ნორმატიული აქტების აღრიცხვის, სისტემატიზაციისა და გამოქვეყნების დროებითი წესის დამტკიცების თაობაზე

სახელმწიფო სარეგისტრაციო კოდი 040.150.000.22.027.014.858

საქართველოს იუსტიციის

მინისტრის ბრძანება №134

2010 წლის 14 ივლისი

ქ. თბილისი

ნორმატიული აქტების აღრიცხვის, სისტემატიზაციისა და გამოქვეყნების  დროებითი წესის დამტკიცების თაობაზე

„ნორმატიული აქტების შესახებ“ საქართველოს კანონის 30-ე მუხლის მე-5 პუნქტის  შესაბამისად, ვბრძანებ:

1. დამტკიცდეს:

ა) „ნორმატიული აქტების აღრიცხვის, სისტემატიზაციისა და გამოქვეყნების დროებითი წესი“;

ბ)  ნორმატიული აქტების სახელმწიფო რეესტრის ფორმა (დანართი №1);

გ)  ნორმატიული აქტების სახელმწიფო რეესტრის საერთაშორისო ხელშეკრულებების ნაწილის  ფორმა (დანართი №2);

დ) ნორმატიული აქტების სახელმწიფო რეესტრის საიდუმლო ნაწილის ფორმა (დანართი №3).

2. ძალადაკარგულად გამოცხადდეს „ნორმატიული აქტების სახელმწიფო რეესტრის წარმოების შესახებ დროებითი დებულების დამტკიცების თაობაზე“ საქართველოს იუსტიციის მინისტრის 2009 წლის 29 დეკემბრის №238 ბრძანება.

3. ეს ბრძანება ძალაშია 2010 წლის 15 ივლისიდან 2011 წლის 1 იანვრამდე.

ზ. ადეიშვილი

ნორმატიული აქტების აღრიცხვის, სისტემატიზაციისა და გამოქვეყნების დროებითი წესი

    მუხლი 1

1. ნორმატიული აქტების სახელმწიფო აღრიცხვისა და სისტემატიზაციის მიზნით იქმნება  ნორმატიული აქტების სახელმწიფო რეესტრი (შემდგომში – სახლმწიფო რეესტრი), რომლის წარმოებას უზრუნველყოფს საჯარო სამართლის იურიდიული პირი – საქართველოს საკანონმდებლო მაცნე (შემდგომში – საქართველოს საკანონმდებლო მაცნე).

2. სახელმწიფო რეესტრი წარმოებს ბეჭდვითი ან/და ელექტრონული ფორმით.

3. სახელმწიფო რეესტრში შეიტანება ყველა ნორმატიული აქტი. „საიდუმლო“ გრიფის მქონე ნორმატიული აქტი ან ნორმატიული აქტის ასეთივე გრიფის მქონე ნაწილი შეიტანება სახელმწიფო რეესტრის „საიდუმლო“ ნაწილში. სახელმწიფო რეესტრის „საიდუმლო“ ნაწილში შეტანილი ინფორმაციის გაცნობის პირობები და წესი განისაზღვრება „სახელმწიფო საიდუმლოების შესახებ“ საქართველოს კანონით.

    მუხლი 2

1. ნორმატიულ აქტებს სახელმწიფო რეესტრში არეგისტრირებს და აქვეყნებს „საქართველოს საკანონმდებლო მაცნე“.

2. ნორმატიული აქტის მიღების (გამოცემის) უფლების მქონე ორგანოს (თანამდებობის პირის) მიერ მიღებული (გამოცემული) ნორმატიული აქტის გამოსაქვეყნებლად წარდგენა სავალდებულოა.

3. კანონქვემდებარე ნორმატიული აქტის ცალკეულ დებულებათა გამოუქვეყნებლობა დასაშვებია მხოლოდ „სახელმწიფო საიდუმლოების შესახებ“ საქართველოს კანონით განსაზღვრულ შემთხვევებში.

4. რამდენიმე უწყების მიერ ერთობლივად მომზადებული ნორმატიული აქტის  გამოსაქვეყნებლად წარდგენა ევალება იმ უწყებას, რომელიც სიით პირველია მითითებული ნორმატიული აქტის შემუშავებისათვის მიცემულ დავალებაში.

    მუხლი 3

1. ნორმატიული აქტი (გარდა ამ მუხლის მე-2–მე-6 პუნქტებში მითითებული ნორმატიული აქტებისა) „საქართველოს საკანონმდებლო მაცნეს“ გამოსაქვეყნებლად უნდა გაეგზავნოს უფლებამოსილი თანამდებობის პირის მიერ ხელმოწერიდან არა უგვიანეს მეხუთე დღისა. „საქართველოს საკანონმდებლო მაცნე“ ნორმატიულ აქტს არეგისტრირებს ნორმატიული აქტების სახელმწიფო რეესტრში და აქვეყნებს მისთვის გადაცემიდან 5 დღის ვადაში, ხოლო ადგილობრივი თვითმმართველობის ნორმატიულ აქტს არეგისტრირებს და აქვეყნებს საქართველოს იუსტიციის სამინისტროს მიერ სამართლებრივი დასკვნის გაცემიდან 3 დღის ვადაში. ერთობლივი ნორმატიული აქტი, რომელიც უფლებამოსილი თანამდებობის პირების მიერ ხელმოწერილია სხვადასხვა დღეს, „საქართველოს საკანონმდებლო მაცნეს“ გამოსაქვეყნებლად გადაეცემა ბოლო ხელმოწერიდან 3 დღის ვადაში. ერთობლივ ნორმატიულ აქტზე უფლებამოსილი თანამდებობის პირების ხელმოწერის დღეებს შორის სხვაობა არ უნდა აღემატებოდეს 3 დღეს.

2. ადგილობრივი თვითმმართველობის ნორმატიული აქტი „საქართველოს საკანონმდებლო მაცნეს“ გამოსაქვეყნებლად უნდა გაეგზავნოს უფლებამოსილი ორგანოს (თანამდებობის პირის) მიერ მისი მიღებიდან (ხელმოწერიდან) არა უგვიანეს მეორე დღისა.

3. საქართველოს პარლამენტის, აგრეთვე აფხაზეთის ავტონომიური რესპუბლიკის უმაღლესი საბჭოსა და აჭარის ავტონომიური რესპუბლიკის უმაღლესი საბჭოს მიერ მიღებული კანონები ქვეყნდება შესაბამისად საქართველოს კონსტიტუციით, კანონითა და ავტონომიური რესპუბლიკების კონსტიტუციებით დადგენილი წესით.

4. საქართველოს პრეზიდენტის, საქართველოს პარლამენტის, საქართველოს მთავრობის, აგრეთვე აფხაზეთის ავტონომიური რესპუბლიკისა და აჭარის ავტონომიური რესპუბლიკის ნორმატიულ აქტებს (გარდა ამ მუხლის მე-3 პუნქტში მითითებული ნორმატიული აქტებისა) „საქართველოს საკანონმდებლო მაცნეს“ უნდა გადაეცეს და გამოქვეყნდეს მათი მიღებიდან (ხელმოწერიდან) 10 დღის ვადაში.

5. საქართველოს ცენტრალური საარჩევნო კომისიის ნორმატიული აქტი „საქართველოს საკანონმდებლო მაცნეს“ უნდა გადაეცეს და გამოქვეყნდეს მისი მიღებიდან არა უგვიანეს მე-2 დღისა.

6. საქართველოს ეროვნული ბანკის დაუყოვნებლივ ასამოქმედებელი ნორმატიული აქტი „საქართველოს საკანონმდებლო მაცნეს“ უნდა გადაეცეს და გამოქვეყნდეს არა უგვიანეს შემდეგი სამუშაო დღისა.

7. ნორმატიული აქტი „საქართველოს საკანონმდებლო მაცნეს“ გამოსაქვეყნებლად გადაეცემა ბეჭდვითი ფორმით ელექტრონულ ვერსიასთან ერთად, ერთ ეგზემპლარად აკინძული და უფლებამოსილი პირის მიერ ბეჭდითა და ხელმოწერით დამოწმებული. ბეჭდვითი ფორმით ნორმატიული აქტის წარდგენამდე შესაძლებელია მისი ელექტრონული ასლის სახით წარდგენა შესაბამის ელექტრონულ ვერსიასთან ერთად. ამ შემთხვევაში წარმომდგენი პასუხისმგებელია ელექტრონული ასლისა და ბეჭდვითი ნორმატიული აქტის ურთიერთშესაბამისობაზე. ნორმატიული აქტის ელექტრონული ასლის სახით წარდგენის შემთხვევაში წარმომდგენი ვალდებულია 30 დღის ვადაში „საქართველოს საკანონმდებლო მაცნეს“ გადასცეს  ბეჭდვითი ფორმის ნორმატიული აქტი.

8. გამოქვეყნებისათვის წარდგენილ ნორმატიულ აქტს (გარდა ამ მუხლის მე-2 – მე-6 პუნქტებში მითითებული ნორმატიული აქტებისა)  თან უნდა ახლდეს საქართველოს იუსტიციის სამინისტროს მიერ გაცემული დადებითი დასკვნა.

9. გამოქვეყნებისათვის ნორმატიული აქტები მომზადებულ უნდა იქნეს კომპიუტერზე „Windows“-ის სისტემაში შრიფტით „Sylfaen“, არანაკლებ 11 ზომისა, გარდა იმ შემთხვევებისა, როდესაც ნორმატიული აქტი შედგება სქემების, ცხრილებისა და ნუსხებისაგან, რომლებშიც, მათი ფორმატიდან გამომდინარე, შეუძლებელია 11 ან მეტი ზომის შრიფტის გამოყენება.

10. ნორმატიული აქტი, რომლის მოცულობაც ორ ან მეტ გვერდს შეადგენს, გამოსაქვეყნებლად წარდგენილი უნდა იყოს აკინძული. ამ შემთხვევაში ბეჭედი და უფლებამოსილი პირის ხელმოწერა უნდა დაესვას ბოლო ფურცლის უკანა მხარეს ისე, რომ მან მოიცვას ქაღალდის ნაწილი, რომლითაც აკინძულია ნორმატიული აქტი.

    მუხლი 4

1. გამოსაქვეყნებლად წარდგენილი ნორმატიული აქტი მის გამოქვეყნებამდე  რეგისტრირდება სახელმწიფო რეესტრში და ენიჭება სახელმწიფო სარეგისტრაციო კოდი.

2. საქართველოს საკანონმდებლო აქტები, საქართველოს პრეზიდენტის, საქართველოს პარლამენტის, საქართველოს მთავრობის, აფხაზეთისა და აჭარის ავტონომიური რესპუბლიკების, ადგილობრივი თვითმმართველობის  ნორმატიული აქტები რეგისტრირდება ნორმატიული აქტების სახელმწიფო რეესტრის შესაბამის ნაწილში.

3. ბეჭდვითი ფორმის ნორმატიულ აქტს მარჯვენა ზედა კუთხეში დაესმება შტამპი სახელმწიფო სარეგისტრაციო კოდის აღნიშვნით.

4. ნორმატიულ აქტში შეტანილი ცვლილებები და დამატებები ამ დებულებით დადგენილი წესით ექვემდებარება სახელმწიფო რეესტრში რეგისტრაციას და გამოქვეყნებას და ენიჭება დამოუკიდებელი სახელმწიფო სარეგისტრაციო კოდი.

5. გამოქვეყნებულ ნორმატიულ აქტზე აღნიშნული უნდა იქნეს სახელმწიფო სარეგისტრაციო კოდი.

    მუხლი 5

სახელმწიფო რეესტრში შეიტანება ნორმატიული აქტის შესახებ შემდეგი მონაცემები:

ა) ნორმატიული აქტის სახე;

ბ) ნორმატიული აქტის მიმღები (გამომცემი) ორგანოს (თანამდებობის პირის) სახელწოდება;

გ) ნორმატიული აქტის სათაური;

დ) მიღების (გამოცემის) თარიღი და ადგილი;

ე) ნორმატიული აქტის მიმღები (გამომცემი) ორგანოს მიერ მინიჭებული სარეგისტრაციო ნომერი;

ვ) ძალაში შესვლის თარიღი და მოქმედების ვადა (თუ უვადო არ არის);

ზ) გამოქვეყნების წყარო და თარიღი;

თ) ნორმატიული აქტის სახელმწიფო სარეგისტრაციო კოდი;

ი) ნორმატიულ აქტში ცვლილებებისა და დამატებების შეტანის თარიღი.

კ) ინფორმაცია შიდასახელმწიფოებრივი პროცედურების განხორციელების შესახებ (საერთაშორისო ხელშეკრულებების შემთხვევაში).

    მუხლი 6

„საიდუმლო“ გრიფის მქონე ნორმატიული აქტი ან ნორმატიული აქტის ნაწილი შეიტანება სახელმწიფო რეესტრის საიდუმლო ნაწილში.

    მუხლი 7

სახელმწიფო სარეგისტრაციო კოდი შედგება  20-ციფრიანი რიცხვისაგან: „000.000.000.00.000.000.000.“, რომელთაგან პირველი ცხრა წარმოადგენს საქართველოს კანონმდებლობის დარგობრივი კლასიფიკატორის ცალკეული დარგის კოდის საერთო მაჩვენებელს, შემდეგი ორი აღნიშნავს ნორმატიული აქტის სახეს, მომდევნო სამი – ნორმატიული აქტის მიღების (გამოცემის) უფლებამოსილების მქონე ორგანოს ან თანამდებობის პირს (ადგილობრივი თვითმმართველობის ორგანოების (თანამდებობის პირების) ნორმატიული აქტის შემთხვევაში – შესაბამის თვითმმართველ ერთეულს), ხოლო ბოლო ექვსი ციფრი – ნორმატიული აქტის რეგისტრაციის რიგით ნომერს.

    მუხლი 8

1. საქართველოს ნორმატიულ აქტებს მიენიჭება შემდეგი ციფრობრივი კოდები:

2. ავტონომიური რესპუბლიკის ნორმატიულ აქტებს მიენიჭება შემდეგი ციფრობრივი კოდები:

3. ადგილობრივი თვითმმართველობის ნორმატიულ აქტებს მიენიჭებათ შემდეგი ციფრობრივი კოდები:

    მუხლი 9

1. საქართველოს ნორმატიული აქტის მიღების (გამოცემის) უფლებამოსილ ორგანოს (თანამდებობის პირს) მიენიჭება შემდეგი ციფრობრივი კოდი:

2. ავტონომიური რესპუბლიკის ნორმატიული აქტების მიღების (გამოცემის) უფლებამოსილ ორგანოს (თანამდებობის პირს) მიენიჭება შემდეგი ციფრობრივი კოდი:

3. თვითმმართველ ერთეულებს მიენიჭება შემდეგი ციფრობრივი კოდები:

    მუხლი 10

1. ნორმატიული აქტის სისტემატიზაცია გულისხმობს ძირითად ნორმატიულ აქტში შეტანილი ცვლილებების ან/და დამატებების ასახვას და მისი ტექსტის საბოლოო მდგომარეობაში მოყვანას.

2. ნორმატიული აქტის სისტემატიზაციის დაწყებამდე სახელმწიფო რეესტრის შესაბამის გრაფაში შეიტანება იმ ნორმატიული აქტის რეკვიზიტები (მიღების თარიღი, ნომერი, გამოქვეყნების წყარო შესაბამისი მუხლის მითითებით და სახელმწიფო სარეგისტაციო კოდი), რომლითაც  ცვლილებები ან/და დამატებები განხორციელდა ძირითად ნორმატიულ აქტში.

დანართი №1

საქართველოს ნორმატიული აქტების სახელმწიფო რეესტრის ფორმა

დანართი №2

ნორმატიული აქტების სახელმწიფო რეესტრის საერთაშორისო ხელშეკრულებების ნაწილის ფორმა

 დანართი №3

ნორმატიული აქტების სახელმწიფო რეესტრის საიდუმლო ნაწილის ფორმა