საქართველოს დაზვერვის სამსახურის მოსამსახურეთათვის სოციალური დაცვის დამატებითი ღონისძიებებისა და შეღავათების განსაზღვრის შესახებ

სახელმწიფო სარეგისტრაციო კოდი 280.120.000.43.048.014.889

საქართველოს დაზვერვის სამსახურის უფროსის

ბრძანება  №47

2010 წლის 16 ივლისი

ქ. თბილისი

საქართველოს დაზვერვის სამსახურის მოსამსახურეთათვის სოციალური დაცვის დამატებითი ღონისძიებებისა და შეღავათების განსაზღვრის შესახებ

„ნორმატიული აქტების შესახებ“ საქართველოს კანონის 24-ე და 25-ე მუხლების და „საქართველოს დაზვერვის სამსახურის შესახებ“ საქართველოს კანონის 22-ე მუხლის მე-11 პუნქტის შესაბამისად, ვბრძანებ:

1. საქართველოს დაზვერვის სამსახურის (შემდგომში – სამსახური) მოსამსახურეთათვის სამხედრო და სახელმწიფო სპეციალური წოდებრივი (შემდგომში – სპეციალური წოდება) სარგოს ყოველთვიური განაკვეთები განისაზღვროს თანდართული დანართი №1-ის შესაბამისად.

2. სამსახურის მოსამსახურეებს საქართველოს სახელმწიფო ბიუჯეტიდან გამოყოფილი ასიგნებების ფარგლებში შეიძლება მიეცეთ ფულადი ჯილდო (პრემია), აგრეთვე განსაკუთრებულ შემთხვევებში ერთჯერადი დახმარება, რომლის ოდენობასაც განსაზღვრავს სამსახურის უფროსი.

3. კადრების განკარგულებაში ყოფნის პერიოდში სამსახურის მოსამსახურეებს შეუნარჩუნდეთ თანამდებობრივი სარგო, ბოლო დაკავებული თანამდებობის შესაბამისად, არა უმეტეს ორი თვისა.

4. სამსახურის სპეციალური ან სამხედრო წოდების მქონე მოსამსახურეებს, რომლებიც დათხოვნილი არიან სამსახურიდან ზღვრული ასაკის მიღწევისას, რეორგანიზაციისა და შტატების შემცირებასთან დაკავშირებით, კომპენსაციის სახით ეძლევათ 2 თვის თანამდებობრივი სარგო.

5. სამსახურის სპეციალური ან სამხედრო წოდების მქონე მოსამსახურეებს, რომლებიც დათხოვნილი არიან სამსახურიდან პირადი განცხადების (სურვილის) საფუძველზე და საქართველოს ძალოვან სტრუქტურებში (გარდა სამოქალაქო თანამდებობისა) ნამსახურები აქვთ არანაკლებ 10 წლისა, სამსახურის უფროსის გადაწყვეტილებით ეძლევათ ერთჯერადი (გასასვლელი) დახმარება ბოლო დაკავებული თანამდებობრივი სარგოს არა უმეტეს ორმაგი ოდენობისა.

6. სამსახურის სპეციალური ან სამხედრო წოდების მქონე მოსამსახურეებს, სპეციალური ან სამხედრო წოდებით ნამსახურები კალენდარული წლების მიხედვით დაუწესდეთ ფულად სარგოებზე (თანამდებობრივი და წოდებრივი სარგოები) ყოველთვიური პროცენტული (წელთა ნამსახურობის) დანამატი შემდეგი ოდენობით:

ა) 1-დან 2 წლამდე – 5%;

ბ) 2-დან 5 წლამდე – 10%;

გ) 5-დან 10 წლამდე – 15%;

დ) 10 წელი და მეტი – 20%.

7. სამოქალაქო პირისათვის სპეციალური ან სამხედრო წოდების მინიჭების შემთხვევაში, ყოველთვიური პროცენტული (წელთა ნამსახურობის) დანამატის დაანგარიშებისას, სამსახურის უფროსის თანხმობით, განსაკუთრებულ შემთხვევებში ნამსახურობაში ჩაითვლება სამოქალაქო პირის სამსახურში მუშაობის პერიოდი.

8. სამსახურის მოსამსახურეს, სამსახურებრივი მოვალეობის შესრულებისას დაინვალიდების ან/და დასახიჩრების შემთხვევაში, საქართველოს სახელმწიფო ბიუჯეტიდან სამსახურისათვის გამოყოფილი ასიგნებების ფარგლებში, სამსახურის უფროსის სამართლებრივი აქტით ეძლევა ერთჯერადი დახმარება შემდეგი ოდენობით:

ა) სხეულის მძიმე დაზიანების და/ან დაინვალიდების შემთხვევაში – 10 000 (ათი ათასი) ლარი;

ბ) სხეულის ნაკლებად მძიმე დაზიანებისას – 7000 (შვიდი ათასი) ლარი;

გ) სხეულის მსუბუქი დაზიანებისას – 3 000 (სამი ათასი) ლარი.

9. სამსახურებრივი მოვალეობის შესრულებისას სამსახურის მოსამსახურის დაღუპვის (გარდაცვალების) შემთხვევაში, მის ოჯახს (მემკვიდრეს) დაკრძალვის (საფლავის მოწყობის) ხარჯების ანაზღაურების მიზნით, ეძლევა ერთჯერადი დახმარება 500 (ხუთასი) ლარის ოდენობით.

10. სამსახურის მოსამსახურეებს აქვთ პროფესიული განათლების მიღების, სამხედრო და სხვა სასწავლო დაწესებულებაში შესვლის, მომზადების, გადამზადების, კვალიფიკაციის ამაღლების კურსებზე სწავლის უფლება. სწავლების ღირებულების ხარჯები შესაძლებელია ანაზღაურდეს ნაწილობრივ ან მთლიანად საქართველოს სახელმწიფო ბიუჯეტიდან სამსახურისათვის გამოყოფილი ასიგნებების ფარგლებში.

11. სამსახურის მოსამსახურე და მისი ოჯახი (მეუღლე და არასრულწლოვანი შვილები) ექვემდებარება სავალდებულო დაზღვევას, რომლის ხარჯებიც ანაზღაურდება საქართველოს სახელმწიფო ბიუჯეტიდან სამსახურისათვის გამოყოფილი ასიგნებების ფარგლებში. ამასთან, გამონაკლის შემთხვევებში, მოსამსახურეებს სამსახურის უფროსის მიერ დადგენილი წესის მიხედვით შეიძლება მიეცეთ უფლება ინდივიდუალურად გააფორმონ ხელშეკრულება შესაბამის სადაზღვევო კომპანიასთან, რომლის ფინანსური უზრუნველყოფაც განხორციელდება საქართველოს სახელმწიფო ბიუჯეტიდან სამსახურისათვის გამოყოფილი ასიგნებების ფარგლებში.

12. ძალადაკარგულად გამოცხადდეს „საქართველოს საგარეო დაზვერვის სპეციალური სამსახურის მოსამსახურეთათვის სოციალური დაცვის დამატებითი ღონისძიებებისა და შეღავათების განსაზღვრის შესახებ“ საქართველოს საგარეო დაზვერვის სპეციალური სამსახურის უფროსის 2008 წლის 28 მარტის №20 ბრანება.

13. ეს ბრძანება, გარდა მე-6 პუნქტისა, ამოქმედდეს გამოქვეყნებისთანავე და გავრცელდეს 2010 წლის 1 ივლისიდან წარმოშობილ ურთიერთობებზე.

14. ბრძნების მე-6 პუნქტი ამოქმედდეს 2011 წლის 1 იანვრიდან.

გ. ბეჟუაშვილი

დანართი №1

საქართველოს დაზვერვის სამსახურის მოსამსახურეთათვის სამხედრო და სახელმწიფო სპეციალური წოდებრივი სარგოს ყოველთვიური განაკვეთები