საქართველოს იუსტიციის სამინისტროს სპეცსახსრების ანგარიშზე შემოსული თანხების ხარჯვის ერთიანი წესის დამტკიცების შესახებ

სახელმწიფო სარეისტრაციო კოდი 010.240.030.11.106.004.124

საქართველოს იუსტიციის მინისტრის

ბრძანება №214

2001 წლის 20 ივნისი

ქ. თბილისი

საქართველოს იუსტიციის სამინისტროს სპეცსახსრების ანგარიშზე შემოსული თანხების ხარჯვის ერთიანი წესის დამტკიცების შესახებ

იუსტიციის სამინისტროს სპეცსახსრების ანგარიშზე შემოსული თანხების მიზნობრივი ხარჯვის უზრუნველყოფის მიზნით ვბრძანებ:

1. იუსტიციის სამინისტროს სპეცსახსრების ანგარიშზე შემოსული თანხის ხარჯვა განხორციელდეს „საქართველოს 2001 წლის წლის სახელმწიფო ბიუჯეტის შესახებ” საქართველოს კანონის მე-10 დანართით დამტკიცებულ ასიგნებათა ფარგლებში.

2. დამტკიცდეს სპეცსახსრების ანგარიშზე რიცხული თანხების ხარჯვის თანდართული ერთიანი წესი, დანართი №1;

3. ძალადაკარგულად ჩაითვალოს ბრძანებები:

ა) საქართველოს იუსტიციის მინისტრის 2001 წლის 5 მარტის №88 ბრძანება „სააღსრულებო წარმოებათა შესახებ” საქართველოს კანონის მე-10 მუხლით გათვალისწინებული საქართველოს იუსტიციის სამინისტროს სპეციალურ ანგარიშზე ჩარიცხული თანხის ხარჯვისა და გამოყენების წესის დამტკიცების შესახებ”.

ბ) საქართველოს იუსტიციის მინისტრის 2001 წლის 27 აპრილის №57 ბრძანება „საქართველოს იუსტიციის სამინისტროს სპეცსახსრების ანგარიშზე შემოსული თანხების განაწილების წესის დამტკიცების შესახებ.

4. კონტროლი ბრძანების შესრულებაზე დაევალოს საფინანსო-სამეურნეო დეპარტამენტს (ლ. ქოჩქიანი).

მ. სააკაშვილი

დანართი №1

საქართველოს იუსტიციის სამინისტროს სპეცსახსრების ანგარიშზე შემოსული თანხების ხარჯვის ერთიანი წესი

საქართველოს იუსტიციის სამინისტროს სპეცსახსრების მობილიზაციის ძირითადი წყაროებია:

1. სააღსრულებო დეპარტამენტის აღმასრულებლების მიერ სასამართლო გადაწყვეტილებების აღსრულებისათვის დადგენილი წესით კუთვნილი თანხები.

2. „სამოქალაქო აქტების რეგისტრაციის შესახებ” საქართველოს კანონით და საქართველოს პრეზიდენტის 1999 წლის 18 სექტემბრის №549 ბრძანებულებით უცხო სახელმწიფოში გასაგზავნი საქართველოში გამოცემული სანოტარო წესით დამოწმებული ან დადასტურებული საბუთების ლეგალიზაციასთან დაკავშირებული მომსახურებისათვის შემოსული თანხები;

3. მოქალაქეთა მდგომარეობის აქტების რეგისტრაციის სახელმწიფო ბაჟისა და საქართველოს იუსტიციის სამინისტროს მოსაკრებლებისაგან მიღებული თანხები.

სპეცსახსრების ანგარიშზე შემოსული თანხები გამოიყენება შემდეგი მიზნებისათვის:

1. სამინისტროს ცენტრალური აპარატისა და სისტემის მუშაკთა მატერიალური წახალისებისათვის, ხელშეკრულებით მოწვეული სპეციალისტების შრომის ასანაზღაურებლად, მინისტრის ბრძანებით ერთდროული დახმარებებისა და ფულადი ჯილდოების გასაცემად.

2. აღსრულების დეპარტამენტის აღმასრულებლებისა და სააღსრულებო პოლიციის პირადი შემადგენლობის მატერიალური წახალისებისათვის, რომლის მოცულობაც განისაზღვროს მათ მიერ რეალურად სამინისტროს სასარგებლოდ ამოღებული თანხის 10%-ით.

3. სამინისტროსა და სისტემის მუშაკთა მივლინებისათვის, როგორც ქვეყნის შიგნით, ასევე ქვეყნის გარეთ.

4. სამინისტროსა და სისტემის ორგანიზაციების მატერიალურ-ტექნიკური ბაზის სრულყოფისათვის: სისტემის საკანცელარიო-სამეურნეო ხარჯებისათვის, ოფისის შენახვისათვის, კომუნალური მომსახურებისათვის, მანქანა-მოწყობილობებისათვის, კომპიუტერების, გამოთვლითი ტექნიკის, ინვენტარის შეძენისათვის, მედიკამენტების შესაძენად, სპეციალისტების მომზადებისათვის, სამინისტროს სისტემის მუშაკებისა და მათი ოჯახის წევრების სწავლების საფასურის ასანაზღაურებლად, აგრეთვე მათი სამედიცინო მომსახურებისათვის, სხვა აუცილებელი ღონისძიებების დასაფინანსებლად.

5. მინისტრის კაბინეტის მოთხოვნით სამინისტროში სხვადასხვა ორგანიზაციული ღონისძიებებისათვის საჭირო წარმომადგენლობითი ხარჯების დასაფინანსებლად.

6. სამინისტროსა და სისტემის ორგანიზაციების ინტერესებიდან გამომდინარე სხვადასხვა ხარჯებისათვის..

7. მინისტრის გადაწყვეტილებით          სამთავრობო და არასამთავრობო ორგანიზაციებისათვის სხვადასხვა ღონისძიებების ჩასატარებლად ფინანსური დახმარების გასაწევად, განსაკუთრებულ მდგომარეობაში ჩავარდნილ მოქალაქეთა დასახმარებლად.

სამინისტროს სპეცანგარიშზე წლის ბოლოსათვის რიცხული თანხების ნაშთი რჩება სამინისტროს განკარგულებაში.