,,საქართველოს მიერ სხვა ქვეყნების ტექნიკური რეგლამენტების აღიარებისა და მოქმედების წესის შესახებ”

საქართველოს მთავრობის

დადგენილება №45

2006 წლის 24 თებერვალი

ქ. თბილისი

საქართველოს მიერ სხვა ქვეყნების ტექნიკური რეგლამენტების აღიარებისა და მოქმედების წესის შესახებ

,,პროდუქციისა და მომსახურების სერტიფიკაციის შესა­ხებ” საქართველოს კანონის მე-5 მუხლის მე-3 პუნქტის, 30-ე მუხლის მე-2 პუნქტისა და 31-ე მუხლის საფუძველზე:

1. აღიარებულ იქნეს ტექნიკურ რეგლამენტად და საქარ­თვე­ლოში მოქმედი სხვა ტექნიკური რეგლამენტების პარა­ლელურად სრულუფლებიანად იქნეს გამოყენებული ევროკავ­შირის, ეკონომიკური თანამშრომლობისა და განვითარების ორგანიზაციის წევრი და საქართველოს სავაჭრო ძირითადი პარტნიორი ქვეყნების (დანართი №1) პროდუქციისა და მომსახურების სფეროში მოქმედი ტექნიკური რეგულირების შემდეგი დოკუმენტების მხოლოდ ის ნაწილები და მოთხოვნები, რომლებიც ეხება პროდუქციის უსაფრთხოების უზრუნველმყოფ მახასიათებლებს და მიჩნეულია სავალდე­ბულოდ, კერძოდ:

ა) ,,ევროსაბჭოს ახალი და გლობალური მიდგომის დირექტივები” (The New Approach and  The Global Approach Directives), მათთან ჰარმონიზებული ევროპული ნორმები და ტექნიკური რეგულირების საერთაშორისო ნორმატიული აქტები და დოკუმენტები;

ბ) №1 დანართში მითითებული ქვეყნების ტექნიკური რეგულირების სფეროში მოქმედი დოკუმენტები, რომლებიც განსაზღვრავენ პროდუქციის მახასიათებლებს ან მასთან დაკავშირებულ პროცესებს და წარმოების მეთოდებს შესაბა­მისი ადმინისტრაციული დე-ბულებების ჩათვლით, რომელთა დაცვაც სავალდებულოა ამ ქვეყნებში.

2. პირველი პუნქტით განსაზღვრული დოკუმენტების პარალელურად გაგრძელდეს დამოუკიდებელ სახელმწიფოთა თანამეგობრობასთან და მის წევრ სახელმწიფოებთან უკვე დადებული საერთაშორისო ხელშეკრულებების საფუძველზე ტექნიკური რეგულირების სფეროში დღეს მოქმედი დოკუმენტების (,,გოსტები”, სამშენებლო ნორმები და წესები, სანიტარიული წესები და ნორმები და სხვ.) სრულუფლებიანი მოქმედება.

3. გარდამავალ ეტაპზე კონკრეტული პროდუქციის მიმართ შესაძლებელია მოქმედებდეს საქართველოში აღიარე­ბული სხვადასხვა ქვეყნის ან ქვეყანათა ჯგუფის რამდენიმე ალტერნატიული ტექნიკური რეგლამენტი. დასაშვებია სხვადასხვა მოქმედი ნორმებიდან სულ მცირე ერთ-ერთი მოთხოვნის შესაბამისი კონკრეტული პროდუქციის წარმოება და ბრუნვა ისე, რომ აუცილებელი არ არის საქართველოში მოქმედი ან აღიარებული სხვა ტექნიკური რეგლამენტების მოთხოვნების დაკმაყოფილება. მწარმოებელს შეუძლია პროდუქციის უსაფრთხოების სავალდებულო მახასიათებლების რაოდენობრივი ნორმები შეარჩიოს პირველი და მე-2 პუნქტებით აღიარებული და საქართველოში მოქმედი სხვა ტექნიკური რეგულირების დოკუმენტებიდან.

4. შესაბამისმა სამინისტროებმა და სახელმწიფო დაწესებულებებმა წარუდგინონ საქართველოს ეკონომიკური განვითარების სამინისტროს:

ა) საქართველოში მისაღები იმ ტექნიკური რეგლამე­ნტების ჩამონათვალი (შესაბამისი დასაბუთებით), რომელთა მიღებაც განპირობებულია განსაკუთრებული სპეციფიკურო­ბითა და აუცილებლობით და რომელთაც არ ითვალისწინებს ამ დადგენილების პირველი და მე-2 პუნქტებით განსაზღვრული დოკუმენტები (უმოკლეს ვადაში);

ბ) ტექნიკურ რეგულირებას დასაქვემდებარებელი პრო­დუქ­ციისა და მომსახურების ჯგუფების ნუსხა №2 დანართის მიხედვით, განმარტებით ბარათთან ერთად, რომელშიც დასაბუთებული უნდა იქნეს მოცემული პროდუქციისა და მომსახურების ჯგუფის ტექნიკური რეგულირებისადმი დაქვემდებარების აუცილებლობა შესაბამისი უსაფრთხოების უზრუნველმყოფი მახასიათებლების ჩამონათვალით (2 თვეში).

5. სსიპ – სტანდარტების, ტექნიკური რეგლამენტებისა და მეტროლოგიის ეროვნულმა სააგენტომ შესაბამის სამინის­ტროებსა და უწყებებს საჭიროების შემთხვევაში აღმოუჩინოს სათანადო საინფორმაციო-მეთოდური დახმარება.

6. ამ დადგენილების პირველი პუნქტით განსაზღვრული დებულებები არ ვრცელდება გლეხურ, ფერმერულ, ოჯახურ და კუსტარულ საქმიანობაზე, ასევე სამკურნალო საშუალე­ბების წარმოებასა და მათ ბრუნვასთან დაკავშირებულ ურთიერთობებზე.

7. დადგენილების №1 დანართში მოცემული ქვეყნების ნუსხის გადახედვა და განახლება განხორციელდეს წელიწადში ერთხელ მაინც.

8. დადგენილება ამოქმედდეს გამოქვეყნებისთანავე.

პრემიერ-მინისტრი                                                ზ. ნოღაიდელი

დანართი №1

დანართი №2

სეკ (CPA) – საქართველოს ეკონომიკური კლასიფიკატორი

სესსნ – საგარეო ეკონომიკური საქმიანობის სასაქონლო ნომენკლატურა