საზოგადოებრივ ექსპერტთა შრომის ანაზღაურების წესის დამტკიცების შესახებ

დამტკიცდეს თანდართული ,,საზოგადოებრივ ექსპერტთა შრომის ანაზღაურების წესი”.

ძალადაკარგულად გამოცხადდეს: 

ა) „დამოუკიდებელ ექსპერტთა შრომის ანაზღაურების წესის შესახებ“ საქართველოს გარემოსა და ბუნებრივი რესურსების დაცვის მინისტრის 2015 წლის 29 სექტემბრის №229 ბრძანება;

ბ) ,,დამოუკიდებელ ექსპერტთა რეესტრის შესახებ” დებულების დამტკიცების თაობაზე“ საქართველოს გარემოსა და ბუნებრივი რესურსების დაცვის მინისტრის 2015 წლის 25 სექტემბრის №228 ბრძანება. 

1. ეს ბრძანება, გარდა ამ ბრძანებით დამტკიცებული საზოგადოებრივ ექსპერტთა შრომის ანაზღაურების წესის პირველი მუხლისა (სტრატეგიული გარემოსდაცვითი შეფასების ნაწილში) და მე-2 მუხლის პირველი პუნქტისა (სტრატეგიული გარემოდაცვითი შეფასების ნაწილში), ამოქმედდეს გამოქვეყნებისთანავე და გავრცელდეს 2018 წლის პირველი იანვრიდან წარმოშობილ ურთიერთობებზე.  

2. ამ ბრძანებით დამტკიცებული წესის პირველი მუხლი (სტრატეგიული გარემოსდაცვითი შეფასების ნაწილში) და მე-2 მუხლის პირველი პუნქტი (სტრატეგიული გარემოსდაცვითი შეფასების ნაწილში) ამოქმედდეს 2018 წლის პირველი ივლისიდან.

მუხლი 1. რეგულირების საგანი

საზოგადოებრივ ექსპერტთა შრომის ანაზღაურების წესი არეგულირებს გარემოზე ზემოქმედების შეფასების (შემდგომში – გზშ) ანგარიშზე, სტრატეგიული გარემოსდაცვითი შეფასების (შემდგომში – სგშ) ანგარიშსა და სტრატეგიული დოკუმენტის პროექტზე მიმდინარე საქმიანობის გაგრძელების შესახებ გადაწყვეტილების მისაღებად, ასევე საქმიანობის განმახორციელებლის შუამდგომლობის საფუძველზე გარემოსდაცვითი გადაწყვეტილებით განსაზღვრული პირობის შეცვლის თაობაზე ექსპერტიზის დასკვნის მომზადების მიზნით ექსპერტიზის პროცესში ჩართულ საზოგადოებრივ ექსპერტთა შრომის ანაზღაურებასთან დაკავშირებულ სამართლებრივ ურთიერთობებს.

მუხლი 2. საექსპერტო კომისია. საზოგადოებრივი ექსპერტი

1. გზშ-ის ანგარიშის, სგშ-ის ანგარიშისა და სტრატეგიული დოკუმენტის პროექტის, მიმდინარე საქმიანობის გაგრძელების შესახებ გადაწყვეტილების მისაღებად, ასევე, საქმიანობის განმახორციელებლის შუამდგომლობის საფუძველზე გარემოსდაცვითი გადაწყვეტილებით განსაზღვრული პირობის შეცვლის საკითხის განხილვის მიზნით, ყოველ კონკრეტულ შემთხვევაში, საქართველოს გარემოს დაცვისა და სოფლის მეურნეობის მინისტრის (შემდგომში – მინისტრი) ბრძანებით იქმნება შესაბამისი საექსპერტო კომისია. 

2. საექსპერტო კომისია შედგება ექსპერტებისაგან. ექსპერტი შეიძლება იყოს საქართველოს გარემოს დაცვისა და სოფლის მეურნეობის სამინისტროს (შემდგომში – სამინისტრო) ან მის სისტემაში შემავალი დაწესებულების წარმომადგენელი.

3. საჭიროების შემთხვევაში, საექსპერტო კომისიის მუშაობაში მონაწილეობისთვის, კანონმდებლობით დადგენილი წესით, სამინისტრომ შეიძლება მოიწვიოს საზოგადოებრივი ექსპერტები. 

4. საზოგადოებრივი ექსპერტი ექსპერტიზის პროცესში მონაწილეობს სამინისტროსთან დადებული შრომითი ხელშეკრულების საფუძველზე.

5. სამინისტროს უფლება აქვს საზოგადოებრივ ექსპერტად მოიწვიოს უცხო ქვეყნის სუბიექტი (ფიზიკური ან იურიდიული პირი) ან მოქალაქეობის არმქონე პირი.

6. საზოგადოებრივი ექსპერტი შეიძლება იყოს მხოლოდ შესაბამისი განათლებისა და კვალიფიკაციის მქონე ფიზიკური პირი ან/და შესაბამისი კვალიფიკაციის მქონე იურიდიული პირი. 

მუხლი 3. საზოგადოებრივი ექსპერტის შრომის ანაზღაურების პროცედურა

1. საზოგადოებრივი ექსპერტის შრომის ანაზღაურებას სამინისტრო ახორციელებს მისთვის სახელმწიფო ბიუჯეტიდან გამოყოფილი ასიგნებების ფარგლებში. 

2. საზოგადოებრივ ექსპერტთან შრომით ხელშეკრულებას აფორმებს მინისტრი ან კურატორი მინისტრის მოადგილე, რომლის დაქვემდებარებაშიც იმყოფება გარემოსდაცვითი შეფასების დეპარტამენტი, ხოლო მისი არყოფნის შემთხვევაში – კურატორი მინისტრის მოადგილის მოვალეობის შემსრულებელი.

მუხლი 4. საზოგადოებრივი ექსპერტის შრომის ანაზღაურების ოდენობა 

1. საზოგადოებრივი ექსპერტის შრომის ანაზღაურება განისაზღვრება თითოეულ ექსპერტიზაზე 300 ლარის ოდენობით, გარდა ამ მუხლის მე-2 პუნქტით გათვალისწინებული შემთხვევისა.

2. უცხო ქვეყნის სუბიექტის (ფიზიკური ან იურიდიული პირი) შრომის ანაზღაურება განისაზღვრება სამინისტროსა და აღნიშნულ სუბიექტს შორის შეთანხმებით. 

3. საზოგადოებრივი ექსპერტის, როგორც საექსპერტო კომისიის თავმჯდომარის, შრომის ანაზღაურება განისაზღვრება 400 ლარის ოდენობით.