„2008 წლის 7 აგვისტომდე რუსეთის ფედერაციაში მცხოვრები საქართველოს მოქალაქების საქართველოს აკრედიტირებულ უმაღლეს საგანმანათლებლო დაწესებულებაში სწავლის გაგრძელების უფლების მოპოვების წესის დამტკიცების თაობაზე”

სახელმწიფო სარეგისტრაციო კოდი 430.210.000.22.022.012.617

საქართველოს განათლებისა და მეცნიერების

მინისტრის

ბრძანება №02

2009 წლის 6 იანვარი

 ქ. თბილისი

2008 წლის 7 აგვისტომდე რუსეთის ფედერაციაში მცხოვრები საქართველოს მოქალაქეების საქართველოს აკრედიტებულ უმაღლეს საგანმანათლებლო დაწესებულებაში სწავლის გაგრძელების უფლების მოპოვების წესის დამტკიცების თაობაზე

„უმაღლესი განათლების შესახებ“ საქართველოს კანონის 891 მუხლის მე-3 და მე-4 პუნქტების საფუძველზე, ვბრძანებ:

1. დამტკიცდეს 2008 წლის 7 აგვისტომდე რუსეთის ფედერაციაში მცხოვრები საქართველოს მოქალაქეების საქართველოს აკრედიტებულ უმაღლეს საგანმანათლებლო დაწესებულებაში სწავლის გაგრძელების უფლების მოპოვების წესი.

2. ბრძანება ამოქმედდეს გამოქვეყნებისთანავე.

ნ. გვარამია

2008 წლის 7 აგვისტომდე რუსეთის ფედერაციაში მცხოვრები საქართველოს მოქალაქეების საქართველოს აკრედიტებულ უმაღლეს საგანმანათლებლო დაწესებულებაში სწავლის გაგრძელების უფლების მოპოვების წესი

    მუხლი 1.

წესი არეგულირებს 2008 წლის 7 აგვისტომდე რუსეთის ფედერაციაში მცხოვრები საქართველოს მოქალაქეების საქართველოს აკრედიტებულ უმაღლეს საგანმანათლებლო დაწესებულებაში (შემდგომში – უმაღლესი საგანმანათლებლო დაწესებულება) ერთიანი ეროვნული გამოცდების გარეშე ჩარიცხვის საკითხს.

    მუხლი 2.

უმაღლეს საგანმანათლებლო დაწესებულებაში ჩარიცხვის უფლება აქვს საქართველოს მოქალაქეს, რომელიც 2008 წლის 7 აგვისტომდე ცხოვრობდა რუსეთის ფედერაციაში და ირიცხებოდა ამ ქვეყნის მიერ აღიარებულ უმაღლეს საგანმანათლებლო დაწესებულებაში (შემდგომში – სტუდენტი).

    მუხლი 3.

1. სტუდენტს, რომელსაც სურს ჩარიცხვა უმაღლეს საგანმანათლებლო დაწესებულებაში, საქართველოს განათლებისა და მეცნიერების სამინისტროს მიმართავს განცხადებით 2009 წლის პირველ ივლისამდე.

2. ამ მუხლის პირველი პუნქტით განსაზღვრულ განცხადებას თან უნდა დაერთოს შემდეგი დოკუმენტაცია:

ა) სტუდენტის პირადობის დამადასტურებელი დოკუმენტის ან პასპორტის ასლი;

ბ) საქართველოს აკრედიტებული უმაღლესი საგანმანათლებლო დაწესებულების (რომელსაც ირჩევს სტუდენტი) ხელმძღვანელის (რექტორი/რექტორის მოადგილე) წერილი, უმაღლეს საგანმანათლებლო დაწესებულებაში არსებულ „ერთიანი ეროვნული გამოცდების ჩატარების დებულების დამტკიცების შესახებ“ საქართველოს განათლებისა და მეცნიერების მინისტრის 2005 წლის 28 მარტის №127 ბრძანებით დამტკიცებული დებულების 224 მუხლის მე-2 პუნქტის შესაბამისად განსაზღვრულ თავისუფალ ადგილზე სემესტრის შესაბამისად სტუდენტის მიღებაზე თანხმობის შესახებ (სახელის, გვარისა და ფაკულტეტის/სპეციალობის მითითებით);

გ) უცხო ქვეყნის საგანმანათლებლო დაწესებულების მიერ გაცემული საგანმანათლებლო დოკუმენტი, აგრეთვე მისი თანმხლები დოკუმენტაციის ან/და სწავლის პერიოდში გავლილი საგნების ნუსხა, შეფასებების ან/და მათი კრედიტების ჩვენებით (ტრანსკრიპტი);

დ) ორი ფოტოსურათი, 3X4.

3. იმ შემთხვევაში, თუ უმაღლეს საგანმანათლებლო დაწესებულებას არა აქვს „ერთიანი ეროვნული გამოცდების ჩატარების დებულების დამტკიცების შესახებ“ საქართველოს განათლებისა და მეცნიერების მინისტრის 2005 წლის 28 მარტის №127 ბრძანებით დამტკიცებული დებულების 224 მუხლის მე-2 პუნქტის შესაბამისად განსაზღვრული თავისუფალი ადგილი, მაშინ უმაღლესი საგანმანათლებლო დაწესებულება მიმართავს საჯარო სამართლის იურიდიულ პირს – განათლების აკრედიტაციის ეროვნულ ცენტრს (შემდგომში – ცენტრი), რომელიც უმაღლეს საგანმანათლებლო დაწესებულებას უმატებს სტუდენტთა ადგილების რაოდენობას. ამ შემთხვევაში ეს რაოდენობა მოაკლდება უმაღლესი საგანმანათლებლო დაწესებულების მიერ განსაზღვრულ მისაღებ ან/და გადმოყვანის წესით სტუდენტთა ჩარიცხვისათვის გამოყოფილ თავისუფალი ადგილების რაოდენობას.

4. ამ მუხლის მე-2 პუნქტის „გ“ ქვეპუნქტით გათვალისწინებული დოკუმენტების ფორმალურ ცნობას (აღიარებას), საქართველოს განათლებისა და მეცნიერების სამინისტროს მიმართვის საფუძველზე, ახდენს ცენტრი.

5. ცენტრი რუსეთის ფედერაციაში გაცემული საგანმანათლებლო დოკუმენტის ფორმალური ცნობის (აღიარების) მიზნით უკავშირდება ამ ქვეყნის შესაბამის უფლებამოსილ ორგანოს/დაწესებულებას, საიდანაც გამოითხოვს საქართველოს განათლებისა და მეცნიერების მინისტრის ბრძანებით განსაზღვრულ საგანმანათლებლო დოკუმენტის ფორმალური ცნობისათვის (აღიარებისთვის) საჭირო დოკუმენტებს და არკვევს, არის თუ არა აღნიშნული დოკუმენტები გაცემული იმ საგანმანათლებლო დაწესებულების მიერ, რომელიც მითითებულია დოკუმენტში და გაცემულია თუ არა მასში მითითებულ პირზე.

    მუხლი 4.

1. საქართველოს განათლებისა და მეცნიერების მინისტრი (შემდგომში – მინისტრი) ამ წესის შესაბამისად წარდგენილი განცხადებების შესწავლის მიზნით, ქმნის კომისიას, რომელიც მინისტრისათვის ამზადებს გადაწყვეტილების პროექტებს.

2. მინისტრი ამ მუხლის პირველი პუნქტით განსაზღვრული კომისიის რეკომენდაციის საფუძველზე გამოსცემს ინდივიდუალურ ადმინისტრაციულ-სამართლებრივ აქტს სტუდენტისათვის უმაღლეს საგანმანათლებლო დაწესებულებაში ერთიანი ეროვნული გამოცდების გარეშე სწავლის გაგრძელების უფლების მოპოვების შესახებ.

    მუხლი 5.

1. უმაღლესი საგანმანათლებლო დაწესებულება ვალდებულია შესაბამის ფაკულტეტზე ჩარიცხოს საქართველოს მოქალაქეები და მათთან ხელშეკრულებები გააფორმოს სტუდენტებისათვის უმაღლეს საგანმანათლებლო დაწესებულებაში ერთიანი ეროვნული გამოცდების გარეშე სწავლის გაგრძელების უფლების მოპოვების შესახებ მინისტრის მიერ გამოცემული ინდივიდუალური ადმინისტრაციულ-სამართლებრივი აქტის გამოცემიდან 15 დღის ვადაში.

2. უმაღლესი საგანმანათლებლო დაწესებულების რექტორი სტუდენტის ჩარიცხვას აფორმებს ინდივიდუალური ადმინისტრაციულ-სამართლებრივი აქტით, რომელსაც გამოცემიდან 15 დღის ვადაში უგზავნის ცენტრს.

3. უმაღლესი საგანმანათლებლო დაწესებულება ვალდებულია, „უმაღლესი საგანმანათლებლო პროგრამების კრედიტებით გაანგარიშების წესის დამტკიცების შესახებ“ საქართველოს განათლებისა და მეცნიერების მინისტრის 2007 წლის 5 იანვრის №3 ბრძანებით დამტკიცებული „უმაღლესი საგანმანათლებლო პროგრამების კრედიტებით გაანგარიშების წესის“ 41 მუხლის შესაბამისად, აღიაროს სტუდენტის მიერ უმაღლეს საგანმანათლებლო დაწესებულებაში კანონმდებლობით დადგენილი წესით ჩარიცხვამდე უმაღლესი საგანმათლებლო პროგრამის ფარგლებში მოპოვებული კრედიტები საქართველოს კანონმდებლობით დადგენილი წესით და, საჭიროების შემთხვევაში, სტუდენტთან ერთად შეიმუშაოს ინდივიდუალური სასწავლო პროგრამა.