"თვითმმართველი ქალაქ ფოთის ტერიტორიაზე წვრილფეხა ან/და მსხვილფეხა პირუტყვის მეთვალყურეობის ქვეშ ან მეთვალყურეობის გარეშე ყოფნის წესების დამტკიცებისა და გასატარებელი ღონისძიებების შესახებ"

თვითმმართველი ქალაქ ფოთის საკრებულოს

დადგენილება №1/1

2011 წლის 13 იანვარი

ქ. ფოთი

თვითმმართველი ქალაქ ფოთის ტერიტორიაზე წვრილფეხა ან/და მსხვილფეხა პირუტყვის მეთვალყურეობის ქვეშ ან მეთვალყურეობის გარეშე ყოფნის წესების დამტკიცებისა და გასატარებელი ღონისძიებების შესახებ

თვითმმართველი ქალაქ ფოთის საკრებულო აღნიშნავს, რომ საქართველოს ადმინისტრაციული სამართალდარღვევათა კოდექსის 148-ე მუხლის მე-3 ნაწილის შესაბამისად, თვითმმართველი ქალაქის წარმომადგენლობითი ორგანოს მიერ დადგენილი წესების დარღვევით თვითმმართველი ქალაქის ტერიტორიაზე წვრილფეხა ან/და მსხვილფეხა პირუტყვის მეთვალყურეობის ქვეშ ან მეთვალყურეობის გარეშე ყოფნა, გარდა პირუტყვის მესაკუთრის საკუთრებაში ან/და სარგებლობაში არსებული სასოფლო-სამეურნეო დანიშნულების მიწის ნაკვეთისა, გამოიწვევს წვრილფეხა ან/და მსხვილფეხა პირუტყვის მესაკუთრის დაჯარიმებას 20 ლარის ოდენობით.

ამდენად, მიზანშეწონილია დამტკიცდეს თვითმმართველი ქალაქ ფოთის ტერიტორიაზე წვრილფეხა ან/და მსხვილფეხა პირუტყვის მეთვალყურეობის ქვეშ ან მეთვალყურეობის გარეშე ყოფნის წესები.

 საქართველოს ადმინისტრაციული სამართალდარღვევათა კოდექსის 148-ე მუხლის მე-3 ნაწილის, „ნორმატიული აქტების შესახებ“ საქართველოს კანონის მე-20 მუხლის, „ადგილობრივი თვითმმართველობის შესახებ“ საქართველოს ორგანული კანონის 43-ე მუხლის შესაბამისად:

1. დამტკიცდეს თვითმმართველი ქალაქ ფოთის ტერიტორიაზე წვრილფეხა ან/და მსხვილფეხა პირუტყვის მეთვალყურეობის ქვეშ ან მეთვალყურეობის გარეშე ყოფნის წესები თანახმად დანართი 1-ისა.

2.    საქართველოს ადმინისტრაციული სამართალდარღვევათა კოდექსის 2093-ე მუხლის პირველი ნაწილის, 239-ე მუხლის მე-14 ნაწილის შესაბამისად, ამავე კოდექსის 148-ე მუხლის მე-3 და მე-4 ნაწილებით, 151-ე მუხლის მე-3 ნაწილით გათვალისწინებულ ადმინისტრაციულ სამართალდარღვევათა შესახებ ოქმები შეადგინოს და საქმეები განიხილოს თვითმმართველი ქალაქ ფოთის საკრებულოს თავმჯდომარის ინდივიდუალურ-სამართლებრივი აქტით (ბრძანება) განსაზღვრულმა პირმა, რომელიც თვითმმართველი ქალაქ ფოთის შესყიდვების გეგმის შესაბამისად გამოცხადებულ გამარტივებულ ელექტრონულ ტენდერში გამარჯვებული პირია და მასთან არის გაფორმებული სახელმწიფო შესყიდვების ხელშეკრულება თვითმმართველი ქალაქ ფოთის ადმინისტრაციულ-ტერიტორიულ საზღვრებში უმელთვალყურეოდ მიტოვებული, მოხეტიალე შინაური ცხოველების მოვლა-პატრონობისა და დაჭერა-იზოლირებასთან დაკავშირებით.

3.    ეს დადგენილება ამოქმედდეს გამოქვეყნებისთანავე.

საკრებულოს თავმჯდომარე                   ი. საღინაძე

დანართი 1

თვითმმართველი ქალაქ ფოთის ტერიტორიაზე წვრილფეხა ან/და მსხვილფეხა პირუტყვის მეთვალყურეობის ქვეშ ან მეთვალყურეობის გარეშე ყოფნის წესები

მუხლი 1. ეს წესი ვრცელდება იმ პირებზე, რომლებსაც თვითმმართველი ქალაქ ფოთის ადმინისტრაციულ-ტერიტორიულ საზღვრებში მფლობელობაში ჰყავთ წვრილფეხა ან/და მსხვილფეხა პირუტყვი.

მუხლი 2. თვითმმართველი ქალაქ ფოთის ადმინისტრაციულ-ტერიტორიულ საზღვრებში წვრილფეხა ან/და მსხვილფეხა პირუტყვის შენახვა დასაშვებია მხოლოდ პირის საკუთრებაში ან/და სარგებლობაში არსებული სასოფლო-სამეურნეო დანიშნულების მიწის ნაკვეთზე.

მუხლი 3. წვრილფეხა ან/და მსხვილფეხა პირუტყვის მესაკუთრეები (მეპატრონეები) ვალდებულნი არიან:

1. არ დაუშვან წვრილფეხა ან/და მსხვილფეხა პირუტყვის გაშვება მათ საკუთრებაში ან/და სარგებლობაში არსებული სასოფლო-სამეურნეო დანიშნულების მიწის ნაკვეთის გარეთ;

2. მკაცრად დაიცვან წვრილფეხა ან/და მსხვილფეხა პირუტყვის შენახვის წესები.

მუხლი 4. უმეთვალყურეოდ (უპატრონოდ) მიტოვებული წვრილფეხა ან/და მსხვილფეხა პირუტყვის იზოლირება-განთავსება ხდება სპეციალურად გამოყოფილ ადგილზე (სადგომზე), საქართველოს ადმინისტრაციულ სამართალდაღვევათა კოდექსის შესაბამისად.

მუხლი    5. აღნიშნული წესის დაღვევა იწვევს საქართველოს ადმინისტრაციულ სამართალადაღვევათა კოდექსის 148-ე მუხლის მე-3 და მე-4 ნაწილებით, 151-ე მუხლის მე-3 ნაწილით გათვალისწინებულ პასუხისმგებლობას.