სახელმწიფო სანებართვო რეესტრის ფორმისა და წარმოების წესის დამტკიცების შესახებ

სახელმწიფო სარეგისტრაციო კოდი 010.240.030.11.106.005.384

საქართველოს იუსტიციის მინისტრის

ბრძანება №519

2002 წლის 28 ივნისი

ქ. თბილისი

სახელმწიფო სანებართვო რეესტრის ფორმისა და წარმოების წესის დამტკიცების შესახებ

„სამეწარმეო საქმიანობის ლიცენზიისა და ნებართვის გაცემის საფუძვლების შესახებ” საქართველოს კანონის 34-ე და 39-ე მუხლების მოთხოვნათა საფუძველზე, ვბრძანებ:

1. დამტკიცდეს სახელმწიფო სანებართვო რეესტრის ფორმა (დანართი №1).

2. დამტკიცდეს სახელმწიფო სანებართვო რეესტრის წარმოების წესი (დანართი №2).

3. ეს ბრძანება ამოქმედდეს 2002 წლის 1 ივლისიდან.

რ. გილიგაშვილი

სახელმწიფო სანებართვო რეესტრის წარმოების წესი

1. სახელმწიფო სანებართვო რეესტრი იქმნება ნებართვების გაცემის, მათში ცვლილებების შეტანის, მათი მოქმედების შეჩერებისა და განახლების, მათი გაუქმების შესახებ მონაცემთა სრული და ერთიანი ბაზის შესაქმნელად.

2. სახელმწიფო სანებართვო რეესტრს აწარმოებს საქართველოს იუსტიციის სამინისტროს სახელმწიფო რეგისტრაციის, ლიცენზირებისა და საჯარო რეესტრის წარმოების დეპარტამენტი.

3. სახელმწიფო სანებართვო რეესტრში შეიტანება მონაცემები ნებართვის გაცემის, მასში ცვლილებების შეტანის, მისი მოქმედების შეჩერებისა და განახლების, მისი გაუქმებისა და დუბლიკატის გაცემის შესახებ.

4. სახელმწიფო სანებართვო რეესტრში კანონით დადგენილი მონაცემების შეტანა ხორციელდება ნებართვების გამცემი ორგანოებისაგან ინფორმაციის მოწოდებიდან 2 დღის ვადაში.

5. სახელმწიფო რეგისტრაციის, ლიცენზირებისა და საჯარო რეესტრის წარმოების დეპარტამენტი ამზადებს სახელმწიფო სანებართვო რეესტრის ყოველკვარტალურ მონაცემებს და წარადგენს „საქართველოს საკანონმდებლო მაცნეში“ გამოსაქვეყნებლად.

6. სახელმწიფო სანებართვო რეესტრის მონაცემთა გაცნობის საშუალებას უზრუნველყოფს სახელმწიფო რეგისტრაციის, ლიცენზირებისა და საჯარო რეესტრის წარმოების დეპარტამენტი, კანონმდებლობით დადგენილი წესით.