ორსულობის ხელოვნური შეწყვეტის განხორციელების წესების დამტკიცების თაობაზე

დებულება

ორსულობის ხელოვნური შეწყვეტის თაობაზე

1. წინამდებარე დებულება განსაზღვრავს ორსულობის ხელოვნური შეწყვეტის (აბორტი) ჩატარებასთან დაკავშირებულ ღონისძიებებს სამეანო-გინეკოლოგიური პროფილის მომსახურების მიმწოდებელ სამედიცინო დაწესებულებებში.

2. ორსულობის ხელოვნური შეწყვეტა ხორციელდება:

ა)  ნებაყოფილებით (ქალის მოთხოვნის საფუძველზე) ორსულობის 12 კვირამდე (ჩათვლით);

ბ) სამედიცინო და სოციალური ჩვენებების შესაბამისად ორსულობის 12-დან  22 კვირამდე.

3. 12 კვირამდე (ჩათვლით) ვადის ორსულობის ნებაყოფლობითი შეწყვეტა ნებადართულია, თუ ორსულს სამედიცინო დაწესებულებაში ჩაუტარდა წინასწარი გასაუბრება - აბორტისწინა კონსულტაცია ექიმი მეან-გინეკოლოგის მიერ და გასაუბრებიდან სამედიცინო ჩარევამდე გასულია 5-დღიანი მოსაფიქრებელი ვადა. გამონაკლისი შესაძლებელია დაშვებულ იქნეს ორსულობის მე-12 კვირაზე მიმართვისას, როდესაც კანონმდებლობით განსაზღვრული მოსაფიქრებელი პერიოდის შემდეგ იწურება ლეგალური აბორტის ვადა, რაც განაპირობებს სერვისის მიწოდების შეზღუდვას. ამ შემთხვევაში მოსაფიქრებელი პერიოდი შესაძლებელია შემცირდეს არანაკლებ 3 დღემდე.

4. სამედიცინო დაწესებულებაში ექიმი მეან-გინეკოლოგის მიერ ორსულობის ხელოვნური შეწყვეტის მიზნით, სამედიცინო ჩარევამდე და მის შემდეგ, უნდა განხორციელდეს ქალის კონსულტირება ოჯახის დაგეგმვის საკითხებთან დაკავშირებით.

5. 10 კვირამდე ვადის ორსულობისას მედიკამენტური აბორტის განხორციელება შესაძლებელია სამეანო-გინეკოლოგიური საქმიანობის განხორციელების უფლების მქონე ამბულატორიული და სტაციონარული ტიპის სამედიცინო დაწესებულებაში სერტიფიცირებული ექიმ მეან-გინეკოლოგის მიერ,  საჭიროების შემთხვევაში, ადეკვატური და დროული რეფერალის უზრუნველყოფის პირობით.

6. 7 კვირამდე (ჩათვლით) ხანგრძლივობის ორსულობის ხელოვნური შეწყვეტა ქირურგიული მეთოდით (მანუალური ან ელექტრული ვაკუუმ-ასპირაცია) შესაძლებელია განხორციელდეს, როგორც ამბულატორიული, ისე სტაციონარული ტიპის სამეანო-გინეკოლოგიური საქმიანობის განხორციელების უფლების მქონე სამედიცინო დაწესებულებაში სერტიფიცირებული ექიმ მეან-გინეკოლოგის მიერ, საჭიროების შემთხვევაში, ადეკვატური და დროული რეფერალის უზრუნველყოფის პირობით.

7. 7 კვირაზე მეტი ხანგრძლივობის ორსულობის ხელოვნური შეწყვეტა ქირურგიული მეთოდით შესაძლებელია განხორციელდეს სერტიფიცირებული ექიმი მეან-გინეკოლოგის მიერ სტაციონარული ტიპის სამედიცინო დაწესებულებაში, რომელსაც აქვს სამეანო-გინეკოლოგიური საქმიანობის განხორციელების უფლება.

8. 12 კვირაზე მეტი ხანგრძლივობის ორსულობის ხელოვნური შეწყვეტის მიზნით,  ნებისმიერი მეთოდით სამედიცინო ჩარევა ხორციელდება მხოლოდ სამეანო-გინეკოლოგიური საქმიანობის განხორციელების უფლების მქონე სტაციონარული ტიპის სამედიცინო დაწესებულებაში სერტიფიცირებული ექიმი მეან-გინეკოლოგის მიერ. 

9. 12 კვირამდე ორსულობის ხელოვნური შეწყვეტის მიზნით სამედიცინო დაწესებულებაში ქალის ყველა ვიზიტი უნდა დაფიქსირდეს ,,ამბულატორიული სამედიცინო დოკუმენტაციის წარმოების წესის დამტკიცების შესახებ” საქართველოს შრომის, ჯანმრთელობისა და სოციალური დაცვის მინისტრის 2011 წლის 15 აგვისტოს №01-41/ნ ბრძანებით (შემდგომში - საქართველოს შრომის, ჯანმრთელობისა და სოციალური დაცვის მინისტრის 2011 წლის 15 აგვისტოს №01-41/ნ ბრძანება) განსაზღვრულ ,,ამბულატორიული პაციენტის ვიზიტების და ბინაზე/ადგილზე გამოძახების რეგისტრაციის ჟურნალში”, ან ,,სამედიცინო დაწესებულებებში სტაციონარული სამედიცინო დოკუმენტაციის წარმოების წესის დამტკიცების შესახებ“ საქართველოს შრომის, ჯანმრთელობისა და სოციალური დაცვის მინისტრის 2009 წლის 19 მარტის №108/ნ ბრძანებით (შემდგომში - საქართველოს შრომის, ჯანმრთელობისა და სოციალური დაცვის მინისტრის 2009 წლის 19 მარტის  №108/ნ ბრძანება) განსაზღვრულ ,,სტაციონარში პაციენტთა მიღების და გაწერის რეგისტრაციის ჟურნალში“ (სადაც, ასევე, ფიქსირდება ვიზიტის მიზანი, მათ შორის, ,,აბორტისწინა კონსულტაცია“, ,,აბორტი”).

10. უშუალოდ ორსულობის ხელოვნური შეწყვეტის წინ მიღებული უნდა იქნეს ქალის წერილობითი ინფორმირებული თანხმობა (№2.1 ან №2.2 დანართების შესაბამისად). ორსულობის შეწყვეტის მიზნით ნებისმიერი ჩარევა უნდა დაფიქსირდეს  საქართველოს შრომის, ჯანმრთელობისა და სოციალური დაცვის მინისტრის 2011 წლის 15 აგვისტოს №01-41/ნ ბრძანების დანართი №1-ით განსაზღვრულ ,,ამბულატორიული პაციენტის სამედიცინო ბარათში“  (სამედიცინო დოკუმენტაცია ფორმა IV-№200/ა), ამავე ბრძანების  დანართი №8-ით განსაზღვრულ „სამედიცინო ჩარევის ოქმში“ (სამედიცინო დოკუმენტაცია ფორმა №IV-200–7/ა) ან საქართველოს შრომის, ჯანმრთელობისა და სოციალური დაცვის მინისტრის 2009 წლის 19 მარტის №108/ნ ბრძანების დანართი №1-ით განსაზღვრულ ,,სტაციონარული პაციენტის სამედიცინო ბარათში“ (სამედიცინო დოკუმენტაცია ფორმა №IV-300/ა).

11. ორსულობის ხელოვნური შეწყვეტის მიზნით, არასრულწლოვანი პაციენტის სამედიცინო მომსახურების პირობები  განისაზღვრება ,,პაციენტის უფლებების შესახებ“ საქართველოს კანონის მე-40 და 41-ე მუხლების მოთხოვნათა დაცვით.

12. ორსულობის ხელოვნური შეწყვეტის მიზნით სამედიცინო ჩარევა უნდა განხორციელდეს საქართველოს შრომის, ჯანმრთელობისა და სოციალური დაცვის მინისტრის ბრძანებით დამტკიცებული ,,ორსულობის უსაფრთხო შეწყვეტის პროტოკოლის“ რეკომენდაციების გათვალისწინებით.

13. ორსულობის ხელოვნური შეწყვეტის მიზნით სამედიცინო ჩარევისას უპირატესობა ენიჭება ნაკლებად დამაზიანებელ (ვაკუუმ-ასპირაცია) და ნაკლებად ინვაზიურ (მედიკამენტური აბორტი) მეთოდებს. სამედიცინო ჩარევის მეთოდის არჩევისას საბოლოო გადაწყვეტილებას იღებს პაციენტი, მას შემდეგ, რაც მას სრულყოფილად მიეწოდება ინფორმაცია ყველა შესაძლო მეთოდის შესახებ უპირატესობებისა და რისკების მითითებით.

14. დაუშვებელია სქესის შერჩევის მიზნით ორსულობის ხელოვნური შეწყვეტა გარდა იმ შემთხვევებისა, როცა აუცილებელია სქესთან შეჭიდული მემკვიდრეობითი დაავადების თავიდან აცილება.

დანართი №2

აბორტისწინა კონსულტაციის/წინასწარი გასაუბრების წესი

1. აბორტისწინა კონსულტაცია/გასაუბრება ტარდება (შემდგომში - აბორტისწინა კონსულტირება) ექიმი მეან-გინეკოლოგის მიერ, კონფიდენციალურ პირობებში, სპეციალურად ამ მიზნისათვის გამოყოფილ ექიმის საკონსულტაციო ოთახში.

2. აბორტისწინა კონსულტირების მიზანია:

ა) ინფორმაციის მიწოდება ქალისთვის გასაგებ ენაზე, არჩევანის გააზრებაში დახმარებისა და ზეწოლისგან თავისუფალი გადაწყვეტილების მიღების უზრუნველსაყოფად;

ბ) ორსულობის დადასტურება, ორსულობის საშვილოსნოსშიდა მდებარეობისა და გესტაციური პერიოდის განსაზღვრა;

გ) ქალის შესაძლო/არსებულ დაავადებათა იდენტიფიცირება, რომლებიც საჭიროებენ მართვას ან გავლენას ახდენენ აბორტის მეთოდის შერჩევაზე;

დ) ინფორმირება აბორტის შემდგომი კონტრაცეფციის შესახებ.

3. აბორტისწინა კონსულტირება შედგება შემდეგი ნაწილებისგან:

ა) გასაუბრება და ინფორმირება;

ბ) ანამნეზი და ფიზიკალური გამოკვლევა;

გ) ლაბორატორიული და სხვა სახის გამოკვლევები (საჭიროების მიხედვით);

დ) ოჯახის დაგეგმვა.

4. გასაუბრება ინტერაქტიული პროცესია, რომელიც მოიცავს პაციენტის მხარდაჭერას, მისთვის დამატებითი ინფორმაციის მიწოდებასა და პროფესიონალის დახმარებას აზრების, აღქმის ურთიერთგაზიარებისა და თანაგრძნობის გზით. ამ დროს აუცილებელია:

ა) ინფორმაციის მიწოდება მარტივი, გასაგები ენით;

ბ) კონფიდენციალობის დაცვის უზრუნველყოფა;

გ) მხარდაჭერა ქალის საჭიროებების მიხედვით;

დ) გასაუბრება პაციენტთან პირადი შეხედულებებისა და ღირებულებების გამოხატვის გარეშე.

5. ინფორმირება სამედიცინო მომსახურების მნიშვნელოვანი კომპონენტია. აბორტის წინ ქალს აუცილებლად უნდა მიეწოდოს ინფორმაცია შემდეგ საკითხებზე:

ა) აბორტის მეთოდებსა და ტკივილის მართვის არჩევანზე;

 ბ) აბორტის წინ, აბორტის დროს და აბორტის შემდგომ პერიოდში ჩასატარებელი პროცედურების შესახებ, სხვადასხვა გამოკვლევების ჩათვლით;

გ) აბორტის თაობაზე (პროცედურის ხანგრძლივობა,  შესაძლო გვერდითი მოვლენები, მაგ: სისხლდენა, ტკვილი და ა.შ);

დ) როგორ უნდა ამოიცნოს შესაძლო გართულებები და სად მიმართოს დახმარებისთვის;

ე) როდის შეძლებს დაუბრუნდეს ჩვეულებრივ მდგომარეობას, სქესობრივი აქტის ჩათვლით;

ვ) მეთვალყურეობა,  არასასურველი ორსულობის პრევენციის ჩათვლით.

6. აბორტისწინა კონსულტაციის დაფიქსირება სამედიცინო დოკუმენტაციაში ხორციელდება ამ ბრძანებით დამტკიცებული დანართი №1-ის მე-9 პუნქტის შესაბამისად. ამასთან, აუცილებელია დოკუმენტაციაში კონსულტაციის ამსახველ  ჩანაწერთან ერთად დაფიქსირდეს განმეორებითი ვიზიტის თარიღიც (5-დღიანი ან გამონაკლის შემთხვევაში, 3-დღიანი მოსაფიქრებელი პერიოდის გათვალისწინებით).

7. აბორტისწინა კონსულტაციის დროს პაციენტი უნდა გაეცნოს საინფორმაციო მასალას - ,,აბორტის პროცედურა“ - აბორტის პროტოკოლის პაციენტის ვერსიას.

8. კონსულტირების დროს ექიმის მიერ უნდა შეფასდეს ორსულობის შეწყვეტის თაობაზე ქალის გადაწყვეტილების დამოუკიდებლობისა და ზეწოლისგან თავისუფლების საკითხი. იმ შემთხვევაში, თუ სამედიცინო პერსონალმა იცის, ან გაუჩნდა ეჭვი ქალის მიმართ სექსუალური, ან სხვა ტიპის ძალადობის  შესახებ, უნდა შესთავაზონ გადამისამართება კონსულტირების და მკურნალობის სერვისების სხვა მიმწოდებლებთან საჭიროების მიხედვით.

9. აბორტისწინა კონსულტირების დროს, თუ ქალმა გადაიფიქრა აბორტის გაკეთება, ექიმი ვალდებულია მიაწოდოს მას ინფორმაცია ანტენატალური მეთვალყურეობის სერვისების ხელმისაწვდომობის შესახებ და დაუყოვნებლივ გადაამისამართოს ამავე, ან სხვა, პაციენტისათვის მისაღებ, დაწესებულებაში ანტენატალური მეთვალყურეობის სერვისის მისაღებად.

10. ორსულობის შეწყვეტის თაობაზე გადაწყვეტილების მისაღებად ქალს უნდა მიეცეს იმდენი დრო, რამდენიც ესაჭიროება, მაგრამ არანაკლებ კანონმდებლობით დადგენილისა, თუნდაც ეს ითვალისწინებდეს კლინიკაში მის ხელახლა მობრუნებას დროის გარკვეული ინტერვალის შემდეგ. თუმცა, აუცილებელია აიხსნას აგრეთვე აბორტის ადრეულ გესტაციურ ასაკში გაკეთების უპირატესობა მისი მეტი უსაფრთხოების თვალსაზრისით, გვიანდელ ასაკთან შედარებით.

11. აბორტის შესახებ არჩევანის გაკეთების შემდეგ ქალს უნდა მიეწოდოს ინფორმაცია მასთან დაკავშირებული ყველა საკანონმდებლო მოთხოვნის შესახებ (მოსაფიქრებელი პერიოდის, ინფორმირებული თანხმობის და სხვა).

დანართი №2.1

ინფორმირებული თანხმობა ორსულობის ხელოვნური შეწყვეტის მიზნით ქირურგიული აბორტის სამედიცინო მომსახურებაზე

წაიკითხეთ ყურადღებით!

მე   ___________________________                     დაბადებული ---------  წელს, 

               (სახელი, გვარი)

მივმართე    -------------------------------- ------------------ სამედიცინო დაწესებულებას.

მე ინფორმირებული ვარ, ექიმის მიერ, ჩემი ორსულობის ვადაზე და ორსულობის ხელოვნური შეწყვეტის მიზნით დაგეგმილი მაქვს  ქირურგიული აბორტის  გაკეთება.

მე ინფორმირებული ვარ აბორტის უარყოფით მორალურ-ეთიკური მხარეების თაობაზე.

პირადად ექიმმა განმიმარტა ოპერაციის მიზანი და არსი.

მე გაფრთხილებული ვარ ოპერაციის შესაძლო უარყოფით შედეგებსა და გართულებებზე, მათ შორის:

საშვილოსნოსა და საშოს მექანიკური ტრავმა, სისხლდენა, სისხლის შედედების მოშლა, სანაყოფე ქსოვილების ჩარჩენა, ჰემატომეტრის (საშვილოსნოს ღრუში   სისხლის დაგროვება) არსებობა, ანთებითი დაავადებები, ემბოლია, ნარკოზის უარყოფითი შედეგები და ა.შ.

მე გაფრთხილებული ვარ გვერდით ეფექტებზე, მათ შორის: ტემპერატურის მომატება და შემცივნება, ტკივილი მუცლის ქვედა მიდამოში.

მე ინფორმირებული ვარ შემდგომში არასასურველი ორსულობის თავიდან აცილების მიზანშეწონილი საშუალებებისა და მეთოდების შესახებ.

მე თანახმა ვარ, რომ ჩემი ორსულობის შეწყვეტის მიზნით სამედიცინო ჩარევა განახორციელოს ექიმმა  --------------------------------------

 (სახელი, გვარი)                                                      

მე ინფორმირებული ვარ რისკის ხარისხზე, რაც დაკავშირებულია ოპერაციული ჩარევის მოცულობასთან, სასიკვდილო გამოსავლის ჩათვლით, ასევე ინფორმირებული ვარ აბორტის შედეგად დედათა სიკვდილობის სტატისტიკაზე საქართველოსა და მსოფლიოში.

მე გაფრთხილებული ვარ  ოპერაციის შემდგომ რეჟიმსა  და მისი დარღვევის შესაძლო შედეგებზე, ასევე ტკივილის შესაძლო შეგრძნებებზე.

მე მქონდა საკმარისი დრო ინფორმაციის მისაღებად, მოფიქრებისა და გადაწყვეტილების მისაღებად.

მე წავიკითხე და გავიგე, როგორც  ზემოაღნიშნული, ისე ჩემთვის საჭირო  ყველა ინფორმაცია და  თანხმა ვარ  ორსულობის ხელოვნური შეწყვეტის მიზნით სამედიცინო  ჩარევაზე.

პაციენტის/კანონიერი წარმომადგენლის ხელმოწერა ___________________

ექიმის ხელმოწერა _______________________

თარიღი   _______________

ან

მე წავიკითხე და გავიგე, როგორც  ზემოაღნიშნული, ისე ჩემთვის საჭირო  ყველა ინფორმაცია და  უარს ვამბობ  ორსულობის ხელოვნური შეწყვეტის მიზნით სამედიცინო ჩარევაზე.

პაციენტის/კანონიერი წარმომადგენლის ხელმოწერა ___________________

თარიღი   _______________

დანართი №2. 2

ინფორმირებული თანხმობა ორსულობის ხელოვნური შეწყვეტის მიზნით მედიკამენტური აბორტის სამედიცინო მომსახურებაზე

წაიკითხეთ ყურადღებით!

მე   ___________________________              დაბადებული ---------  წელს, 

               (სახელი, გვარი)

მივმართე    -------------------------------- ------------------ სამედიცინო დაწესებულებას.

მე ინფორმირებული ვარ, ექიმის მიერ, ჩემი ორსულობის ვადაზე და დაგეგმილი მაქვს  მედიკამენტური აბორტის საშუალებით ორსულობის ხელოვნური შეწყვეტა.

მე ინფორმირებული ვარ აბორტის უარყოფით მორალურ-ეთიკური მხარეების თაობაზე.

მე პირადად ექიმმა განმიმარტა სამედიცინო ჩარევის მიზანი და არსი.

მე მივიღე დაწვრილებითი ინფორმაცია მედიკამენტური აბორტის მიზნით მიფეპრისტონისა და მიზოპროსტოლის გამოყენების შესახებ. ჩემთვის ცნობილია, რომ მე მივიღებ პერორალურად 200 მგ მიფეპრისტონს სამედიცინო დაწესებულებაში (ან ჩემი სურვილის შემთხვევაში, რათა დავგეგმო სისხლდენის დაწყება, შემიძლია მივიღო სახლში) და 24-48 სთ-ის შემდეგ  უნდა მივიღო 400 მკგ ან 800 მკგ მიზოპროსტოლი (ან პერორალურად, ან ბუკალურად, ან სუბლინგვალურად, ან ვაგინალურად).

ჩემთვის ცნობილია რომ მედიკამენტური აბორტი არაეფექტურია 2-8 % შემთხვევაში და თან ახლავს (ტკივილი, სისხლდენა, გულისრევა, პირღებინება, თავის ტკივილი სისუტე, თავბრუსხვევა), ასევე გართულებები (პრეპარატებზე ალერგიული რეაქცია, ძლიერი სისხლდენა, სანაყოფე პარკის ნაწილების დარჩენა, ანთებითი დაავადებები, პროგრესირებადი ორსულობა). ინფორმირებული ვარ, რომ გართულებების თავიდან აცილების 100 %-იანი გარანტია არ არსებობს, თუმცა მათი სიხშირე დიდი არ არის და არ აღემატება 8%-ს.

მე გაფრთხილებული ვარ, რომ მედიკამენტური აბორტის შემდეგ, თუ ორსულობა გააგრძელებს პროგრესირებას რეკომენდებულია ქირურგიული მეთოდით ორსულობის შეწყვეტა, რადგანაც არსებობს მონაცემები ახალშობილის სხვადასხვა თანდაყოლილი მანკების განვითარების რისკის გაზრდის შესახებ. აგრეთვე გაფრთხილებული ვარ, რომ 12-14  დღის შემდეგ რეკომენდებულია გამოვცხადდე განმეორებით ვიზიტზე სამედიცინო დაწესებულებაში.

მე ინფორმირებული ვარ აგრეთვე აბორტის შემდგომ რეჟიმზე, მათ შორის სქესობრივი აქტივობის ჩათვლით, ასევე მისი დარღვევის შემთხვევაში შესაძლო შედეგებზე.

მე ინფორმირებული ვარ შემდგომში არასასურველი ორსულობის თავიდან აცილების მიზანშეწონილი საშუალებებისა და მეთოდების შესახებ.

მე ინფორმირებული ვარ, რომ თუ დამჭირდება გადაუდებელი სამედიცინო დახმარება, ან შემექმნება რაიმე სახის სამედიცინო პრობლემა შესაძლოა დავრეკო ტელეფონზე: -------------------- და მივმართო სამედიცინო დაწესებულებას.

მე მქონდა საკმარისი დრო ინფორმაციის მისაღებად, მოფიქრებისა და გადაწყვეტილების მისაღებად.

მე  -----------------------------  (გვარი, სახელი) წავიკითხე და გავიაზრე ზემოაღნიშნული ინფორმაცია, ასევე მივიღე პასუხები ჩემთვის საინტერესო ყველა საკითხზე და თანახმა ვარ ორსულობის ხელოვნური შეწყვეტის მიზნით მივიღო მედიკანმენტური აბორტის სამედიცინო მომსახურება.

პაციენტის/კანონიერი წარმომადგენლის ხელმოწერა  --------------------

ექიმის ხელმოწერა -----------------------------------

თარიღი  ---------------------------------

ან

მე  -----------------------------  (გვარი, სახელი) წავიკითხე და გავიაზრე ზემოაღნიშნული ინფორმაცია, ასევე მივიღე პასუხები ჩემთვის საინტერესო ყველა საკითხზე და უარს ვაცხადებ ორსულობის ხელოვნური შეწყვეტის მიზნით სამედიცინო მომსახურებაზე.

პაციენტის/კანონიერი წარმომადგენლის ხელმოწერა  --------------------

თარიღი  ---------------------------------

დანართი  №3

12 კვირაზე მეტი ხანგრძლივობის ორსულობის ხელოვნურად შეწყვეტის სამედიცინო ჩვენებების  ჩამონათვალი

1. წინამდებარე ჩამონათვალი განსაზღვრავს 12 კვირაზე მეტი ხანგრძლივობის ორსულობის ხელოვნური შეწყვეტის სამედიცინო ჩვენებებს. ორსულობის შეწყვეტის მიზნით გადაწყვეტილება მიიღება კომისიურად, თითოეული პაციენტის მდგომარეობის ინდივიდუალური განხილვის საფუძველზე ამ ბრძნებით დამტკიცებული დანართი №4-ით განსაზღვრული წესის შესაბამისად. ცხრილის ჩამონათვალის მიზანია განისაზღვროს ის მდგომარეობები, რომლებიც შეიძლება განხილულ იქნეს კომისიის მიერ.

2. ყველა სხვა შემთხვევაში, თუ ორსული ქალის დაავადება, რომელიც არ არის მინიშნებული ჩამონათვალში, ორსულობის გაგრძელების შემთხვევაში საფრთხეს უქმნის ქალის სიცოცხლეს, საკითხი ორსულობის შეწყვეტის შესახებ იხილება კომისიურად  (პაციენტისადმი ინდივიდუალური მიდგომით), მაღალი რისკის მქონე  სამედიცინო საქმიანობის განმახორციელებელ ამბულატორიულ ან შესაბამისი ნებართვის მქონე სტაციონარული ტიპის სამედიცინო დაწესებულებაში - კომისიური წესით, რომლის შემადგენლობა  განისაზღვრება №4 დანართის შესაბამისად. კომისიის სხდომა ფორმდება ოქმით. კომისიის მიერ მიღებული გადაწყვეტილება - სხდომის ოქმი ეგზავნება საქართველოს შრომის, ჯანმრთელობისა და სოციალური დაცვის მინისტრის ბრძანებით შექმნილ დედათა და ბავშვთა ჯანმრთელობის საკოორდინაციო საბჭოს.

დანართი  №4

სამედიცინო ჩვენებით 12 კვირაზე მეტი ხანგრძლივობის ორსულობის ხელოვნურად შეწყვეტის წესი

1.  სამედიცინო ჩვენებით, 12 კვირაზე მეტი ხანგრძლივობის ორსულობის ხელოვნურად შეწყვეტის ოპერაცია ნებადართულია ჩატარდეს ორსულობის ოცდაორ (22) კვირამდე.  22 კვირაზე მეტი ხანგრძლივობის ორსულობის შემთხვევაში, საკითხი ორსულობის შეწყვეტის (მშობიარობის) შესახებ იხილება საქართველოს შრომის, ჯანმრთელობისა და სოციალური დაცვის მინისტრის ბრძანებით შექმნილი დედათა და ბავშვთა ჯანმრთელობის დაცვის საკოორდინაციო საბჭოს მიერ (პაციენტისადმი ინდივიდუალური მიდგომით).

2. სამედიცინო ჩვენებით 12 კვირაზე მეტი ხანგრძლივობის ორსულობის შეწყვეტის შესახებ გადაწყვეტილების მიღება შესაძლებელია მაღალი რისკის მქონე სამედიცინო საქმიანობის განმახორციელებელ ამბულატორიულ ან შესაბამისი ნებართვის მქონე სტაციონარული ტიპის სამედიცინო დაწესებულებაში - კომისიური წესით, დაწესებულების კლინიკურ საქმიანობაზე პასუხისმგებელი ადმინისტრაციის წარმომადგენლის (კლინიკური დირექტორი), ექიმი მეან-გინეკოლოგის, იურისტისა და იმ სპეციალობის ექიმის მონაწილეობით (შეიძლება იყოს მოწვეული სპეციალისტი), რომლის საქმიანობის კომპეტენციასაც განეკუთვნება ორსულის ავადმყოფობა. კომისია იქმნება სამედიცინო  დაწესებულების  ხელმძღვანელის ბრძანებით. კომისიის სხდომა  ფორმდება ოქმით. 

3. 12 კვირაზე მეტი ხანგრძლივობის ორსულობის ხელოვნურად შეწყვეტის ოპერაცია უნდა ჩატარდეს მხოლოდ სტაციონარულ სამედიცინო დაწესებულებაში, რომელსაც აქვს სამეანო-გინეკოლოგიური პროფილის საქმიანობის განხორციელების უფლება.

4. სამედიცინო ჩვენებით 12 კვირაზე მეტი ხანგრძლივობის ორსულობის ხელოვნურად შეწყვეტის ოპერაციის ჩასატარებლად:

ა) ორსული წერილობითი განცხადებით მიმართავს სტაციონარის მთავარ ექიმს;

 ბ) უკვე დადგენილი დიაგნოზის შემთხვევაში, ორსული ქალი წერილობით განცხადებასთან ერთად, წარადგენს შესაბამისი პროფილის სამედიცინო დაწესებულების მიერ გაცემულ ჯანმრთელობის მდგომარეობის შესახებ ცნობას (ფორმა NIV-100/ა) 12 კვირაზე მეტი ხანგრძლივობის ორსულობის ხელოვნურად შეწყვეტის სამედიცინო ჩვენების (სრული დიაგნოზის) აღნიშვნით და ექოსკოპიურ დასკვნას - ორსულობის ვადის შესახებ;

გ) სტაციონარის კლინიკურ საქმიანობაზე პასუხისმგებელი ხელმძღვანელი პირი ექიმ მეან-გინეკოლოგთან და იურისტთან ერთად, განიხილავს ორსული ქალის წერილობით  განცხადებას, ჯანმრთელობის მდგომარეობის შესახებ ცნობას (ფორმა NIV-100/ა), ექოსკოპიურ დასკვნას  და იღებს გადაწყვეტილებას, რომელიც შესაბამისი ჩანაწერით, ფორმდება პაციენტის სამედიცინო ბარათში (ავადმყოფობის ისტორიაში) და მოწმდება კომისიის წევრთა ხელმოწერით;

დ) სამედიცინო ჩვენებით 12 კვირაზე მეტი ხანგრძლივობის ორსულობის ხელოვნურად შეწყვეტის ოპერაციის ჩატარების თაობაზე, დადგენილი წესით, ჩანაწერი კეთდება საქართველოს შრომის, ჯანმრთელობისა და სოციალური დაცვის მინისტრის 2009 წლის 19 მარტის  №108/ნ ბრძანებით განსაზღვრულ ,,სტაციონარში პაციენტთა მიღების და გაწერის რეგისტრაციის ჟურნალში“.

დანართი  №5

12 კვირაზე მეტი ხანგრძლივობის ორსულობის ხელოვნურად შეწყვეტის არასამედიცინო ჩვენებათა ჩამონათვალი

ორსულობის ხელოვნურად შეწყვეტის ჩვენებებს, რომელიც კავშირში არ არის სამედიცინო მდგომარეობასთან, წარმოადგენს:

ა) ორსულობა, სასამართლოს მიერ დადგენილი გაუპატიურების შედეგად;

 ბ) თუ ქალის ასაკი არ აღწევს 15 წელს;

გ) თუ ქალის ასაკი გადაცილებულია 49 წელს.

დანართი  №6

არასამედიცინო ჩვენებით ორსულობის ხელოვნურად შეწყვეტის წესი

1. ორსულობის შეწყვეტის საკითხი ზემოჩამოთვლილი ჩვენებებით წყდება სამედიცინო დაწესებულებაში კომისიურად დაწესებულების კლინიკურ საქმიანობაზე პასუხისმგებელი ადმინისტრაციის წარმომადგენლის (კლინიკური დირექტორი), ექიმი მეან-გინეკოლოგის და იურისტის მონაწილეობით. კომისიას ორსულმა ქალმა უნდა მიმართოს წერილობით და წარუდგინოს დასკვნა ორსულობის ვადის შესახებ (სამედიცინო დაწესებულების მიერ გაცემული ჯანმრთელობის მდგომარეობის შესახებ ცნობა (ფორმა NIV-100/ა) 2 მეან–გინეკოლოგისა და  ხელმძღვანელის მიერ ხელმოწერილი), ექოსკოპიის დასკვნა და შესაბამისი იურიდიული დოკუმენტები.

2. არსამედიცინო ჩვენებით ორსულობის ხელოვნურად შეწყვეტის ოპერაცია ნაწარმოები იქნეს მხოლოდ 22 კვირის ორსულობის ვადამდე.

3. იმ შემთხვევაში, თუ არსებობს არასამედიცინო ხასიათის ჩვენებები ორსულობის შეწყვეტისათვის, რომლებიც არ არის გათვალისწინებული წინამდებარე ბრძანებაში, ორსულობის შეწყვეტის საკითხს განიხილავს საქართველოს შრომის, ჯანმრთელობისა და სოციალური დაცვის მინისტრის ბრძნებით შექმნილი დედათა და ბავშვთა ჯანმრთელობის საკოორდინაციო საბჭო ინდივიდუალური წესით.