„თანამდებობის პირთა ქონებრივი და საფინანსო მდგომარეობის საინფორმაციო ბიუროს დებულების დამტკიცების შესახებ“ საქართველოს პრეზიდენტის 1998 წლის 24 მაისის №350 ბრძანებულების ძალადაკარგულად გამოცხადებისა და საქართველოს კონტროლის პალატასთან შექმნილი სახელმწიფო დაწესებულების – თანამდებობის პირთა ქონებრივი და საფინანსო მდგომარეობის საინფორმაციო ბიუროს ლიკვიდაციის თაობაზე

საქართველოს პრეზიდენტის

ბრძანებულება №267

2004 წლის 9 ივლისი

ქ. თბილისი

„თანამდებობის პირთა ქონებრივი და საფინანსო მდგომარეობის საინფორმაციო ბიუროს დებულების დამტკიცების შესახებ“ საქართველოს პრეზიდენტის 1998 წლის 24 მაისის №350 ბრძანებულების ძალადაკარგულად გამოცხადებისა და საქართველოს კონტროლის პალატასთან შექმნილი სახელმწიფო დაწესებულების – თანამდებობის პირთა ქონებრივი და საფინანსო მდგომარეობის საინფორმაციო ბიუროს ლიკვიდაციის თაობაზე

„საჯარო სამსახურში ინტერესთა შეუთავსებლობისა და კორუფციის შესახებ“ საქართველოს კანონის მე-18 მუხლის შესაბამისად:

1. 2004 წლის 15 სექტემბრამდე ლიკვიდირებულ იქნეს საქართველოს კონტროლის პალატასთან შექმნილი სახელმწიფო დაწესებულება – თანამდებობის პირთა ქონებრივი და საფინანსო მდგომარეობის საინფორმაციო ბიურო.

2. საქართველოს იუსტიციის სამინისტრომ (გ. პაპუაშვილი) უზრუნველყოს:

ა) სალიკვიდაციო კომისიის შექმნა და თანამდებობის პირთა ქონებრივი და საფინანსო მდგომარეობის საინფორმაციო ბიუროს ლიკვიდაციასთან დაკავშირებული სხვა ღონისძიებების განხორციელება;

ბ) თანამდებობის პირთა ქონებრივი და საფინანსო მდგომარეობის საინფორმაციო ბიუროს მოსამსახურეთა მიმართ „საჯარო სამსახურის შესახებ“ საქართველოს კანონის 93-ე მუხლითა და შრომის კანონთა კოდექსის 34-ე მუხლით გათვალისწინებული უფლებამოსილების განხორციელება;

გ) თანამდებობის პირთა ქონებრივი და საფინანსო მდგომარეობის საინფორმაციო ბიუროს, როგორც საჯარო სამართლის იურიდიული პირის, ჩამოყალიბებისათვის აუცილებელი ღონისძიებების გატარება.

3. საქართველოს ეკონომიკური განვითარების სამინისტრომ (კ. ბენდუქიძე) უზრუნველყოს შესაბამისი სახელმწიფო ქონების საჯარო სამართლის იურიდიული პირის – თანამდებობის პირთა ქონებრივი და საფინანსო მდგომარეობის საინფორმაციო ბიუროსათვის გადაცემა.

4. საქართველოს ფინანსთა სამინისტრომ (ზ. ნოღაიდელი) უზრუნველყოს საქართველოს კონტროლის პალატასთან შექმნილი სახელმწიფო დაწესებულება – თანამდებობის პირთა ქონებრივი და საფინანსო მდგომარეობის საინფორმაციო ბიუროს დაფინანსებისა და საშტატო რიცხოვნობის საჯარო სამართლის იურიდიული პირის – თანამდებობის პირთა ქონებრივი და საფინანსო მდგომარეობის საინფორმაციო ბიუროსათვის გადაცემა.

5. საქართველოს ზოგადი ადმინისტრაციული კოდექსის 61-ე მუხლის თანახმად, ძალადაკარგულად გამოცხადდეს საქართველოს პრეზიდენტის 1998 წლის 24 მაისის №350 ბრძანებულება „თანამდებობის პირთა ქონებრივი და საფინანსო მდგომარეობის საინ-ფორმაციო ბიუროს დებულების დამტკიცების შესახებ“ (საქართველოს პრეზიდენტის ბრძანებულებები და განკარგულებები, კრებული №10, გვ. 78).

6. ამ ბრძანებულების მე-5 პუნქტი ამოქმედდეს საჯარო სამართლის იურიდიული პირის – თანამდებობის პირთა ქონებრივი და საფინანსო მდგომარეობის საინფორმაციო ბიუროს დებულების ამოქმედებისა და წარმომადგენლობაზე უფლებამოსილი პირის დანიშვნისთანავე.

მ. სააკაშვილი