საქართველოს ადმინისტრაციულ სამართალდარღვევათა კოდექსის პროექტის შემმუშავებელი კომისიის შექმნის შესახებ

სახელმწიფო სარეგისტრაციო კოდი 010.220.020.11.106.005.681

საქართველოს იუსტიციის მინისტრის

ბრძანება №92

2003 წლის 13 თებერვალი

ქ. თბილისი

საქართველოს ადმინისტრაციულ სამართალდარღვევათა კოდექსის პროექტის შემმუშავებელი კომისიის შექმნის შესახებ

„ნორმატიული აქტების შესახებ” საქართველოს კანონის, „აღმასრულებელი ხელისუფლების სტრუქტურისა და საქმიანობის წესის შესახებ” საქართველოს კანონისა და „2003 წელს აღმასრულებელ ხელისუფლებაში კანონთა პროექტების მომზადების უზრუნველყოფისა და სამართალშემოქმედებითი საქმიანობის სრულყოფის ღონისძიებათა შესახებ” საქართველოს პრეზიდენტის 2003 წლის 7 თებერვლის №112 განკარგულების შესაბამისად:

1. შეიქმნას საქართველოს ადმინისტრაციულ სამართალდარღვევათა კოდექსის პროექტის შემმუშავებელი კომისია (ტექსტში შემდგომ – კომისია) შემდეგი შემადგენლობით:

– როლანდ გილიგაშვილი – საქართველოს იუსტიციის მინისტრი, კომისიის თავმჯდომარე;

– გია გეწაძე – „აირის საქართველოს” უფროსი იურიდიული მრჩეველი;

– ლალი გზირიშვილი – საქართველოს იუსტიციის სამინისტროს პარლამენტთან ურთიერთობისა და სამართალშემოქმედების დეპარტამენტის კერძო სამართლის სამმართველოს უფროსი, კომისიის მდივანი;

– გია გოგიბერიძე – საქართველოს იუსტიციის სამინისტროს პარლამენტთან ურთიერთობისა და სამართალშემოქმედების დეპარტამენტის უფროსი;

– ზურაბ დეკანოიძე – საქართველოს იუსტიციის სამინისტროს სამართლებრივი ექსპერტიზის დეპარტამენტის უფროსი;

– ზურაბ ეზუგბაია – საქართველოს იუსტიციის მინისტრის მოადგილე;

– ვალერიან ლორია – თბილისის ივ. ჯავახიშვილის სახელობის სახელმწიფო უნივერსიტეტის იურიდიული ფაკულტეტის სამართლის საფუძვლების კათედრის გამგე, იურიდიულ მეცნიერებათა დოქტორი, პროფესორი;

– დავით უსუფაშვილი – აშშ-ის საერთაშორისო განვითარების სააგენტოს კანონის უზენაესობის პროგრამის დირექტორის მოადგილე.

2. ეთხოვოს კომისიის მუშაობაში მონაწილეობის მიღება საქართველოს პარლამენტის წევრს ზურაბ ადეიშვილს.

3. კომისია უზრუნველყოფს:

ა) ადმინისტრაციულ სამართალდარღვევათა სამართლებრივი რეგლამენტაციის სფეროში მოქმედი საკანონმდებლო ბაზის ანალიზსა და მისი სრულყოფის თაობაზე წინადადებებისა და რეკომენდაციების შემუშავებას;

ბ) საქართველოს ადმინისტრაციულ სამართალდარღვევათა კოდექსის პროექტის შემუშავებას;

გ) საერთაშორისო სამართლის, საზღვარგარეთის ქვეყნებისა და საქართველოს მოქმედი კანონმდებლობის ანალიზისა და შეფასების საფუძველზე ადმინისტრაციულ სამართალდარღვევათა სამართლებრივი რეგლამენტაციის სფეროში კანონმდებლობის შემდგომი განვითარების ძირითადი მიმართულებების განსაზღვრას.

4. კომისია თავის ფუნქციებს ახორციელებს კომისიის სხდომაზე. მხოლოდ კომისიის სხდომაა უფლებამოსილი მიიღოს გადაწყვეტილება კომისიის სახელით.

5. კომისიის სხდომა უფლებამოსილია, თუ მას ესწრება კომისიის წევრთა ნახევარზე მეტი.

6. კომისიის სხდომების მოწვევის პერიოდულობას განსაზღვრავს კომისიის თავმჯდომარე.

7. კომისიის სხდომებს იწვევს და უძღვება კომისიის თავმჯდომარე.

8. კომისიის სხდომაზე გადაწყვეტილება მიიღება სხდომაზე დამსწრე კომისიის წევრთა უმრავლესობით, ღია ან ფარული კენჭისყრით.

9. კომისიის წევრთა განსხვავებული მოსაზრებები აისახება კომისიის სხდომის ოქმში და თან დაერთვის მას.

10. კომისიის სხდომის შედეგები აისახება კომისიის სხდომის ოქმში, რომლის წარმოებასაც უზრუნველყოფს კომისიის სამდივნო.

11. კომისიის სხდომის ოქმს ხელს აწერენ კომისიის სხდომის თავმჯდომარე და მდივანი.

12. კომისიის საქმიანობას ხელმძღვანელობს კომისიის თავმჯდომარე. მისი არყოფნის შემთხვევაში კომისიის თავმჯდომარის ფუნქციებს ასრულებს საქართველოს იუსტიციის მინისტრის შესაბამისი მოადგილე.

13. კომისიის თავმჯდომარე:

ა) წარმართავს კომისიის მუშაობას;

ბ) იწვევს კომისიის სხდომებს, განსაზღვრავს კომისიის სხდომის დღის წესრიგსა და დროს;

გ) თავმჯდომარეობს კომისიის სხდომებს;

დ) კომისიის სახელით წარადგენს კომისიის დასკვნებსა და წინადადებებს;

ე) კომისიის საქმიანობის ეფექტურად წარმართვის უზრუნველყოფისათვის, საჭიროების შემთხვევაში, კომისიის მუშაობაში მონაწილეობის მისაღებად იწვევს შესაბამისი სფეროს ქართველ და უცხოელ ექსპერტებს.

14. კომისიის საქმიანობის ორგანიზაციულ-ტექნიკურ და საინფორმაციო-ანალიტიკურ უზრუნველყოფას ახორციელებს საქართველოს იუსტიციის სამინისტრო.

რ. გილიგაშვილი