არასრულწლოვანი მსჯავრდებულის გათავისუფლებისათვის მომზადების პროცესში არასრულწლოვანის ოჯახისა და სოციალური გარემოს რისკების შეფასებისა და საჭიროებების განსაზღვრის ფორმისა და წესის დამტკიცების შესახებ

მუხლი 1.  ზოგადი დებულებები

1. ეს წესი განსაზღვრავს არასრულწლოვნის საუკეთესო ინტერესების გათვალისწინებით, პენიტენციური დაწესებულებიდან (შემდგომში – დაწესებულება) არასრულწლოვანი მსჯავრდებულის გათავისუფლებისათვის მომზადების პროცესში საქართველოს სასჯელაღსრულებისა და პრობაციის სამინისტროს პენიტენციური დეპარტამენტისა (შემდგომში – დეპარტამენტი) და სსიპ – არასაპატიმრო სასჯელთა აღსრულებისა და პრობაციის ეროვნული სააგენტოს (შემდგომში – სააგენტო) მიერ განსახორციელებელი საქმიანობის პირობებსა და პროცედურებს, ასევე ამ პროცესში წარმოებული დოკუმენტების ფორმებს.

2. ამ მუხლის პირველი პუნქტით განსაზღვრული საქმიანობა ხორციელდება დაწესებულების, სააგენტოს – არასაპატიმრო სასჯელთა აღსრულებისა და პრობაციის ბიუროს (შემდგომში – პრობაციის ბიურო) და სააგენტოს სარეაბილიტაციო პროგრამების სამმართველოს ურთიერთთანამშრომლობის ფარგლებში.

მუხლი 2. გათავისუფლებისათვის მომზადების პროცესში დაწესებულების ადმინისტრაციის მოვალეობები

1. დაწესებულება ვალდებულია არასრულწლოვანი მსჯავრდებულის მიერ სასჯელის მოხდისაგან პირობით ვადამდე გათავისუფლებისათვის ან/და დანიშნული სასჯელის მოუხდელი ნაწილის უფრო მსუბუქი სახის სასჯელით შეცვლისათვის კანონით დადგენილი ვადის ფაქტობრივად მოხდამდე არაუგვიანეს 3 თვისა, არასრულწლოვანი მსჯავრდებულის კანონიერი წარმომადგენელის წერილობითი თანხმობით (დანართი №2), წერილობით მიმართოს სააგენტოს სარეაბილიტაციო პროგრამების სამმართველოს, დაწესებულების გარეთ ამ მსჯავრდებულის ოჯახისა და სოციალური გარემოს რისკებისა და საჭიროებების შეფასების თაობაზე.

2. დაწესებულების მიმართვა (დანართი №3) მოიცავს შემდეგი სახის ინფორმაციას:

ა) დაწესებულების მიმართვის საფუძველს;

ბ) არასრულწლოვანი მსჯავრდებულის შესახებ ზოგად დემოგრაფიულ მონაცემებს;

გ) ინფორმაციას ჩადენილი დანაშაულის შესახებ;

დ) ინფორმაციას არასრულწლოვანი მსჯავრდებულის ოჯახის შესახებ;

ე) დაწესებულების დასახელებას, სადაც არასრულწლოვანი მსჯავრდებული იხდის სასჯელს;

ვ) არასრულწლოვანი მსჯავრდებულის დაწესებულებაში განთავსების თარიღს;

ზ) დარჩენილი სასჯელის ვადას და სასჯელის მოხდის დასრულების თარიღს;

თ) სასჯელის მოხდისაგან პირობით ვადამდე გათავისუფლებისათვის  ან/და დანიშნული სასჯელის მოუხდელი ნაწილის უფრო მსუბუქი სახის სასჯელით შეცვლისათვის კანონით დადგენილი ვადის დადგომის თარიღს;

ი) დაწესებულებაში არასრულწლოვან მსჯავრდებულთან მომუშავე სოციალური მუშაკის სახელსა და გვარს;

კ) დაწესებულების საკონტაქტო მონაცემებს;

ლ) იმ მნიშვნელოვან საკითხებს, რომელზეც არასრულწლოვანი მსჯავრდებულის ოჯახის შეფასებისას სააგენტოს სოციალურმა მუშაკმა უნდა გაამახვილოს ყურადღება.

3. სააგენტოს მიერ შედგენილ შეფასების დოკუმენტში არსებულ ინფორმაციას დაწესებულება გადაიტანს არასრულწლოვანი მსჯავრდებულის ინდივიდუალური შეფასების ფორმაში, რომელიც წარედგინება საქართველოს სასჯელაღსრულებისა და პრობაციის სამინისტროს ადგილობრივ საბჭოს.

4. საქართველოს სისხლის სამართლის კოდექსის 50-ე მუხლის მე-5 ნაწილით განსაზღვრული წესით დანიშნული სასჯელის შემთხვევაში – სასჯელის სახით დანიშნული თავისუფლების აღკვეთის ვადის დასრულებამდე არაუგვიანეს 3 თვისა, არასრულწლოვანი მსჯავრდებულის კანონიერი წარმომადგენლის წერილობითი თანხმობით (დანართი №2), დაწესებულება ვალდებულია წერილობით მიმართოს (დანართი №3) პრობაციის შესაბამის ბიუროს (არასრულწლოვანი მსჯავრდებულის საცხოვრებელი ადგილის მიხედვით), არასრულწლოვანი მსჯავრდებულის ოჯახისა და სოციალური გარემოს რისკებისა და საჭიროებების შეფასების თაობაზე (გარდა იმ შემთხვევისა, როდესაც არასრულწლოვანი მსჯავრდებულის გათავისუფლება ხდება პატიმრობის კოდექსის 37-ე მუხლის პირველი ნაწილის ,,ბ“-,,ზ“ ქვეპუნქტების შესაბამისად).

5. ამ მუხლის მე-4 პუნქტით გათვალისწინებულ შემთხვევაში, დაწესებულების მომართვას თან ერთვის არასრულწლოვანი მსჯავრდებულის კანონიერი წარმომადგენლის თანხმობის (დანართი №4) შემთხვევაში – არასრულწლოვანი მსჯავრდებულის ჯანმრთელობის მდგომარეობის შესახებ სამედიცინო (სტაციონარული ან/და ამბულატორიული) ცნობა – ფორმა №IV – 100^ა და ამონაწერი (დანართი №5) არასრულწლოვანი მსჯავრდებულის სასჯელის აღსრულების ინდივიდუალური დაგეგმარების დოკუმენტიდან/პირადი საქმიდან, რომელშიც აღინიშნება:

ა) დაწესებულებიდან არასრულწლოვანი მსჯავრდებულის შესახებ ინფორმაციის გაცემის საფუძველი;

ბ) არასრულწლოვანი მსჯავრდებულის სახელი, გვარი, დაბადების თარიღი და პირადი ნომერი (არსებობის შემთხვევაში);

გ)  დაწესებულების დასახელება, სადაც არასრულწლოვანი მსჯავრდებული იხდის სასჯელს;

დ) არასრულწლოვანი მსჯავრდებულის დაწესებულებაში განთავსების თარიღი;

ე) სასჯელის მოხდის დასრულების თარიღი;

ვ) დაწესებულებაში არასრულწლოვან მსჯავრდებულთან მომუშავე სოციალური მუშაკის სახელი და გვარი;

ზ) დაწესებულების საკონტაქტო მონაცემები;

თ) არასრულწლოვანი მსჯავრდებულისათვის დაწესებულებაში ჩატარებული სარეაბილიტაციო მომსახურება;

ი) არასრულწლოვანი მსჯავრდებულის დამოკიდებულება დანაშაულთან მიმართებაში;

კ) საკუთარი თავისადმი ან/და სხვა პირისადმი ზიანის რისკის შეფასება;

ლ) გათავისუფლების შემდგომ არასრულწლოვანი მსჯავრდებულის გეგმები და მოლოდინები;

მ) არასრულწლოვანი მსჯავრდებულის ინტერესები.

6. არასრულწლოვანი მსჯავრდებულის პირობით ვადამდე გათავისუფლების ან/და დანიშნული სასჯელის მოუხდელი ნაწილის უფრო მსუბუქი სახის სასჯელით შეცვლის შემთხვევაში, დაწესებულება ვალდებულია პრობაციის ბიუროში (საცხოვრებელი ადგილის მიხედვით) გადააგზავნოს ამ მუხლის მე-5 პუნქტით გათვალისწინებული ამონაწერი, არასრულწლოვანი მსჯავრდებულის გათავისუფლებიდან არაუგვიანეს 2 სამუშაო დღისა.

მუხლი 3. გათავისუფლებისთვის მომზადების პროცესში სააგენტოსა და პრობაციის ბიუროს მოვალეობები

1. დაწესებულებიდან სააგენტოს სარეაბილიტაციო პროგრამების სამმართველოში მიმართვის შესვლის შემდეგ, სარეაბილიტაციო პროგრამების სამმართველოს უფროსი მიმართვას გადასცემს სოციალურ მუშაკს, რომელიც ვალდებულია არასრულწლოვანი მსჯავრდებულის ოჯახსა და სოციალურ გარემოში არსებული რისკ-ფაქტორების შეფასებისა და საჭიროებების განსაზღვრის მიზნით, არასრულწლოვანი მსჯავრდებულის ოჯახში განახორციელოს მინიმუმ 1 ვიზიტი.

2. სააგენტოს სოციალური მუშაკი არასრულწლოვანი მსჯავრდებულის ოჯახისა და სოციალური გარემოს რისკის შეფასებასა და საჭიროებების განსაზღვრას ახორციელებს დადგენილი ფორმის (დანართი №6) მიხედვით.

3. სააგენტოს სოციალური მუშაკი ოჯახის შეფასების დაწყებამდე, არასრულწლოვანი მსჯავრდებულის ოჯახს აცნობს შეფასების მიზანს, განუმარტავს მსჯავრდებულის დაწესებულებიდან გათავისუფლებამდე ოჯახში არსებული მდგომარეობის ცვლილებასთან დაკავშირებით სოციალური მუშაკისთვის შეტყობინების აუცილებლობას, რის თაობაზეც ფორმდება ურთიერთთანამშრომლობის შესახებ შეთანხმება (დანართი №7). შეთანხმებას ხელს აწერს სოციალური მუშაკი, მსჯავრდებულის კანონიერი წარმომადგენელი/ოჯახის სრულწლოვანი წევრი და დამსწრე პირი (ასეთის არსებობის შემთხვევაში).

4. შეფასების დასრულების შემდეგ მსჯავრდებულის ოჯახისა და სოციალური გარემოს რისკების შეფასებისა და საჭიროებების განსაზღვრის დოკუმენტი იგზავნება შესაბამის დაწესებულებაში.

5. ამ წესის მე-2 მუხლის მე-4 პუნქტით გათვალისწინებულ მიმართვას პრობაციის ბიუროს უფროსი გადასცემს პრობაციის ოფიცერს, რომელიც არასრულწლოვანი მსჯავრდებულის ოჯახისა და სოციალური გარემოს შეფასების მიზნით, მუშაობის პროცესში ჩართავს სააგენტოს შესაბამის სოციალურ მუშაკს, რომელიც შეფასებისას (დანართი №6) ძირითად აქცენტს აკეთებს  შემდეგ საკითხებზე:

ა)  ოჯახის  სოციალური გარემოს მზაობა არასრულწლოვანი მსჯავრდებულის  დაბრუნების მიმართ;

ბ) ოჯახის წევრთა დამოკიდებულება არასრულწლოვანი მსჯავრდებულის მიერ ჩადენილი დანაშაულის მიმართ;

გ) გათავისუფლების შემდეგ არასრულწლოვანი მსჯავრდებულის თავშესაფრის არსებობა;

დ)  არასრულწლოვან მსჯავრდებულზე დამოკიდებული პირების საჭიროებები;

ე) გათავისუფლების შემდეგ არასრულწლოვანი მსჯავრდებულის და/ან მისი ოჯახის წევრების სავარაუდო შემოსავლის წყარო;

ვ) სარეაბილიტაციო მომსახურებების რესურსები და მათი ხელმისაწვდომობა გათავისუფლების შემდეგ.

6. სააგენტოს სოციალური მუშაკი მსჯავრდებულის ოჯახისა და სოციალური გარემოს შეფასების შესახებ ინფორმაციას უგზავნის საქმის მწარომებელ პრობაციის ოფიცერს.

7.  ამ მუხლის მე-5 პუნქტით გათვალისწინებული შეფასების მიზანს წარმოადგენს  მსჯავრდებულის  რეინტეგრაციისათვის ოჯახის მომზადება.

_________________________________                                                  ,,____”  _____________20__წ.

                (შედგენის ადგილი)                                                                              (შედგენის თარიღი) 

პენიტენციურ დაწესებულებაში (დაწესებულების დასახელება) ___________________________ მყოფი არასრულწლოვანი მსჯავრდებულის (სახელი, გვარი, პირადი №) ___________________________________________ კანონიერი წარმომადგენელი (სახელი, გვარი) _____________________________________________ თანახმა ვარ, მსჯავრდებულის (სახელი, გვარი) ________________________________ოჯახისა და სოციალური გარემოს შეფასება განახორციელოს სსიპ –  არასაპატიმრო სასჯელთა აღსრულებისა და პრობაციის ეროვნული სააგენტოს შესაბამისმა თანამშრომელმა.

_______________________________

მსჯავრდებულის კანონიერი

წარმომადგენლის ხელმოწერა

_________________________________                                                         ,,____”  _____________20__წ.

(შეთანხმების შედგენის ადგილი)                                                                              (შედგენის თარიღი)         

შეთანხმება დგება, ერთი მხრივ, პენიტენციურ დაწესებულებაში (დაწესებულების დასახელება) _______________________________ მყოფი არასრულწლოვანი მსჯავრდებულს  (სახელი, გვარი, პირადი №) _____________________________________________ კანონიერ წარმომადგენელს (სახელი, გვარი) ___________________________________ და, მეორე მხრივ, პენიტენციური დაწესებულების ექიმს (სახელი, გვარი) ____________________________ შორის  მასზედ, რომ  მსჯავრდებული და მისი კანონიერი წარმომადგენელი ინფორმირებულია იმის თაობაზე, რომ შესაძლებელია პენიტენციური დაწესებულების დატოვების შემთხვევაში, მისი ჯანმრთელობის მდგომარეობის შესახებ ინფორმაცია მიეწოდოს სსიპ –  არასაპატიმრო სასჯელთა აღსრულებისა და პრობაციის ეროვნული სააგენტოს უფლებამოსილ თანამშრომელს სახელმწიფოში არსებული ჯანმრთელობის დაცვის პროგრამებისა და მკურნალობის  შესახებ საჭირო და დროული მომსახურების  მიღების შესაძლებლობების გაზრდის მიზნით.  

შეთანხმება არ გულისხმობს მსჯავრდებულის სამედიცინო საჭიროებების  გარანტირებულ დაკმაყოფილებას.

შეთანხმება შედგენილია პენიტენციური დაწესებულების ექიმის მიერ, 20__ წლის  ___/______ ___ საათზე და ___ წუთზე შეთანხმების ადგილზე და სწორია, რასაც ვადასტურებთ ხელმოწერით

შეთანხმების ფორმა

_________________________________                                                  ,,____”  _____________20__წ.

   (შეთანხმების შედგენის ადგილი)                                                                     (შედგენის თარიღი)         

შეთანხმება დგება  პენიტენციურ დაწესებულებაში (დაწესებულების დასახელება)------------------------------------ მყოფი არასრულწლოვანი მსჯავრდებულის (სახელი, გვარი) ---------------------------------------------------კანონიერ წარმომადგენელს/ოჯახის სრულწლოვან ქმედუნარიან წევრსა (სახელი, გვარი) ------------------------------------------------ და სსიპ –  არასაპატიმრო სასჯელთა აღსრულებისა და პრობაციის ეროვნული სააგენტოს სოციალურ მუშაკს/პრობაციის ოფიცერს (სახელი, გვარი) -------------------------------------------------- შორის, მასზედ, რომ მსჯავრდებულის კანონიერი წარმომადგენელი ინფორმირებულია სოციალური მუშაკის ოჯახში ვიზიტის შესახებ, ასევე ინფორმირებულია ოჯახის შეფასების მიზნისა და საჭიროების შესახებ.

ოჯახის შეფასების მიზანია სოციალური მუშაკის მიერ მსჯავრდებულის ოჯახის რისკებისა და საჭიროებების შესწავლა პირობით ვადამდე გათავისუფლების/დანიშნული სასჯელის მოუხდელი ნაწილის უფრო მსუბუქი სახის საჯელით შეცვლის საკითხის განხილვაზე დასკვნის მოსამზადებლად, რაც არ გულისხმობს მსჯავრდებულის პირობით ვადამდე გათავისუფლების ან/და დანიშნული სასჯელის მოუხდელი ნაწილის უფრო მსუბუქი სახის სასჯელით შეცვლის  მოთხოვნის გარანტირებულ დაკმაყოფილებას.

თავის მხრივ პენიტენციურ დაწესებულებაში მყოფი არასრულწლოვანი მსჯავრდებულის კანონიერი წარმომადგენელი/ოჯახის სრულწლოვანი ქმედუნარიანი წევრი ვალდებულია ინფორმაცია მიაწოდოს სოციალურ მუშაკს/პრობაციის ოფიცერს მსჯავრდებულის ოჯახში განხორციელებული ცვლილებების შესახებ შეფასების დასრულებიდან 6 თვის განმავლობაში, რის საფუძველზეც მოხდება სოციალური მუშაკის/პრობაციის ოფიცრის მიერ დამატებითი ვიზიტის განხორციელება და საჭიროებისამებრ ხელახალი შეფასება.

შეთანხმება  შედგენილია ჩემს მიერ, სოციალური მუშაკის/პრობაციის ოფიცრის (სახელი, გვარი) -----------------------------------------------------)  20__ წლის  ___ ______ ___ სთ. და ___ წთ-ზე შეთანხმების ადგილზე და სწორია, რასაც ვადასტურებთ ხელმოწერით

სოციალური მუშაკი/პრობაციის ოფიცერი                                                      ხელმოწერა

 _________________                                                                                          _________________

მსჯავრდებულის კანონიერი წარმომადგენელი/                                             ხელმოწერა

ოჯახის სრულწლოვანი წევრი

 _________________                                                                                             _________________

დამსწრე პირის სახელი, გვარი                                                                             ხელმოწერა

_________________                                                                                               _________________