საქართველოს გარემოს დაცვის სამინისტროს მინისტრის აპარატის დებულების დამტკიცების შესახებ

საქართველოს გარემოს დაცვის მინისტრის

ბრძანება №17

2011 წლის 25 მაისი

ქ. თბილისი

საქართველოს გარემოს დაცვის სამინისტროს მინისტრის აპარატის დებულების დამტკიცების შესახებ

„საქართველოს მთავრობის სტრუქტურის, უფლებამოსილებისა და საქმიანობის წესის შესახებ“ საქართველოს კანონის მე-18 მუხლის მე-2 პუნქტის, „საქართველოს გარემოს დაცვის სამინისტროს დებულების დამტკიცების შესახებ“ საქართველოს მთავრობის 2011 წლის 16 მარტის №132 დადგენილებით დამტკიცებული დებულების მე-4 მუხლის მე-2 პუნქტის „ბ“ ქვეპუნქტისა და „ნორმატიული აქტების შესახებ“ საქართველოს კანონის 25-ე მუხლის  შესაბამისად, ვბრძანებ:

1. დამტკიცდეს საქართველოს გარემოს დაცვის სამინისტროს მინისტრის აპარატის თანდართული დებულება.

2. ძალადაკარგულად გამოცხადდეს „საქართველოს გარემოს დაცვისა და ბუნებრივი რესურსების სამინისტროს მინისტრის აპარატის დებულების დამტკიცების შესახებ“ საქართველოს გარემოს დაცვისა და ბუნებრივი რესურსების მინისტრის 2006 წლის 28 ნოემბრის №1300 ბრძანება.

3. ეს ბრძანება ამოქმედდეს გამოქვეყნებისთანავე.

გ.ხაჩიძე

საქართველოს გარემოს დაცვის სამინისტროს მინისტრის აპარატის

დ ე ბ უ ლ ე ბ ა

თავი I

ზოგადი დებულებანი

    მუხლი 1

1. ეს დებულება განსაზღვრავს საქართველოს გარემოს დაცვის სამინისტროს (შემდგომში – სამინისტრო) მინისტრის აპარატის (შემდგომში – აპარატი)  სამართლებრივ სტატუსს, სტრუქტურას, უფლებამოსილებას, ანგარიშვალდებულებას და აწესრიგებს მის საქმიანობასთან დაკავშირებულ სხვა საკითხებს.

2. აპარატი წარმოადგენს სამინისტროს სტრუქტურულ ქვედანაყოფს.

    მუხლი 2

1. აპარატი თავის საქმიანობაში ხელმძღვანელობს საქართველოს კონსტიტუციით და სხვა საკანონმდებლო აქტებით, საქართველოს პრეზიდენტის, საქართველოს მთავრობისა და საქართველოს გარემოს დაცვის მინისტრის (შემდგომში – მინისტრი) სამართლებრივი აქტებით, სხვა კანონქვემდებარე ნორმატიული აქტებით და მინისტრის ცალკეული დავალებებით.

2. აპარატი თავისი ამოცანებისა და ფუნქციების განხორციელებისას წარმოადგენს   სამინისტროს.

3. აპარატი ანგარიშვალდებულია მინისტრის წინაშე.

თავი II

აპარატის ფუნქციები და ამოცანები

    მუხლი 3

 აპარატის ძირითადი ფუნქციები და ამოცანებია:

ა) მინისტრის ბრძანებების შესრულების კონტროლი, მინისტრისათვის მის სახელზე შემოსული კორესპონდენციის დროული მიწოდება;

ბ) სამინისტროს ხელმძღვანელობის თათბირების ორგანიზება, თათბირის ოქმის შედგენა;

გ) მინისტრისა და მინისტრის მოადგილეების შეხვედრების განრიგის დაგეგმვა და მომზადება;

დ) სამინისტროს ხელმძღვანელობის მოხსენებების, გამოსვლების, ანგარიშების მომზადების ორგანიზება;

ე) მინისტრისთვის ორგანიზაციულ-ტექნიკური და საინფორმაციო მომსახურების გაწევა;

ვ) სამინისტროს ხელმძღვანელობის მივლინებების ორგანიზება;

ზ) სამინისტროს ხელმძღვანელობის მიერ მოქალაქეთა მიღების საკითხების რეგულირება;

თ) მინისტრის მრჩეველთა საქმიანობის ხელშეწყობა.

ი) თავისი კომპეტენციის ფარგლებში სამინისტროს ხელმძღვანელობის დავალებათა შესრულება.

თავი III

აპარატის ხელმძღვანელობა და მოსამსახურეები

    მუხლი 4

1. აპარატს ხელმძღვანელობს აპარატის უფროსი, რომელსაც კანონმდებლობით დადგენილი წესით თანამდებობაზე ნიშნავს და თანამდებობიდან ათავისუფლებს მინისტრი.

2. აპარატის უფროსი უშუალოდ ექვემდებარება მინისტრს.

    მუხლი 5

აპარატის უფროსი:

ა) ხელმძღვანელობს და წარმართავს აპარატის საქმიანობას;

ბ) წარმოადგენს აპარატს დაკისრებული უფლება-მოვალეობების განხორციელებისას და პასუხისმგებელია აპარატზე დაკისრებული ფუნქციებისა და ამოცანების შესრულებაზე;

გ) ანაწილებს მოვალეობას აპარატის მოსამსახურეებს შორის და აძლევს მათ მითითებებს და დავალებებს;

დ) აკონტროლებს აპარატის მოსამსახურეების მიერ თავიანთი სამსახურებრივი მოვალეობების ჯეროვან შესრულებას, ახორციელებს მათ მიერ სამინისტროს შინაგანაწესის შესრულების კონტროლს; პერიოდულად ისმენს აპარატში შემავალ მოსამსახურეთა ანგარიშს მათ მიერ გაწეული მუშაობის შესახებ;

ე) ორგანიზებას უწევს ამ დებულებით აპარატისათვის დაკისრებული ფუნქციებისა და ამოცანების შესრულებას, რისთვისაც წარუდგენს მინისტრს წინადადებებს ცალკეული საკითხების მოწესრიგებისა და გადაწყვეტის მიზნით;

ვ) წარუდგენს სამინისტროს ხელმძღვანელობას წინადადებებს აპარატის სტრუქტურის, საშტატო განრიგის, მუშაობის ორგანიზაციის, აპარატის მოხელეების წახალისების ან მათთვის დისციპლინური პასუხიმგებლობის დაკისრების შესახებ;

ზ) შუამდგომლობს აპარატისათვის იმ სახსრების, მოწყობილობებისა და ინვენტარის გამოყოფაზე, რაც აუცილებელია აპარატის წინაშე მდგარი ფუნქციებისა და ამოცანების შესასრულებლად;

თ) ხელს აწერს ან ვიზირებას უკეთებს  აპარატში მომზადებულ დოკუმენტებს და  კომპეტენციის ფარგლებში ვიზას ადებს სამინისტროს სტრუქტურული ქვედანაყოფების  მიერ შემუშავებულ დოკუმენტებს; 

ი) ასრულებს მინისტრის მიერ განსაზღვრულ კონკრეტულ დავალებებს;

კ) ახორციელებს სხვა უფლებამოსილებებს.

    მუხლი 6

აპარატის უფროსის მიერ სამსახურებრივი უფლებამოსილების შესრულების შეუძლებლობის შემთხვევაში მის მოვალეობებს ასრულებს მინისტრის მრჩეველი მინისტრის დავალებით.

    მუხლი 7

1. აპარატის მოსამსახურეებს კანონმდებლობით დადგენილი წესით თანამდებობაზე ნიშნავს და თანამდებობიდან ათავისუფლებს მინისტრი.

2. აპარატის მოსამსახურეთა უფლებები და მოვალეობები განისაზღვრება ამ დებულებითა და საქართველოს კანონმდებლობით.