ვაჭრობის მსოფლიო ორგანიზაციაში (ვმო) წევრად შესვლისას საქართველოს მიერ ნაკისრ ვალდებულებათა შესრულების უზრუნველსაყოფად სამთავრობო კომისიის შექმნის თაობაზე

საქართველოს მთავრობის

დადგენილება №95

2005 წლის 31 მაისი

ქ. თბილისი

ვაჭრობის მსოფლიო ორგანიზაციაში (ვმო) წევრად შესვლისას საქართველოს მიერ ნაკისრ ვალდებულებათა შესრულების უზრუნველსაყოფად სამთავრობო კომისიის შექმნის თაობაზე

ვაჭრობის მსოფლიო ორგანიზაციასთან (ვმო) საქარ­თველოს ურთიერთობის კოორდინაციის, აგრეთვე აღნიშნულ ორგანიზაციაში წევრად შესვლისას საქართველოს მიერ ნაკისრ ვალდებულებათა შესრულების უზრუნველ­საყოფად „საქართველოს მთავრობის სტრუქტურის, უფლებამოსილებისა და საქმიანობის წესის შესახებ” საქართველოს კანონის მე-5 მუხლის ,,დ” ქვეპუნქტისა და 29-ე მუხლის პირველი პუნქტის საფუძველზე:

1. შეიქმნას სამთავრობო კომისია შემდეგი შემადგენლობით:

თამარ კოვზირიძე – საქართველოს ეკონომიკური განვითარების მინისტრის მოადგილე, კომისიის თავმჯდომარე

თამაზ აგლაძე – საქართველოს ექსპორტიორთა ასოციაციის პრეზიდენტი

ვასილ ბაბუნაშვილი – საქართველოს ეროვნული უშიშროების საბჭოს აპარატის ეკონომიკური უსაფრთხოების დეპარტამენტის მთავარი მრჩეველი

თამარ ბერუჩაშვილი – ევროპულ და ევროატლანტიკურ სტრუქტურებში ინტეგრაციის საკითხებში საქართველოს სახელმწიფო მინისტრის მოადგილე

დავით გაბუნია – საქართველოს ინტელექტუალური საკუთრების ეროვნული ცენტრის „საქპატენტის” გენერალური დირექტორი

ეკატერინე გურეშიძე – საქართველოს იუსტიციის მინისტრის პირველი მოადგილე

სოფიო თვალავაძე – საქართველოს ეკონომიკური განვითარების სამინისტროს კავშირგაბმულობის დეპარტამენტის მთავარი სპეციალისტი

რომან კაკულია – საქართველოს სოფლის მეურნეობის სამინისტროს საერთაშორისო ურთიერთობების დეპარტამენტის უფროსი

ვარლამ კილაძე – საქართველოს პარლამენტის დარგობრივი ეკონომიკისა და ეკონომიკური პოლიტიკის კომიტეტის თავმჯდომარის მოადგილე

ეკატერინე კომახიძე – საქართველოს ეკონომიკური განვითარების სამინისტროს საგარეო ეკონომიკური ურთიერთობებისა და საერთაშორისო პროგრამების დეპარტამენტის საერთაშორისო ორგანიზაციებისა და პროგრამების სამმართველოს უფროსი

ვლადიმერ ლეჟავა – რეფორმების კოორდინაციის საკითხებში საქართველოს სა­­ხელ­მწიფო მინისტრის მთავარი მრჩეველი

სოფიო მაისურაძე – საქართველოს ეკონომიკური განვითარების სამინისტროს მშენებლობისა და ურბანიზაციის დეპარტამენტის მთავარი სპეციალისტი

შოთა მაქაცარია – საქართველოს სავაჭრო-სამრეწველო პალატის პირველი ვიცე-პრეზიდენტი

ელგუჯა მელაძე – საქართველოს დამსაქმებელთა ასოციაციის პრეზიდენტი

ვაჟა პეტრიაშვილი – საქართველოს ფინანსთა მინისტრის მოადგილე

ვალერიან ქათამაძე – საქართველოს საგარეო საქმეთა სამინისტროს საერთაშორისო ეკონომიკურ და საფინანსო ორგანიზაციებთან თანამშრომლობის სამმართველოს უფროსი

მიხეილ ქათამაძე – საქართველოს ეკონომიკური განვითარების სამინისტროს საგარეო ეკონომიკური ურთიერთობებისა და საერთაშორისო პროგრამების დეპარტამენტის უფროსის მოადგილე

ვლადიმერ ქველაძე – საქართველოს ეკონომიკური განვითარების სამინისტროს ტრანსპორტის პოლიტიკის სამმართველოს უფროსი

გიორგი ღუღუნიშვილი – საქართველოს საგარეო საქმეთა მინისტრის მოადგილე

ვლადიმერ ხარატიშვილი – ბიზნესმენთა ფედერაციის ფინანსური მენეჯერი

მიხეილ ჯანიკაშვილი – საქსტანდარტის გენერალური დირექტორი

ლევან ჯუღელი – საქართველოს შრომის, ჯანმრთელობისა და სოციალური დაცვის მინისტრის მოადგილე.

2. დამტკიცდეს დადგენილების პირველი პუნქტით შექმნილი ვაჭრობის მსოფლიო ორგანიზაციასთან თანამშრომლობის სამთავრობო კომისიის თანდართული დებულება.

3. დადგენილება ამოქმედდეს გამოქვეყნებისთანავე.

პრემიერ-მინისტრი             ზ. ნოღაიდელი

ვაჭრობის მსოფლიო ორგანიზაციასთან თანამშრომლობის სამთავრობო კომისიის   

დ ე ბ უ ლ ე ბ ა

I. ზოგადი დებულებანი

1. ვაჭრობის მსოფლიო ორგანიზაციასთან თანამშრომლობის სამთავრობო კომისია (შემდგომში – კომისია) შექმნილია საქართველოს მთავრობის 2005 წლის 31 მაისის №95 დადგენილების პირველი პუნქტით.

2. კომისია თავისი საქმიანობისას ხელმძღვანელობს საქართველოს კონსტიტუციით, მოქმედი კანონმდებლობით, საქართველოს პრეზიდენტისა და საქართველოს მთავრობის აქტებით.

II. კომისიის ფუნქციები

კომისიის ფუნქციებია:

1. კოორდინაცია გაუწიოს ვაჭრობის მსოფლიო ორგანიზაციასთან საქართველოს ურთიერთობებს.

2. აწარმოოს ოფიციალური მიმოწერა ვაჭრობის მსოფლიო ორგანიზაციასთან.

3. კოორდინაცია გაუწიოს სამინისტროებისა და უწყებებისათვის მსოფლიო სავაჭრო ორგანიზაციიდან მიღებული ინფორმაციის დამუშავებას, ანალიზსა და განზოგადებას.

III. კომისიის უფლებები

კომისიის უფლებებია:

1. მოითხოვოს ყველა სახის საჭირო ინფორმაცია საქართველოს ნებისმიერი სამინისტროს, უწყებისა და ორგანიზაციისაგან.

2. შესაბამისი დავალებები მისცეს სამთავრობო სტრუქტურებს.

3. სამთავრობო სტრუქტურების მიერ წარმოდგენილი დასკვნებისა და წინადადებების საფუძველზე მიაწოდოს რეკომენდაციები საქართველოს მთავრობას.

4. განსაზღვროს სამთავრობო დელეგაციების შემადგენლობა, განიხილოს და დაამტკიცოს მივლინებათა სამუშაო გეგმები და ტექნიკური დავალებანი.

5. ცალკეული უმნიშვნელოვანესი პროექტების განხორციელებისათვის შექმნას სამუშაო ჯგუფები და კოორდინაცია გაუწიოს მათ საქმიანობას.

6. მოამზადოს წინადადებანი კომისიის შემადგენლობაში ცვლილებების შეტანის შესახებ.

IV. კომისიის მუშაობის ორგანიზება

1. კომისია იკრიბება 2 თვეში ერთხელ. რიგგარეშე სხდომის მოწვევა ხდება კომისიის თავმჯდომარისა და კომისიის წევრთა ერთი მესამედის მოთხოვნის საფუძველზე.

2. კომისია უფლებამოსილია, თუ სხდომას ესწრება კომისიის წევრთა ნახევარზე მეტი.

3. კომისიის თითოეულ წევრს აქვს ერთი ხმის უფლება.

4. კომისიის გადაწყვეტილება მიიღება დამსწრე წევრთა ხმების უბრალო უმრავლესობით. ხმათა თანაბრად გაყოფის შემთხვევაში გადამწყვეტი ხმა აქვს თავმჯდომარეს.

V. კომისიის ლიკვიდაცია

კომისიის ლიკვიდაცია ხდება მოქმედი კანონმდებლობის შესაბამისად საქართველოს მთავრობის დადგენილებით.