საზღვარგარეთ არსებულ საერთაშორისო ორგანიზაციაში დასაქმებული საქართველოს თავდაცვის სამინისტროს სისტემის მოსამსახურისთვის სამსახურებრივი უფლებამოსილების შეჩერებისა და ანაზღაურების შენარჩუნების წესის დამტკიცების შესახებ

მუხლი 2. ტერმინთა განმარტება

ამ წესში გამოყენებულ ტერმინებს აქვს შემდეგი მნიშვნელობა:  

ა) მოსამსახურე – სამინისტროს სისტემაში შრომითი ხელშეკრულებით დასაქმებული მოსამსახურე, აგრეთვე სამინისტროს სისტემაში შემავალი საჯარო სამართლის იურიდიულ პირში დასაქმებული მოსამსახურე (გარდა სამხედრო მოსამსახურისა); 

ბ)  საერთაშორისო ორგანიზაციაში საქმიანობა  –  საზღვარგარეთ საერთაშორისო ორგანიზაციაში არსებულ თანამდებობაზე საერთაშორისო პარტნიორობის ან/და სამშვიდობო ოპერაციის მიზნების შესასრულებლად სამინისტროს სისტემის მოსამსახურის მიერ განხორციელებული საქმიანობა;

გ) სამინისტროს სისტემის მოსამსახურე –  სამინისტროს სისტემაში დასაქმებული (გარდა სამხედრო პოლიციის დეპარტამენტის მოსამსახურისა) სამხედრო მოსამსახურე, სამოქალაქო ან სპეციალური წოდების მქონე პირი;   

დ)  სამინისტროსთან წინასწარი შეთანხმება: 

დ.ა) სამინისტროს სისტემის მოსამსახურის დამსაქმებელი დაწესებულების ინიციატივით სამინისტროს სისტემის მოსამსახურის საერთაშორისო ორგანიზაციაში საქმიანობა;

დ.ბ)  სამინისტროს სისტემის მოსამსახურის დამსაქმებელი დაწესებულების ხელმძღვანელის ან მისგან უფლებამოსილი პირის მიერ გაცემული წერილობითი თანხმობა, რომელიც მიიღება, საერთაშორისო ორგანიზაციაში საქმიანობის დაწყებამდე, ამ მოსამსახურის დასაბუთებული წერილობითი მიმართვის საფუძველზე; 

ე)  სამხედრო მოსამსახურე  –  სამინისტროს სისტემაში დასაქმებული სამხედრო მოსამსახურე; 

ვ)  საჯარო მოსამსახურე – „კორუფციის წინააღმდეგ ბრძოლის შესახებ“ საქართველოს კანონის  2¹  მუხლით გათვალისწინებული საჯარო მოსამსახურე (გარდა სამხედრო მოსამსახურისა).

მუხლი 3. საერთაშორისო ორგანიზაციაში საქმიანობის თავსებადობა

საერთაშორისო ორგანიზაციაში საქმიანობა სამინისტროს სისტემის:

ა) სამხედრო მოსამსახურისთვის თავსებადია სამხედრო სამსახურის სტატუსთან, სამინისტროსთან წინასწარი შეთანხმებით;

ბ) საჯარო მოსამსახურისათვის თავსებადია სამინისტროს სისტემაში სამსახურთან, სამინისტროსთან წინასწარი შეთანხმებით;

გ) მოსამსახურისთვის თავსებადია სამინისტროს სისტემაში სამსახურთან,  თუ მასთან დადებული შრომითი ხელშეკრულება ითვალისწინებს აღნიშნულს.

მუხლი 4. სამსახურებრივი უფლებამოსილების შეჩერება

ამ წესის მე-3 მუხლით გათვალისწინებულ შემთხვევაში მოსამსახურეს უჩერდება სამსახურებრივი უფლებამოსილება საერთაშორისო ორგანიზაციაში საქმიანობის პერიოდში.

მუხლი 5. ანაზღაურების წესი

საერთაშორისო ორგანიზაციაში საქმიანობის პერიოდში ამ წესის:

ა) მე-2 მუხლის „დ.ა“ ქვეპუნქტით გათვალისწინებულ შემთხვევაში მოსამსახურეს უნარჩუნდება წოდებრივი/თანამდებობრივი სარგო, დანამატები და სხვა ფულადი გასაცემლები, გარდა კვების ნაცვლად დაწესებული კომპენსაციისა; 

ბ) მე-2 მუხლის „დ.ბ“ ქვეპუნქტით გათვალისწინებულ შემთხვევაში მოსამსახურეს არ უნარჩუნდება წოდებრივი/თანამდებობრივი სარგო, დანამატები და სხვა ფულადი გასაცემლები.