,,საჯარო სამართლის იურიდიული პირის – სამოქალაქო რეესტრის სააგენტოს დებულების დამტკიცების შესახებ“ საქართველოს იუსტიციის მინისტრის 2006 წლის 30 იანვრის №209 ბრძანებაში ცვლილებებისა და დამატებების შეტანის თაობაზე“

სახელმწიფო სარეგისტრაციო კოდი 040.030.000.22.027.013.276

საქართველოს იუსტიციის მინისტრის

ბრძანება №131

2009 წლის 14 ივლისი

ქ. თბილისი

,,საჯარო სამართლის იურიდიული პირის – სამოქალაქო რეესტრის სააგენტოს დებულების დამტკიცების შესახებ“ საქართველოს იუსტიციის მინისტრის 2006 წლის 30 იანვრის №209 ბრძანებაში ცვლილებებისა და დამატებების შეტანის თაობაზე

,,ნორმატიული აქტების შესახებ“ საქართველოს კანონის 36-ე მუხლის შესაბამისად, ვბრძანებ:

მუხლი 1. ,,საჯარო სამართლის იურიდიული პირის – სამოქალაქო რეესტრის სააგენტოს დებულების დამტკიცების შესახებ“ საქართველოს იუსტიციის მინისტრის 2006 წლის 30 იანვრის №209 ბრძანებით (სსმ III, 2006 წ., №12, მუხ. 138) დამტკიცებულ საჯარო სამართლის იურიდიული პირის – სამოქალაქო რეესტრის სააგენტოს დებულებაში შეტანილ იქნეს შემდეგი ცვლილებები და დამატებები:

1. პირველი მუხლის მე-5 პუნქტი ჩამოყალიბდეს შემდეგი რედაქციით:

,,5. სააგენტოს აქვს დამოუკიდებელი ბალანსი, საბანკო ანგარიში, ემბლემა და ბეჭდები საქართველოს სახელმწიფო გერბის გამოსახულებით, იურიდიული პირის სხვა რეკვიზიტები.“.

2. მე-3 მუხლს დაემატოს შემდეგი შინაარსის ,,ჟ¹“ ქვეპუნქტი:

,,ჟ¹) კანონმდებლობით დადგენილი წესით, უცხო სახელმწიფოში გასაგზავნად განკუთვნილი, საქართველოში გაცემული დოკუმენტების გაფორმება – ლეგალიზაცია და აპოსტილით დამოწმება.“.

3. მე-5 მუხლის:

 ა) პირველ პუნქტს დაემატოს შემდეგი შინაარსის ,,ზ³“ და ,,ზ⁴“ ქვეპუნქტები:

,,ზ³) განსაზღვრავს ხმარებიდან ამოღებული ბეჭდების, ბლანკებისა და სხვა დოკუმენტების უტილიზაციის (განადგურების) წესს, კანონმდებლობით გათვალისწინებული შემთხვევების გარდა;

ზ⁴) ადგენს სააგენტოს მიერ გამოსაყენებელი მკაცრი აღრიცხვის ფორმებისათვის სერიისა და ნომრის მინიჭების წესს;“;

ბ) პირველი პუნქტის ,,კ¹“ ქვეპუნქტი ჩამოყალიბდეს შემდეგი რედაქციით:

,,კ¹) ამტკიცებს სააგენტოს, მისი სტრუქტურული ქვედანაყოფების და ტერიტორიული სამსახურების ბეჭდებისა და შტამპების სტანდარტულ ნიმუშებს და ტერიტორიული სამსახურების კოდურ აღნიშვნებს;“;

გ) პირველ პუნქტს დაემატოს შემდეგი შინაარსის ,,ლ¹“ ქვეპუნქტი:

,,ლ¹) განსაზღვრავს დოკუმენტების აპოსტილით დამოწმების და ლეგალიზაციის განმახორციელებელი სტრუქტურული ერთეულის და ტერიტორიული სამსახურების ფარგლებში ხელმოწერის განხორციელებაზე უფლებამოსილ პირებს;“.

4. მე-6 მუხლის მე-2 პუნქტს დაემატოს შემდეგი შინაარსის ,,ბ²“ ქვეპუნქტი:

,,ბ²) აპოსტილისა და ლეგალიზაციის სამმართველო.“.

5. მე-7 მუხლს დაემატოს შემდეგი შინაარსის 2² პუნქტი:

,,2². აპოსტილისა და ლეგალიზაციის სამმართველო:

ა) ახორციელებს უცხო სახელმწიფოში გასაგზავნად განკუთვნილი, საქართველოში გაცემული დოკუმენტების გაფორმებას – ლეგალიზაციას და აპოსტილით დამოწმებას;

ბ) უზრუნველყოფს აპოსტილისა და ლეგალიზაციის სარეგისტრაციო ჟურნალების წარმოებასა და შენახვას;

გ) ახორციელებს ლეგალიზაციას ან აპოსტილით დამოწმებას დაქვემდებარებული ქართულენოვანი დოკუმენტების უცხოურ ენაზე თარგმნას;

დ) ახორციელებს ამ დებულებითა და სხვა ნორმატიული აქტებით გათვალისწინებულ უფლებამოსილებებს.“.

მუხლი 2. ეს ბრძანება ამოქმედდეს 2009 წლის 15 ივლისიდან.

ზ. ადეიშვილი