სტაციონარული სამკურნალო დაწესებულებების სამკურნალო საშუალებებითა და სამედიცინო დანიშნულების საგნებით უზრუნველყოფის გაუმჯობესების დამატებითი ღონისძიებების შესახებ

სახელმწიფო სარეგისტრაციო კოდი 470.012.004.474

საქართველოს შრომის, ჯანმრთელობისა და სოციალური დაცვის მინისტრის

ბრძანება №147/ნ

2000 წლის 17 ოქტომბერი

ქ. თბილისი

სტაციონარული სამკურნალო დაწესებულებების სამკურნალო საშუალებებითა და სამედიცინო დანიშნულების საგნებით უზრუნველყოფის გაუმჯობესების დამატებითი ღონისძიებების შესახებ

ჯანდაცვის სახელმწიფო პროგრამების მწირი დაფინანსების პირობებში სამკურნალო დაწესებულებებში ადგილი აქვს პაციენტის ან მისი პატრონის მიერ სამკურნალო საშუალებებისა და სამედიცინო დანიშნულების საგნების შეტანის ფაქტებს, რაც მიზეზი ხდება უხარისხო მკურნალობის, ხშირ შემთხვევებში საფრთხე ექმნება ავადმყოფის ჯანმრთელობას, რადგან ისინი საავადმყოფოების ან მათ მიმდებარე ტერიტორიაზე განლაგებული ულიცენზიო ფარმაცევტული დაწესებულებებიდან იძენენ გაურკვეველი ხარისხის წამლებს.

სამკურნალო-პროფილაქტიკურ დაწესებულებებში არარეგისტრირებული, უხარისხო, ფალსიფიცირებული წამლისა და სამედიცინო დანიშნულების საგნების შეტანის თავიდან აცილების მიზნით, „წამლისა და ფარმაცევტული საქმიანობის შესახებ“ საქართველოს კანონის 34-ე მუხლის მე-5 პუნქტის თანახმად ვბრძანებ:

1. დაევალოს სტაციონარულ სამკურნალო-პროფილაქტიკურ დაწესებულებებს:

ა) შეიმუშაონ და დაამტკიცონ მათი დაწესებულებებისათვის განკუთვნილი სტანდარტებით გათვალისწინებული სამკურნალო საშუალებებისა და სამედიცინო დანიშნულების საგნების ჩამონათვალი (შემდგომში – სავალდებულო ასორტიმენტი);

ბ) შექმნან მათ სტრუქტურაში არსებულ ან მათთან ხელშეკრულებით მომუშავე აფთიაქებში სავალდებულო ასორტიმენტის მარაგი, რომელიც შიდა სტანდარტის შესაბამისად უზრუნველყოფს პაციენტთა ხარისხიან, ეფექტურ და უწყვეტ სამკურნალო პროცესს.

2. პაციენტის ან მისი პატრონის მიერ სამკურნალო საშუალებისა და  სამედიცინო დანიშნულების საგნების (გარდა სპეცკონტროლს დაქვემდებარებული სამკურნალო საშუალებებისა) შეტანა სტაციონარში დასაშვებია მხოლოდ  პაციენტის შემოსვლიდან 24 საათის განმავლობაში საჭირო ნომენკლატურის და ოდენობის მოცულობით შემდეგ ექსტრემალურ სიტუაციებში:

ა) სტანდარტით გაუთვალისწინებელ, ურგენტულ შემთხვევებში;

ბ) სავალდებულო ასორტიმენტის მარაგის უკმარისობისას, მასობრივი, არაპროგნოზირებადი ოდენობით ავადმყოფთა შემოსვლის გამო.

3.  სამკურნალო დაწესებულებების ხელმძღვანელებმა უზრუნველყონ:

ა) პაციენტის მიერ შეტანილი სამკურნალო საშუალებებისა და სამედიცინო დანიშნულების საგნების აღრიცხვა და სათანადო საბუღალტრო დოკუმენტაციის წარმოება;

ბ) ზემოაღნიშნული სამკურნალო საშუალებებისა და სამედიცინო დანიშნულების საგნების მიღების და გამოყენების შესახებ სათანადო აქტის შედგენა და  ბუღალტერიისათვის წარდგენა.

4. აიკრძალოს სამკურნალო დაწესებულებების ტერიტორიაზე კერძო ტიპის აფთიაქების გახსნა და ფუნქციონირება.

5. კონტროლი ბრძანების შესრულებაზე დაევალოს მინისტრის პირველ მოადგილეს ა. გამყრელიძეს.

6. ბრძანება გამოქვეყნდეს „საკანონმდებლო მაცნეში" და ამოქმედდეს გამოქვეყნებისთანავე.

ა. ჯორბენაძე