„უცხო ქვეყნის მოქალაქისათვის საქართველოს მოქალაქეობის მინიჭების მიზანშეწონილობის საკითხის განხილვისას სახელმწიფო და საზოგადოებრივი უსაფრთხოების თვალსაზრისით საქმისათვის მნიშვნელოვანი გარემოებების დადგენის წესის დამტკიცების შესახებ“

სახელმწიფო   სარეგისტრაციო კოდი 010.130.000.22.027.013.553

საქართველოს იუსტიციის მინისტრისა და საქართველოს შინაგან საქმეთა მინისტრის

ერთობლივი ბრძანება №185-№1161

2009 წლის 22 სექტემბერი

ქ. თბილისი

უცხო ქვეყნის მოქალაქისათვის საქართველოს მოქალაქეობის მინიჭების მიზანშეწონილობის საკითხის განხილვისას სახელმწიფო და საზოგადოებრივი უსაფრთხოების თვალსაზრისით საქმისათვის მნიშვნელოვანი გარემოებების დადგენის წესის დამტკიცების შესახებ

„უცხო ქვეყნის მოქალაქისათვის საქართველოს მოქალაქეობის მინიჭების წესის შესახებ“ საქართველოს პრეზიდენტის 2006 წლის 26 იანვრის №80 ბრძანებულების მე-5 მუხლის მე-5 პუნქტის შესაბამისად,  ვბრძანებთ:

1. დამტკიცდეს უცხო ქვეყნის მოქალაქისათვის საქართველოს მოქალაქეობის მინიჭების მიზანშეწონილობის საკითხის განხილვისას სახელმწიფო და საზოგადოებრივი უსაფრთხოების თვალსაზრისით საქმისათვის მნიშვნელოვანი გარემოებების დადგენის თანდართული წესი.

2. ეს ბრძანება ამოქმედდეს გამოქვეყნებისთანავე.

ზ. ადეიშვილი

ი. მერაბიშვილი

უცხო ქვეყნის მოქალაქისათვის საქართველოს მოქალაქეობის მინიჭების მიზანშეწონილობის საკითხის განხილვისას სახელმწიფო და საზოგადოებრივი უსაფრთხოების თვალსაზრისით საქმისათვის მნიშვნელოვანი გარემოებების დადგენის წესი

    მუხლი 1

უცხო ქვეყნის მოქალაქისათვის საქართველოს მოქალაქეობის მინიჭების მიზანშეწონილობის საკითხის განხილვისას, სახელმწიფო და საზოგადოებრივი უსაფრთხოების თვალსაზრისით საქმისათვის მნიშვნელოვანი გარემოებების დასადგენად, საჯარო სამართლის იურიდიული პირის – სამოქალაქო რეესტრის სააგენტოს (შემდგომში – სააგენტო) ურთიერთობა საქართველოს შინაგან საქმეთა სამინისტროსა და საქართველოს საგარეო დაზვერვის სპეციალურ სამსახურთან განისაზღვრება ამ წესით.

    მუხლი 2

უცხო ქვეყნის მოქალაქისათვის საქართველოს მოქალაქეობის მინიჭების მიზანშეწონილობის საკითხს განიხილავს სააგენტო.

    მუხლი 3

1. თუ არსებობს საფუძვლიანი ვარაუდი, რომ უცხო ქვეყნის მოქალაქისათვის საქართველოს მოქალაქეობის მინიჭებამ შეიძლება ზიანი მიაყენოს საქართველოს სახელმწიფო ან/და საზოგადოებრივ უსაფრთხოებას, სააგენტო განცხადებასა და თანდართულ დოკუმენტებს სახელმწიფო და საზოგადოებრივი უსაფრთხოების თვალსაზრისით საქმისათვის მნიშვნელოვანი გარემოებების დასადგენად მათი მიღებიდან 2 დღეში უგზავნის საქართველოს შინაგან საქმეთა სამინისტროს ან/და საქართველოს საგარეო დაზვერვის სპეციალურ სამსახურს.

2. საქართველოს შინაგან საქმეთა სამინისტროდან ან საქართველოს საგარეო დაზვერვის სპეციალური სამსახურიდან მიღებული პასუხი არ შეიძლება გახდეს უცხო ქვეყნის მოქალაქისთვის საქართველოს მოქალაქეობის მინიჭებაზე უარის თქმის უპირობო საფუძველი.

3. ამ მუხლის პირველი პუნქტით გათვალისწინებული დაწესებულებებიდან პასუხის მიღების შემდეგ, აგრეთვე საქმის მასალების გადაგზავნიდან 10 დღის ვადაში მათგან პასუხის მიუღებლობის შემთხვევაში, სააგენტო განიხილავს საკითხს და ამზადებს დასკვნას უცხო ქვეყნის მოქალაქისათვის საქართველოს მოქალაქეობის მინიჭების საკითხის საქართველოს კონსტიტუციის მე-12 მუხლის მე-2 პუნქტთან შესაბამისობის/შეუსაბამობის თაობაზე.

    მუხლი 4         

1. საქმის განხილვისას სახელმწიფო და საზოგადოებრივი უსაფრთხოების თვალსაზრისით საქმისათვის მნიშვნელოვანი გარემოებების დასადგენად სააგენტო უფლებამოსილია უცხო ქვეყნის მოქალაქე მოიწვიოს გასაუბრებაზე. საჭიროების შემთხვევაში გასაუბრება შეიძლება ჩატარდეს სატელეფონო კავშირის მეშვეობით.

2. საქმისათვის მნიშვნელოვანი გარემოებების დასადგენად გასაუბრებაზე შეიძლება აგრეთვე მოწვეულ იქნეს სხვა პირი, გამოთხოვილ იქნეს დოკუმენტები და ინფორმაცია სხვადასხვა დაწესებულებებიდან და ორგანიზაციებიდან.

    მუხლი 5

1. უცხო ქვეყნის მოქალაქესთან გასაუბრებას ესწრება სააგენტოს ორი და საქართველოს შინაგან საქმეთა სამინისტროს ერთი წარმომადგენელი (შემდგომში – წარმომადგენლები).

2. წარმომადგენელთა ვინაობა განისაზღვრება სააგენტოს თავმჯდომარისა და საქართველოს შინაგან საქმეთა სამინისტროს უფლებამოსილი პირების მიერ.

3. გასაუბრების ორგანიზაციული საკითხები განისაზღვრება სააგენტოს თავმჯდომარის ბრძანებით, რომლის პროექტი უნდა შეთანხმდეს საქართველოს შინაგან საქმეთა სამინისტროს კონტრდაზვერვის დეპარტამენტთან.

    მუხლი 6

გასაუბრების შედეგად წარმომადგენლები იღებენ ერთ-ერთ შემდეგ რეკომენდაციას:

უცხო ქვეყნის მოქალაქისათვის საქართველოს მოქალაქეობის მინიჭებაზე უარის თქმის საფუძვლები არ არსებობს;

უცხო ქვეყნის მოქალაქისათვის საქართველოს მოქალაქეობის მინიჭება მიზანშეწონილი არ არის.

    მუხლი 7

1. გასაუბრება ტარდება და გადაწყვეტილება მიიღება, თუ გასაუბრებას ესწრება სააგენტოსა და საქართველოს შინაგან საქმეთა სამინისტროს თითო წარმომადგენელი მაინც.

2. გადაწყვეტილება მიიღება დამსწრე წარმომადგენელთა ხმების უმრავლესობით.

3. წარმომადგენლები გადაწყვეტილებას ადასტურებენ ხელმოწერით.

    მუხლი 8

თუ გამოვლინდა, რომ უცხო ქვეყნის მოქალაქე წარმოადგენს ყალბ დოკუმენტებს ან დაფარავს საქმისათვის მნიშვნელოვან ინფორმაციას, წარმომადგენლები მიიღებენ ამ წესის მე-6 მუხლის „ბ“ ქვეპუნქტით გათვალისწინებულ რეკომენდაციას.

    მუხლი 9

იმ პირთა სიას, რომელთა შესახებ სააგენტოს დასკვნა ეგზავნება საქართველოს პრეზიდენტს, აგრეთვე იმ პირთა სიას, რომელთა თაობაზეც მიღებულ იქნა ამ წესის მე-6 მუხლის „ბ“ ქვეპუნქტით გათვალისწინებული რეკომენდაცია, პირადი ან ელექტრონული ხელმოწერით ადასტურებს სააგენტოში მივლენილი საქართველოს შინაგან საქმეთა სამინისტროს წარმომადგენელი.

    მუხლი 10

ამ წესის პირველ მუხლში აღნიშნულ დაწესებულებათა შორის ინფორმაციის გაცვლა შეიძლება განხორციელდეს როგორც წერილობითი, ისე  ელექტრონული ფორმით.