აფთიაქში /სააფთიაქო მაღაზიაში/ სარეალიზაციოდ ფსიქოტროპული საშუალებების გაყიდვაზე სპეციალური ლიცენზიის გაცემის დროებითი წესები

საქართველოს რესპუბლიკის ჯანმრთელობის დაცვის მინისტრის

 ბრძანება №362/ო

1994 წლის 23 ოქტომბერი

ქ. თბილისი

აფთიაქში /სააფთიაქო მაღაზიაში/  სარეალიზაციოდ ფსიქოტროპული საშუალებების გაყიდვაზე სპეციალური ლიცენზიის გაცემის დროებითი წესები

1. აფთიაქში /სააფთიაქო მაღაზიაში/ სარეალიზაციოდ ნებადართული ფსიქოტროპული საშუალებების გაყიდვაზე სპეციალური ლიცენზიების გაცემას აწარმოებს ჯანმრთელობის დაცვის სამინისტროსთან არსებული ნარკოტიკული და ფსიქოტროპული ნივთიერებების ლეგალურ ბრუნვაზე კონტროლის რესპუბლიკური ინსპექცია /შემდგომში ინსპექცია/.

2. ინსპექციის მიერ სპეციალური ლიცენზია გაიცემა მხოლოდ იმ აფთიაქზე /სააფთიაქო მაღაზიაზე), რომელსაც გააჩნია ჯანდაცვის სამინისტროს ფარმაციისა და ფარმაინდუსტრიის სამმართველოს მიერ გაცემული ლიცენზია აფთიაქის /სააფთიაქო მაღაზიის/ ფუნქციონირების შესახებ.

3. სპეციალური ლიცენზიის მისაღებად აფთიაქის გამგე /სააფთიაქო მაღაზიის/ მფლობელი/ ინსპექციაში წარადგენს შემდეგ საბუთებს:

- განცხადებას ინსპექციის უფროსის სახელზე;

- ჯანდაცვის სამინისტროს ფარმაციისა და ფარმინდუსტრიის სამმართველოს მიერ აფთიაქზე /სააფთიაქო მაღაზიაზე/ გაცემული ლიცენზიის დამადასტურებელ ცნობას;

- აფთიაქში /სააფთიაქო მაღაზიაში/ მომუშავე უმაღლესი ფარმაცევტული განათლების მქონე პირის დიპლომს;

- სპეციალური ლიცენზიის მიმღების პირადობის დამადასტურებელ საბუთს.

4. აფთიაქი /სააფთიაქო მაღაზია/, რომელიც მიიღებს სპეციალურ ლიცენზიას, ვალდებულია აღნიშნულის შესახებ აცნობოს რაიონის პოლიციას.

5. სპეციალური ლიცენზიის დაკარგვის შემთხვევაში ინსპექცია რაიონის პოლიციიდან გაცემული ცნობის საფუძველზე გასცემს დუბლიკატს.

6. აფთიაქიდან /სააფთიაქო მაღაზიიდან/ ურეცეპტოდ გაიცემა მხოლოდ ის ფსიქოტროპული სამკურნალო საშუალებები, რომელთა ურეცეპტოდ გაცემა ნებადართულია ჯანმრთელობის დაცვის სამინისტროს მიერ;

აფთიაქი /სააფთიაქო მაღაზია/ ვალდებულია მიიღოს მხოლოდ სათანადო წესების დაცვით შევსებული რეცეპტები, რომლებიც აფთიაქში /სააფთიაქო მაღაზიაში უნდა ინახებოდეს ერთი წლის განმავლობაში;

აფთიაქი /სააფთიაქო მაღაზია/ ვალდებულია გააჩნდეს ჯანდაცვის სამინისტროს მიერ დამტკიცებული სარეალიზაციო ნებადართული ფსიქოტროპული სამკურნალო საშუალებების ჩამონათვალი, აგრეთვე, იმ სამკურნალო საშუალებათა ნუსხა, რომელთა ურეცეპტოდ გაცემა ნებადართულია ჯანდაცვის სამინისტროს მიერ;

ფსიქოტროპული საშუალებები, რეცეპტების რეგისტრაციის ჟურნალი, ფსიქოტროპული სამკურნალო საშუალებების რაოდენობრივი აღრიცხვის ჟურნალი, შეძენის ფაქტურები /რომელშიც მითითებულია ფსიქოტროპული სამკურნალო საშუალებების სერია, ნომერი, პრეპარატის ვარგისიანობის ვადა და ვისგან იქნა შეძენილი და სპეციალური ლიცენზია უნდა ინახებოდეს აფთიაქში /სააფთიაქო მაღაზიაში/, რკინის კარადაში;

აფთიაქს /სააფთიაქო მაღაზიას/ უფლება აქვს აწარმოოს ფსიქოტროპული სამკურნალო საშუალებების რეალიზაცია მხოლოდ სპეციალურ ლიცენზიაში აღნიშნული აფთიაქის /სააფთიაქო მაღაზიის/ განთავსების ადგილიდან;

აფთიაქს /სააფთიაქო მაღაზიას/ უფლება ეძლევა სარეალიზაციოდ შეისყიდოს  ფსიქოტროპული სამკურნალო საშუალებები ფარმაცევტული საქმიანობით დაკავებული, ოფიციალურად რეგისტრირებული იურიდიული პირებისაგან, მხოლოდ ინსპექციის ნებართვის საფუძველზე, არსებული წესების სრული დაცვით;

ფსიქოტროპული სამკურნალო საშუალებები ექვემდებარებიან საგნობრივ-რაოდენობრივ აღრიცხვას მოქმედი წესების დაცვით;

სპეციალური ლიცენზიის მოქმედება ვადაზე ადრე წყდება შემდეგ შემთხვევებში:

- აფთიაქის /სააფთიაქო მაღაზიის/ ლიკვიდაციისას;

- აფთიაქის /სააფთიაქო მაღაზიის/ ადგილმდებარეობის შეცვლისას;

- ინსპექციის მიერ ამგვარი სანქციის გამოყენებისას;

- კანონით გათვალისწინებულ სხვა შემთხვევებში.

სპეციალური ლიცენზიის გაცემაზე დაწესებულია ერთჯერადი გადასახადი.

ნარკოტიკული და ფსიქოტროპული ნივთიერებების

ლეგალურ ბრუნვაზე კონტროლის რესპუბლიკური

ინსპექციის უფროსი                                                                                       თ. კვირკველია