დოკუმენტის სტრუქტურა
განმარტებების დათვალიერება
დაკავშირებული დოკუმენტები
დოკუმენტის მონიშვნები
კონსოლიდირებული პუბლიკაციები
,,საქართველოს მთავრობის კანცელარიის შექმნის შესახებ“ საქართველოს მთავრობის 2004 წლის 3 მარტის №2 დადგენილებით დამტკიცებულ საქართველოს მთავრობის კანცელარიის დებულებაში ცვლილებებისა და დამატებების შეტანის თაობაზე“ | |
---|---|
დოკუმენტის ნომერი | 171 |
დოკუმენტის მიმღები | საქართველოს მთავრობა |
მიღების თარიღი | 06/08/2008 |
დოკუმენტის ტიპი | საქართველოს მთავრობის დადგენილება |
გამოქვეყნების წყარო, თარიღი | სსმ, 115, 11/08/2008 |
ძალის დაკარგვის თარიღი | 06/07/2012 |
სარეგისტრაციო კოდი | 010.220.000.10.003.001.116 |
კონსოლიდირებული პუბლიკაციები |
დოკუმენტის კონსოლიდირებული ვარიანტის ნახვა ფასიანია, აუცილებელია სისტემაში შესვლა და საჭიროების შემთხვევაში დათვალიერების უფლების ყიდვა, გთხოვთ გაიაროთ რეგისტრაცია ან თუ უკვე რეგისტრირებული ხართ, გთხოვთ, შეხვიდეთ სისტემაში
პირველადი სახე (11/08/2008 - 16/08/2008)
საქართველოს მთავრობის
დადგენილება №171
2008 წლის 6 აგვისტო
ქ. თბილისი
„საქართველოს მთავრობის კანცელარიის შექმნის შესახებ“ საქართველოს მთავრობის 2004 წლის 3 მარტის №2 დადგენილებით დამტკიცებულ საქართველოს მთავრობის კანცელარიის დებულებაში ცვლილებებისა და დამატებების შეტანის თაობაზე
1. „ნორმატიული აქტების შესახებ“ საქართველოს კანონის 36-ე მუხლის შესაბამისად „საქართველოს მთავრობის კანცელარიის შექმნის შესახებ“ საქართველოს მთავრობის 2004 წლის 3 მარტის №2 დადგენილებით დამტკიცებულ საქართველოს მთავრობის კანცელარიის დებულებაში შეტანილ იქნეს შემდეგი ცვლილებები და დამატებები:
ა) მე-2 მუხლი ჩამოყალიბდეს ახალი რედაქციით:
„მუხლი 2. საქართველოს მთავრობის კანცელარიის ძირითადი ამოცანები და ფუნქციები
საქართველოს მთავრობის კონსტიტუციური უფლებამოსილების განხორციელების ხელშეწყობის მიზ-ნით მთავრობის კანცელარია თავისი კომპეტენციის ფარგლებში უზრუნველყოფს:
ა) საქართველოს მთავრობის მიერ აღმასრულებელი ხელისუფლების განხორციელებისათვის პირობების შექმნას;
ბ) სამინისტროების, სახელმწიფო საქვეუწყებო დაწესებულებებისა და სამინისტროების სისტემაში შემავალი საჯარო სამართლის იურიდიული პირების საქმიანობის კოორდინაციისა და კონტროლის ორგანიზების ხელშეწყობას, სახელმწიფო საქვეუწყებო დაწესებულებების სპეციალურ რეესტრში რეგისტრაციას;
გ) სოციალურ-ეკონომიკური და სხვა სახელმწიფო მიზნობრივი პროგრამების განხორციელების ხელშეწყობასა და მონიტორინგს;
დ) საქართველოს მთავრობის საკანონმდებლო ინიციატივის განხორციელებას;
ე) მინისტრებისა და სახელმწიფო საქვეუწყებო დაწესებულებების ხელმძღვანელთა აქტების გაუქმების შესახებ დასკვნების მომზადებას;
ვ) საქართველოს მთავრობის სამართლებრივი აქტების, საქართველოს პრემიერ-მინისტრის ბრძანებათა პროექტების მომზადებასა და სამართლებრივ ექსპერტიზას;
ზ) საქართველოს მთავრობისა და საქართველოს პრემიერ-მინისტრის სახელზე შემოსული ადმინისტრაციული საჩივრების განხილვის სფეროში საქართველოს მთავრობისა და საქართველოს პრემიერ-მინისტრის უფლებამოსილების განხორციელების ხელშეწყობას;
თ) საქართველოს პრემიერ-მინისტრის საქმიანობის ინფორმაციულ და ანალიტიკურ უზრუნველყოფას;
ი) საქართველოს პრემიერ-მინისტრის ურთიერთობას საქართველოს პარლამენტთან, სახელმწიფო დაწესებულებებთან, საერთაშორისო ორგანიზაციებთან, მოქალაქეთა პოლიტიკურ და საზოგადოებრივ გაერთიანებებთან და სხვა ინსტიტუტებთან;
კ) საქართველოს პრემიერ-მინისტრის საქმიანობასთან დაკავშირებულ საპროტოკოლო ღონისძიებათა კოორდინაციას;
ლ) საქართველოს მთავრობის სხდომების მომზადებას რეგლამენტით დადგენილი წესით;
მ) საქართველოს მთავრობასთან და საქართველოს პრემიერ-მინისტრთან არსებული სათათბირო ორგანოების სხდომების გამართვის, განსახილველი საკითხებისა და დღის წესრიგის პროექტების მომზადებას;
ნ) სათათბირო ორგანოების – კომისიებისა და საბჭოების საქმიანობის კოორდინაციას, მონიტორინგსა და ხელშეწყობას;
ო) სამთავრობო პროგრამების შემუშავებასთან დაკავშირებულ საქმიანობას და ამ პროგრამების შესრულების კონტროლს;
პ) სახელმწიფო ბიუჯეტის პროექტის შემუშავებასთან დაკავშირებულ ღონისძიებებში მონაწილეობას;
ჟ) საკონსტიტუციო, უზენაეს და საერთო სასამართლოებში საქართველოს მთავრობისა და საქართველოს პრემიერ-მინისტრის წარმომადგენლობას;
რ) სოციალურ-ეკონომიკური და ინსტიტუციური რეფორმების განხორციელების თაობაზე წინადადებების შემუშავებას და მათი განხორციელების მონიტორინგს;
ს) დოკუმენტების მიღებას, დამუშავებასა და მათთან დაკავშირებულ დავალებათა შესრულებას;
ტ) საქართველოს მთავრობის გადაწყვეტილებათა შესრულების კონტროლს;
უ) ცალკეული ორგანიზაციებიდან და დაწესებულებებიდან ინფორმაციის, საჭირო დოკუმენტაციის გამოთხოვასა და მიღებას კანონმდებლობით დადგენილი წესით;
ფ) კანონპროექტების მომზადებას;
ქ) ქვეყნის ანტიკორუფციული პოლიტიკის თაობაზე წინადადებების შემუშავებასა და მათი განხორციელების მონიტორინგს;
ღ) წარმომადგენლობას ანტიკორუფციულ საკითხებზე მომუშავე საერთაშორისო ორგანიზაციებში;
ყ) კორუფციულ დანაშაულობათა სტატისტიკური ინფორმაციის ანალიზს და კოორდინირებულ თანამშრომლობას ანტიკორუფციული კუთხით მომუშავე სხვადასხვა სახელმწიფო უწყებებთან;
შ) ელექტრონული მმართველობის განვითარების სფეროში სახელმწიფო უწყებათა საქმიანობის კოორდინაციას;
ჩ) საქართველოს კანონმდებლობით საქართველოს მთავრობისა და საქართველოს პრემიერ-მინისტრის გამგებლობის სფეროს მიკუთვნებულ სხვა საკითხთა გადაწყვეტის ხელშეწყობას.“;
ბ) მე-3 მუხლი ჩამოყალიბდეს შემდეგი რედაქციით:
„მუხლი 3. საქართველოს მთავრობის კანცელარიის სტრუქტურა
1. საქართველოს მთავრობის კანცელარიის სტრუქტურული ერთეულები არიან:
ა) საქართველოს პრემიერ-მინისტრის აპარატი;
ბ) იურიდიული დეპარტამენტი;
გ) საორგანიზაციო დეპარტამენტი;
დ) საინფორმაციო უზრუნველყოფის დეპარტამენტი;
ე) საკადრო საკითხთა დეპარტამენტი;
ვ) პროტოკოლის დეპარტამენტი;
ზ) საფინანსო-სამეურნეო დეპარტამენტი;
თ) საქმისწარმოების დეპარტამენტი;
ი) საინფორმაციო ტექნოლოგიების დეპარტამენტი;
კ) სოციალურ-ეკონომიკური რეფორმების დეპარტამენტი;
ლ) საპარლამენტო მდივნის სამსახური (დეპარტამენტი).
2. მთავრობის კანცელარიის სტრუქტურაში (დეპარტამენტში) ქვედანაყოფის სახით შეიძლება შეიქმნას სამმართველო.“;
გ) მე-4 მუხლის მე-4 პუნქტი ამოღებულ იქნეს;
დ) მე-5 მუხლის მე-2 პუნქტი ჩამოყალიბდეს ახალი რედაქციით:
„2. საქართველოს მთავრობის პარლამენტთან ურთიერთობის საკითხებთან დაკავშირებულ საქმიანობას საპარლამენტო მდივნის სამსახურის მეშვეობით ახორციელებს საქართველოს მთავრობის საპარლამენტო მდივანი, რომელიც იმავდროულად არის საპარლამენტო მდივნის სამსახურის უფროსი.“;
ე) მე-7 მუხლი ჩამოყალიბდეს ახალი რედაქციით:
„მუხლი 7. საქართველოს მთავრობის კანცელარიის მატერიალურ-ტექნიკური უზრუნველყოფა
1. საქართველოს მთავრობის კანცელარიის მატერიალურ-ტექნიკური უზრუნველყოფის, ადმინისტრაციული შენობისა და მასთან დაკავშირებული საინჟინრო სისტემების ექსპლუატაციისა და მოვლა-შენახვის ფუნქციებს ახორციელებს მთავრობის კანცელარიის საფინანსო-სამეურნეო დეპარტამენტი.
2. მთავრობის კანცელარიის ადმინისტრაციული შენობის ინფრასტრუქტურის გამართული ფუნქციონირების, ტექნიკური და სამეურნეო საქმიანობის, ასევე სანიტარიულ-ჰიგიენური ნორმების დაცვის მონიტორინგს უზრუნველყოფს სამეურნეო-ტექნიკური ზედამხედველობის სამმართველო, რომელიც დამოუკიდებელი სტრუქტურული ქვედანაყოფის სახით იქმნება მთავრობის კანცელარიის სტრუქტურაში.“.
2. დადგენილება ამოქმედდეს 2008 წლის 18 აგვისტოდან.
პრემიერ-მინისტრი ვ. გურგენიძე
დოკუმენტის კომენტარები