„საჯარო სამართლის იურიდიული პირის _ საქართველოს საავადმყოფოთა რესტრუქტურიზაციის ფონდის შექმნის შესახებ“ საქართველოს პრეზიდენტის 2000 წლის 4 აგვისტოს №350 ბრძანებულებით დამტკიცებულ ფონდის დებულებასა და სამეთვალყურეო საბჭოს შემადგენლობაში ცვლილებების შეტანის თაობაზე”

საქართველოს პრეზიდენტის

ბრძანებულება №166

2005 წლის 24 მარტი

ქ. თბილისი

„საჯარო სამართლის იურიდიული პირის – საქართველოს საავადმყოფოთა რესტრუქტურიზაციის ფონდის შექმნის შესახებ“ საქართველოს პრეზიდენტის 2000 წლის 4 აგვისტოს №350 ბრძანებულებით დამტკიცებულ ფონდის დებულებასა და სამეთვალყურეო საბჭოს შემადგენლობაში ცვლილებების შეტანის თაობაზე

საჯარო სამართლის იურიდიული პირის – საქართველოს საავადმყოფოთა რესტრუქტურიზაციის ფონდის მიერ „სამედიცინო დაწესებულებათა რესტრუქტურიზაციისა და ოპტიმიზაციის პროგრამის“ შეუფერხებელი განხორციელების უზრუნველყოფის მიზნით:

1. „საჯარო სამართლის იურიდიული პირის – საქართველოს საავადმყოფოთა რესტრუქტურიზაციის ფონდის შექმნის შესახებ“ საქართველოს პრეზიდენტის 2000 წლის 4 აგვისტოს №350 ბრძანებულების (სსმ III, №71, მუხ. 668) მე-2 პუნქტით დამტკიცებულ საქართველოს საავადმყოფოთა რესტრუქტურიზაციის ფონდის დებულებაში შეტანილ იქნეს შემდეგი ცვლილებები:

ა) დებულების მე-7 მუხლის „ა“ ქვეპუნქტი ჩამოყალიბდეს შემდეგი რედაქციით:

„ა) საავადმყოფოთა რესტრუქტურიზაციის დამტკიცებული გეგმით განსაზღვრული და შერჩეული საავადმყოფოების, ჯანდაცვის სხვა ობიექტების პრივატიზაციისა და სახელმწიფო საკუთრებაში მყოფი საავადმყოფოების, ჯანდაცვის სხვა ობიექტების იჯარით გაცემის პროცესში საქართველოს ეკონომიკური განვითარების სამინისტროსთან ერთად მონაწილეობის მიღება;“;

ბ) ამოღებულ იქნეს მე-7 მუხლის „გ“ ქვეპუნქტი;

გ) მე-7 მუხლის „ი“ ქვეპუნქტი ჩამოყალიბდეს შემდეგი რედაქციით:

„ი) სახელმწიფო ბიუჯეტიდან დადგენილი წესით მიღებულ სახსრებს ფონდი იყენებს შემდეგი მიზნებისათვის:

ი.ა) საზოგადოებრივ სექტორში დარჩენილ სამედიცინო დაწესებულებათა შენობების ინფრასტრუქტურის გაუმჯობესებისა და რემოდელირებისათვის;

ი.ბ) დაწესებულებათა სამედიცინო აპარატურით აღჭურვისათვის;

ი.გ) ადამიანური რესურსების პროგრამების დაფინანსებისათვის, რომლებიც ითვალისწინებენ შემცირებული პერსონალის კომპენსაციებს, დარჩენილი პერსონალის გადამზადებას და სხვ.;

ი.დ) საავადმყოფოთა რესტრუქტურიზაციასთან დაკავშირებული საზოგადოებრივ ურთიერთობათა პროგრამების დაფინანსებისათვის;

ი.ე) ფონდის საოპერაციო ხარჯების დასაფარავად.“;

დ) მე-8 მუხლის „ა“ ქვეპუნქტი ჩამოყალიბდეს შემდეგი რედაქციით:

„ა) სახელმწიფო ბიუჯეტიდან დადგენილი წესით მიღებული თანხებით;“;

ე) 25-ე მუხლი ჩამოყალიბდეს შემდეგი რედაქციით:

„25. ფონდმა დადგენილი წესით საქართველოს შრომის, ჯანმრთელობისა და სოციალური დაცვის სამინისტროსა და საქართველოს ეკონომიკური განვითარების სამინისტროს თანხმობით შეიძლება განახორციელოს ქონების შეძენა, გასხვისება და დატვირთვა.“.

2. ბრძანებულების მე-3 პუნქტით დამტკიცებული საჯარო სამართლის იურიდიული პირის – საქართველოს საავადმყოფოთა რესტრუქტურიზაციის ფონდის სამეთვალყურეო საბჭო განისაზღვროს შემდეგი შემადგენლობით:

ვლადიმერ ჭიპაშვილი – საქართველოს შრომის, ჯანმრთელობისა და სოციალური დაცვის მინისტრი, საბჭოს თავმჯდომარე

გრიგოლ გობეჯიშვილი – საქართველოს ფინანსთა მინისტრის მოადგილე

მანანა მაისურაძე – საქართველოს ექიმთა თავისუფალი პროფკავშირის „სოლიდარობის“ წევრი

კახი პაპოშვილი – ჯანმრთელობის ეროვნული ინსტიტუტის დირექტორი

ვაჟა პეტრიაშვილი – საქართველოს ეკონომიკური განვითა­რე­ბის მინისტრის მოადგილე

მამუკა ჯაფარიძე – საქართველოს ჯანმრთელობისა და სოციალური პროექტების განმახორციელე­ბელი ცენტრის დირექტორის მოადგილე.

მ. სააკაშვილი