღვრა;

ე) თანამშრომელთა მატერიალური წახალისებისათვის გამოსაყოფი სახსრების, აგრეთვე ცენტრის მიერ შესაძენი საწვავისა და გასაწევი საკომუნიკაციო ხარჯების ლიმიტების განსაზღვრა;

ვ) სხვა გადაწყვეტილებები ცენტრის ქონებასთან დაკავშირებით, თუ ისინი სცილდება ჩვეულებრივი საქმიანობის ფარგლებს.

2. ამ მუხლის პირველი პუნქტის „ბ“ და „გ“ ქვეპუნქტებით გათვალისწინებულ ქმედებათა განსახორციელებლად აუცილებელია საქართველოს ფინანსთა სამინისტროს თანხმობა.

თავი V

დასკვნითი დებულებანი

    მუხლი 17

ცენტრის რეორგანიზაცია და ლიკვიდაცია ხორციელდება კანონმდებლობით დადგენილი წესით.

    მუხლი 18

ცენტრის დებულებაში ცვლილებებისა და დამატებების შეტანა ხდება იუსტიციის მინისტრის ბრძანებით.