„სასაქონლო ზედნადების გამოწერისა და გამოყენების შესახებ“ ინსტრუქციის დამტკიცების თაობაზე“ საქართველოს ფინანსთა მინისტრის 2005 წლის 14 თებერვლის №86 ბრძანებაში დამატების შეტანის შესახებ“

სახელმწიფო სარეგისტრაციო კოდი 200.250.000.22.033.014.022

საქართველოს ფინანსთა მინისტრის

ბრძანება №907

2009 წლის 30 დეკემბერი

ქ. თბილისი

„სასაქონლო ზედნადების გამოწერისა და გამოყენების შესახებ“ ინსტრუქციის დამტკიცების თაობაზე“ საქართველოს ფინანსთა მინისტრის 2005 წლის  14 თებერვლის №86 ბრძანებაში დამატების შეტანის შესახებ

საქართველოს ზოგადი ადმინისტრაციული კოდექსის 63-ე მუხლის შესაბამისად, ვბრძანებ:

მუხლი 1. „სასაქონლო ზედნადების გამოწერისა და გამოყენების შესახებ“ ინსტრუქციის დამტკიცების თაობაზე“ საქართველოს ფინანსთა მინისტრის 2005 წლის 14 თებერვლის №86 ბრძანებით (სსმ III, 17.02.2005 წ., №18, მუხ. 172) დამტკიცებულ ინსტრუქციას დაემატოს შემდეგი შინაარსის მე-5 მუხლი:

    „მუხლი 5. ზედნადების გამოწერისა და გამოყენების განსაკუთრებული შემთხვევები

1. ამ ინსტრუქციის მე-3 და მე-4 მუხლებით გათვალისწინებულის გარდა, ზედნადები (დანართი №1) ან გამარტივებული ფორმის სასაქონლო ზედნადები (დანართი №2) შეიძლება გამოყენებულ იქნეს ექსპორტის საბაჟო რეჟიმში საქონლის დეკლარირებისას (გარდა შავი ან/და ფერადი ლითონების ჯართის ან სატრანსპორტო საშუალებების ექსპორტისა).

2. ამ მუხლის პირველი პუნქტით გათვალისწინებული მიზნისათვის, პირის მოთხოვნისას, დასაშვებია ზედნადების დამატებითი ეგზემპლარის გამოწერა, რომელიც წარედგინება და რჩება ექსპორტის საბაჟო რეჟიმის განხორციელების სასაზღვრო საბაჟო ორგანოს.

3. ზედნადები არ წარმოადგენს გადასახდების ჩათვლის მიღების საფუძველს.“.

მუხლი 2. ეს ბრძანება ამოქმედდეს გამოქვეყნებიდან მე-15 დღეს.

კ. ბაინდურაშვილი