წალკის მუნიციპალიტეტის ტერიტორიაზე პირველ კლასს დაქვემდებარებული შენობა-ნაგებობების სახეობების (რომელთა განთავსება/მშენებლობა შესაძლებელია მშენებლობის ნებართვის გარეშე) განსაზღვრის შესახებ

წალკის მუნიციპალიტეტის საკრებულოს

დადგენილება №31

2011 წლის 13 მაისი

ქ. წალკა

წალკის მუნიციპალიტეტის ტერიტორიაზე პირველ კლასს დაქვემდებარებული შენობა-ნაგებობების სახეობების (რომელთა განთავსება/მშენებლობა შესაძლებელია მშენებლობის ნებართვის გარეშე) განსაზღვრის შესახებ

„ადგილობრივი თვითმმართველობის შესახებ“ საქართველოს ორგანული კანონის 22-ე მუხლის პირველი პუნქტის „ჟ“ ქვეპუნქტისა და „მშენებლობის ნებართვის გაცემის წესისა და სანებართვო პირობების შესახებ“ საქართველოს მთავრობის 2009 წლის 24 მარტის №57 დადგენილების 65-ე მუხლის მე-2 პუნქტის შესაბამისად,

წალკის მუნიციპალიტეტის საკრებულო ადგენს:

    მუხლი 1.

განისაზღვროს პირველ კლასს დაქვემდებარებული შემდეგი სახის შენობა-ნაგებობანი, რომელთა განთავსება/მშენებლობა არ საჭიროებს მშენებლობის ნებართვას:

ა) 60 მ² -მდე სართულების იატაკის დონეებზე განაშენიანების ჯამური ფართობის, 5 მ-მდე სიმაღლისა და გრუნტის ზედაპირიდან საშუალოდ 2 მ-მდე ჩაღრმავების მქონე შენობა;

ბ) 20 მ³ -მდე მოცულობის 10 მ-მდე სიმაღლისა და გრუნტის ზედაპირიდან საშუალოდ 10-მდე ჩაღმავების მქონე ნაგებობა;

გ) გრუნტის ზედაპირიდან 2,2 მ-მდე სიმაღლის მქონე ღობე;

დ) V კატეგორიის ელექტროსადგურები (ჰიდროელექტროსადგური 50 კვტ სიმძლავრემდე, მზის და ბიოგაზის დანადგარი);

ე) კავშირგაბმულობის ხაზის (ქსელის) გაყვანა/მონტაჟი არსებული ინფრასტრუქტურის გამოყენებით ან კავშირგაბმულობის ხაზის (ქსელის) გაყვანა/მონტაჟისთვის ტრანშეის/თხრილის მოწყობა (გარდა იმ შემთხვევისა, როდესაც კავშირგაბმულობის ხაზის (ქსელის) გაყვანა/მონტაჟი დამატებით საჭიროებს სანებართვო შენობა-ნაგებობის მშენებლობას/მონტაჟს);

ვ) გარე რეკლამის განთავსების ნებართვით გათვალისწინებული ნაგებობა;

ზ) საზოგადოებრივ ადგილებში გარე ვაჭრობისთვის განკუთვნილი 2,5 მ-მდე სიმაღლისა და 6 მ² -მდე ფართობის მქონე დროებითი შენობა-ნაგებობა ან/და დანადგარები;

თ) ხაზობრივი ნაგებობები - III კატეგორიის გაზსადენი, III კატეგორიის წყალსადენი, III კატეგორიის წყალარინების მილი, III კატეგორიის ქუჩა, IV და V კატეგორიის ელექტროგადამცემი ხაზები;

კ) შენობა-ნაგებობა, რომლის მალის, ფერმის ან სხვა კონსტრუქციული ელემენტის სიგრძე ნაკლები ან ტოლია 5-მეტრისა;

ლ) შენობა-ნაგებობები, რომელთა მშენებლობა/განთავსება გათვალისწინებულია სახელმწიფო ან ადგილობივი ბიუჯეტიდან.

    მუხლი 2.

ამ დადგენილების პირველი მუხლის „ა“, „ბ“ და „ზ“ ქვეპუნქტებით გათვალისწინებული შენობა-ნაგებობის ასაშენებლად სავალდებულოა მშენებლობის ნებართვა, თუ სამშენებლო ობიექტი განთავსდება:

ა) ქუჩის, მოედნის, სკვერის, პარკისა და სხვა საზოგადოებრივი სივცეების მომიჯნავედ; (შენობა-ნაგებობა არ ჩაითვლება მომიჯნავედ, თუ იგი დაშორებულია საზოგადოებრივი საზღვრიდან 50 მეტრის მანძილზე);

ბ) საერთაშორისო და შიდა სახელმწიფოებრივი მნიშვნელობის გზის ღერძულა ხაზიდან 100 მეტრიან და ადგილობრივი მნიშვნელობის გზის ღერძულა ხაზიდან 50 მეტრიან ზონაში;

გ) დაცული ტერიტორიების მიმდებარედ 300 მეტრიან ზონაში, წყალდაცვითი ზოლების მიმდებარედ 50 მეტრიან ზონაში და სტიქიურ-გეოლოგიური პროცესების საშიშროების ზონაში;

    მუხლი 3.

„მშენებლობის ნებართვის გაცემის წესისა და სანებართვო პირობების შესახებ“ საქართველოს მთავრობის 2009 წლის 24 მარტის №57 დადგენილების 66-ე მუხლით გათვალისწინებული დოკუმენტაციასთან ერთად, ამავე დადგენილების, ამავე, მუხლის მე-9 პუნქტის შესაბამისად, დამკვეთმა I კლასს დაქვემდებარებული შენობა-ნაგებობის მშენებლობის შესახებ განცხადებასთან ერთად ნებართვის გამცემ ორგანოს დამატებით უნდა წარუდგინოს შემდეგი დოკუმენტაცია:

ა) მიწის ნაკვეთზე საკუთრების ან სარგებლობის დამადასტურებელი საბუთი; მიწის ნაკვეთის და არსებული საინჟინრო საკომუნიკაციო ნაგებობების მესაკუთრეთა ან ბინის მესაკუთრეთა ამხანაგობის თანხმობა საზოგადოებრივი სივრცის გამოყენების შემთხვევაში, ასევე ადგილობრივი თვითმმართველობის ორგანოების თანხმობა;

ბ) სიტუაციური გეგმა ექსპლიკაციით (მასშტაბი 1:2000);

გ) სამშენებლო ობიექტის საპროექტო ტერიტორიაზე განთავსების სიტუაციური გეგმა (გაბარიტული ზომებისა და საზოგადოებრივ საზღვართან მიბმის ჩვენებით, ტერიტორიის მოწყობის ჩვენებით (მასშტაბი 1:500));

დ) საფუძვლიანი ეჭვის არსებობის შემთხვევაში საინჟინრო გეოლოგიური კვლევა და ცნობა სამშენებლო მოედნის სტიქიურ-გეოლოგიურ საშიშროების ზონაში არმდებარეობის შესახებ;

ე) ფასადების სქემატური ნახაზები ძირითადი ნიშნულების ჩვენებით.

    მუხლი 4.

წალკის მუნიციპალიტეტის საკრებულოს დადგენილება ძალაში შედის საქართველოს კანონმდებლობით დადგენილი წესით გამოქვეყნებისთანავე.

საკრებულოს თავმჯდომარე  დ. მაჩიტიძე