,,სამედიცინო-სოციალურ ექსპერტიზაზე კონტროლის სახელმწიფო პროგრამის დამტკიცების შესახებ“

სახელმწიფო სარეგისტრაციო კოდი 470.230.000.22.035.011.835

საქართველოს შრომის, ჯანმრთელობისა და სოციალური დაცვის მინისტრის

 ბრძანება №119/ნ

2008 წლის 15 მაისი

ქ. თბილისი

სამედიცინო-სოციალურ ექსპერტიზაზე კონტროლის სახელმწიფო პროგრამის დამტკიცების შესახებ

„ საქართველოს 2008 წლის სახელმწიფო ბიუჯეტის შესახებ“ საქართველოს კანონის 48-ე მუხლის მე-2, მე-9, მე-11 პუნქტებისა და „ საქართველოს შრომის, ჯანმრთელობისა და სოციალური დაცვის სამინისტროს დებულების დამტკიცების შესახებ“ საქართველოს მთავრობის 2005 წლის 31 დეკემბრის №249 დადგენილებით დამტკიცებული დებულების მე-5 მუხლის მე-2 პუნქტის „ნ“ ქვეპუნქტის შესაბამისად, ვბრძანებ:

   მუხლი 1

დამტკიცდეს „ სამედიცინო-სოციალურ ექსპერტიზაზე კონტროლის“  სახელმწიფო პროგრამა (დანართი 1).

    მუხლი 2

ბრძანება ამოქმედდეს გამოქვეყნებისთანავე.

  ა. კვიტაშვილი

დანართი №1

სამედიცინო-სოციალურ ექსპერტიზაზე კონტროლის სახელმწიფო პროგრამა

    მუხლი 1. პროგრამის ზოგადი მიმოხილვა

სამედიცინო-სოციალური ექსპერტიზა შეზღუდული შესაძლებლობის მქონე პირთა და იმ პირთა, რომლებიც საჭიროებენ დამხმარე საშუალებებს, სოციალური დაცვის ერთ-ერთი მნიშვნელოვანი მიმართულებაა, რომელიც განსაზღვრავს ადამიანის სამედიცინო და სოციალური სტატუსის დარღვევის ან დაკარგვის ხარისხს, სახელმწიფოს მიერ გარანტირებული მუდმივი ან დროებითი ეკონომიკური, სოციალური და სამართლებრივი ღონისძიებების საშუალებით ხელს უწყობს შეზღუდული შესაძლებლობის სტატუსის მქონე პირის ან იმ პირის, რომელიც საჭიროებს დამხმარე საშუალებებს, სამედიცინო, სოციალურ, პროფესიულ და ფსიქოლოგიურ რეაბილიტაციას, რაც შესაძლებლობას მისცემს მას დაძლიოს გარემო სივრცეში არსებული ბარიერები და სხვა მოქალაქეთა მსგავსად მონაწილეობა მიიღოს საზოგადოებრივ და საყოფაცხოვრებო საქმიანობაში.

    მუხლი 2. პროგრამის მიზანი და ამოცანები

1. პროგრამის მიზანს წარმოადგენს საქართველოს მოქმედი კანონმდებლობის მოთხოვნათა დაცვით სამედიცინო-სოციალური ექსპერტიზის სრულყოფილად წარმართვის ხელშეწყობა, რაც განაპირობებს სამედიცინო-სოციალური ექსპერტიზის ორგანიზაციული საკითხების გაუმჯობესებასა და სამედიცინო დაწესებულებების მიერ საექსპერტო დასკვნების გაცემის სისწორეს.

2. პროგრამის ამოცანებია:

ა) შესაძლებლობის შეზღუდვის სტატუსის განსაზღვრისა და სამედიცინო-სოციალური ექსპერტიზის ორგანიზაციული და სამართლებრივი საკითხების სრულყოფა;

ბ) სამედიცინო-სოციალური ექსპერტიზის მიმდინარეობაზე სახელმწიფო კონტროლის გაუმჯობესება და ამ სფეროში კანონიერების განმტკიცება.

    მუხლი 3. პროგრამით განსახორციელებელი ღონისძიებები

პროგრამის ფარგლებში განხორციელდება:

ა) სამედიცინო დაწესებულების მიერ არასწორად გაცემული დასკვნის გამოსავლენად სამედიცინო გადამოწმების მიზნით შეზღუდული შესაძლებლობის სტატუსის მქონე (შემდგომში – შშმ) პირის გამოკვლევა წინასწარ შერჩეული სამედიცინო დაწესებულებების მიერ;

ბ) სადიაგნოსტიკო გამოკვლევების მინიმალური სტანდარტების შემუშავება, საჯარო განხილვები და სამოქმედოდ შემოღება.

    მუხლი 4. პროგრამის ბიუჯეტი

„საქართველოს 2008 წლის სახელმწიფო ბიუჯეტის შესახებ“ საქართველოს კანონის შესაბამისად, პროგრამის ბიუჯეტი განისაზღვრა 930 000 ლარის ოდენობით, შემდეგი ცხრილის მიხედვით:

   მუხლი 5. განხორციელებაში მონაწილე დაწესებულებები

პროგრამის განხორციელებაში მონაწილეობენ:

ა) საქართველოს შრომის, ჯანმრთელობისა და სოციალური დაცვის სამინისტროს საქვეუწყებო დაწესებულება „სამედიცინო საქმიანობის სახელმწიფო რეგულირების სააგენტო“ – შემსყიდველი ორგანიზაცია;

ბ) მიმწოდებელი.

    მუხლი 6. პროგრამის შესრულების ვადა

პროგრამის შესრულების ვადა განისაზღვრება ბრძანების ძალაში შესვლიდან 2008 წლის 31 დეკემბრის ჩათვლით.