„საქართველოს თავდაცვის სამინისტროს ადმინისტრაციის დებულების დამტკიცების თაობაზე“ საქართველოს თავდაცვის მინისტრის 2009 წლის 13 იანვრის №18 ბრძანებაში დამატებისა და ცვლილებების შეტანის თაობაზე“

სახელმწიფო სარეგისტრაციო კოდი 010.320.010.22.026.013.745

საქართველოს თავდაცვის

მინისტრის ბრძანება №662

2009 წლის 6 ნოემბერი

ქ. თბილისი

„საქართველოს თავდაცვის სამინისტროს ადმინისტრაციის დებულების დამტკიცების თაობაზე“ საქართველოს თავდაცვის მინისტრის 2009 წლის 13 იანვრის №18 ბრძანებაში დამატებისა და ცვლილებების შეტანის თაობაზე

„ნორმატიული აქტების შესახებ“ საქართველოს კანონის 36-ე მუხლის პირველი პუნქტის შესაბამისად, ვბრძანებ:

    მუხლი 1

„საქართველოს თავდაცვის სამინისტროს ადმინისტრაციის დებულების დამტკიცების თაობაზე“ საქართველოს თავდაცვის მინისტრის 2009 წლის 13 იანვრის №18 ბრძანებით (სსმ III, 14.01.2009, №4, მუხ.32) დამტკიცებულ დებულებაში შეტანილ იქნეს შემდეგი დამატება და ცვლილებები:

ა) მე-2 მუხლის პირველ პუნქტს დაემატოს შემდეგი შინაარსის „ი“ ქვეპუნქტი:

„ი) საზოგადოებასთან და მასობრივი ინფორმაციის საშუალებებთან სამინისტროს ურთიერთობის უზრუნველყოფა.“

ბ) მე-4 მუხლის პირველი პუნქტის „ვ“ ქვეპუნქტი ჩამოყალიბდეს შემდეგი რედაქციით:

„ვ) საზოგადოებრივ საქმეთა დეპარტამენტი;“;

გ) მე-10 მუხლი ჩამოყალიბდეს შემდეგი რედაქციით:

    „მუხლი 10

„1. საზოგადოებრივ საქმეთა დეპარტამენტის ქვედანაყოფებია:

ა) საზოგადოებასთან და მასმედიასთან ურთიერთობის სამმართველო:

ა.ა) საზოგადოებასთან ურთიერთობის განყოფილება;

ა.ბ) მედიასთან ურთიერთობის განყოფილება;

ბ) დაგეგმვის, პოლიტიკისა და ანალიზის სამმართველო.

2. საზოგადოებრივ საქმეთა დეპარტამენტი ახორციელებს შემდეგ ფუნქციებს:

ა) საზოგადოებრივი აზრის ჩამოყალიბებისათვის თემატური ინფორმაციების დამუშავება;

ბ) საზოგადოებრივი აზრის შესწავლის მიზნით, კვლევითი და ანალიტიკური სამუშაოების ჩატარება;

გ) სამხედრო-სამოქალაქო ურთიერთობების გაღრმავების მიზნით, შესაბამისი ღონისძიებების დაგეგმვა და განხორციელება;

დ) საქართველოს შეიარაღებულ ძალებში მიმდინარე პროცესების (რეფორმები, სწავლებები, ოფიციალური შეხვედრები, ვიზიტები და ა.შ.) ამსახველი ინფორმაციის მომზადება და გავრცელება;

ე) საზოგადოებისა და მასმედიის წარმომადგენლებთან თემატური შეხვედრების, პრესკონფერენციებისა და ბრიფინგების მოწყობა;

ვ) ინფორმაციის გავრცელება საინფორმაციო არხების მეშვეობით;

ზ) სამინისტროს სახელმწიფო შესყიდვების დეპარტამენტისათვის განაცხადის წარდგენა ჟურნალ-გაზეთების, ბროშურების, პლაკატებისა და სხვა ბეჭდვითი პროდუქციის მომზადების მიზნით როგორც სამხედრო მოსამსახურეთათვის, ასევე საზოგადოების ფართო ფენებისათვის;

თ) სამინისტროს ხელმძღვანელობის ოპერატიული ინფორმირება საზოგადოებრივი აზრის შესახებ, საქართველოს შეიარაღებულ ძალებში მიმდინარე პროცესებთან დაკავშირებით;

ი) მასმედიის წარმომადგენელთა დაშვების ორგანიზება სამხედრო ობიექტებზე;

კ) საომარი და/ან საგანგებო მდგომარეობის ან სხვა განსაკუთრებული სიტუაციების, საბრძოლო მოქმედებების დროს მასმედიის წარმომადგენლებთან მუშაობის დაგეგმვა და კოორდინირება;

ლ) სპეციალური ინსტრუქციების შემუშავება და გამოცემა, აგრეთვე ლექცია-სემინარების ორგანიზება, რომლებიც დაეხმარება სამხედრო მოსამსახურეებს მასობრივი ინფორმაციის საშუალებების წარმომადგენლებთან ურთიერთობაში;

მ) თავისი კომპეტენციის ფარგლებში, სახელმწიფო, არასამთავრობო, საზოგადოებრივ, ჰუმანიტარულ თუ რელიგიურ ორგანიზაციებთან ურთიერთობების დამყარება;

ნ) ერთიანი სამხედრო-საინფორმაციო პოლიტიკის გატარების მიზნით, საქართველოს შეიარაღებული ძალების იმ ქვედანაყოფებთან და სამხედრო მოსამსახურეებთან მჭიდრო თანამშრომლობა და მათი საერთო ხელმძღვანელობა, რომლებიც ახორციელებენ საზოგადოებრივ ურთიერთობათა ფუნქციებს;

ო) სამინისტროს ვებგვერდის საინფორმაციო უზრუნველყოფა;

პ) საზოგადოებრივ მაუწყებელთან და კერძო სამაუწყებლო კომპანიებთან ერთად ერთობლივი სატელევიზიო პროექტების შემუშავება.“.

    მუხლი 2

  ბრძანება ამოქმედდეს გამოქვეყნებისთანავე.

 ბ. ახალაია