საქართველოს იუსტიციის მინისტრის ბრძანება №948 „ქ. თბილისის ქორწინების სახლის ლიკვიდაციისა და განსახორციელებელი სალიკვიდაციო ღონისძიებების შესახებ

სახელმწიფო სარეგისტრაციო კოდი 040.230.000.11.106.006.029

საქართველოს იუსტიციის მინისტრის

ბრძანება №948

2003 წლის 25 აგვისტო

ქ. თბილისი

ქ. თბილისის ქორწინების სახლის ლიკვიდაციისა და განსახორციელებელი სალიკვიდაციო ღონისძიებების შესახებ

ქ. თბილისის ქორწინების სახლის სალიკვიდაციო ღონისძიებათა სრულყოფილად განხორციელების მიზნით, „სამოქალაქო აქტების რეგისტრაციის შესახებ” საქართველოს კანონის მე-9 მუხლის პირველი, მე-4, მე-5 და მე-9 პუნქტებისა და საქართველოს პრეზიდენტის 2001 წლის 31 დეკემბრის №544 ბრძანებულებით დამტკიცებული საქართველოს იუსტიციის სამინისტროს დებულების მე-12 მუხლის მე-2 პუნქტის “დ” ქვეპუნქტის შესაბამისად, ვბრძანებ:

1. განხორციელდეს ქ. თბილისის ქორწინების სახლის ლიკვიდაცია. ლიკვიდაციის დღედ ჩაითვალოს ამ ბრძანების გამოქვეყნებიდან 31-ე დღე.

2. დაევალოს საქართველოს იუსტიციის სამინისტროს საკადრო საკითხთა დეპარტამენტს (თ. დევდარიანს) უზრუნველყოს ამ ბრძანებით ლიკვიდაციას დაქვემდებარებული ქორწინების სახლის მოსამსახურეთა გაფრთხილებისა და გათავისუფლების ორგანიზება მოქმედი კანონმდებლობის შესაბამისად.

3. ქ. თბილისის ქორწინების სახლის ლიკვიდაციასთან დაკავშირებით შეიქმნას სალიკვიდაციო კომისია შემდეგი შემადგენლობით:

ა) გიორგი წკრიალაშვილი – საქართველოს იუსტიციის მინისტრის პირველი მოადგილე /კომისიის თავმჯდომარე/;

ბ) თინათინ დევდარიანი – საქართველოს იუსტიციის სამინისტროს საკადრო საკითხთა დეპარტამენტის უფროსი;

გ) კახა უშიკიშვილი – საქართველოს იუსტიციის სამინისტროს ეკონომიკური დეპარტამენტის უფროსი;

დ) ზაზა მეიშვილი – საქართველოს იუსტიციის სამინისტროს მოქალაქეობის, სამოქალაქო მდგომარეობის რეგისტრაციისა და იმიგრაციის საკითხთა დეპარტამენტის უფროსი;

ე) მანანა ცინაძე – სამოქალაქო მდგომარეობის რეგისტრაციის სამმართველოს უფროსი.

4. სალიკვიდაციო კომისიამ შესაბამისი ადგილობრივი თვითმმართველობის აღმასრულებელი ორგანოს უფლებამოსილ პირსა და ქ. თბილისის ქორწინების სახლის დირექტორ ნანა შუკაკიძესთან ერთად კოორდინირებულად განახორციელოს:

ა) პრესის საშუალებით ინფორმაციის გავრცელება ქ. თბილისის ქორწინების სახლის ლიკვიდაციისა და სალიკვიდაციო კომისიისათვის მიმართვის წესისა და პირობების თაობაზე. ეს ვადა არ უნდა აღემატებოდეს ერთ თვეს ინფორმაციის გამოქვეყნების დღიდან;

ბ) ქ. თბილისის ქორწინების სახლის მფლობელობაში არსებული ქონების ინვენტარიზაცია და მისი გადაცემა ახლად შექმნილი განყოფილებისათვის;

გ) ორგანიზება და კონტროლი აღნიშნული ქორწინების სახლის საარქივო მასალების საქართველოს სამოქალაქო აქტების რეგისტრაციის არქივებისათვის გადაცემასა და ახლად შექმნილი განყოფილებისათვის იმ საქმეების გადაბარებაზე, რომელთა ადგილზე შენახვის ვადა ჯერ არ არის გასული.

5. კომისიის მუშაობისათვის საჭირო თანხები გამოიყოს სამინისტროს სპეციალური ანგარიშიდან.

6. ბრძანების შესრულებაზე კონტროლი დაევალოს საქართველოს იუსტიციის მინისტრის პირველ მოადგილეს გიორგი წკრიალაშვილს.

7. ეს ბრძანება ამოქმედდეს გამოქვეყნებისთანავე.

რ. გილიგაშვილი