,,საქართველოს საბიუჯეტო კლასიფიკაციის შესახებ“ საქართველოს ფინანსთა მინისტრის 2004 წლის 15 მარტის №153 ბრძანებაში ცვლილებებისა და დამატების შეტანის თაობაზე“

სახელმწიფო სარეგისტრაციო კოდი 190.020.000.22.033.011.314

საქართველოს ფინანსთა

მინისტრის ბრძანება №1320

2007 წლის 28 დეკემბერი

 ქ. თბილისი

,,საქართველოს საბიუჯეტო კლასიფიკაციის შესახებ“ საქართველოს ფინანსთა მინისტრის 2004 წლის 15 მარტის №153 ბრძანებაში ცვლილებებისა და დამატების შეტანის თაობაზე

,,ნორმატიული აქტების შესახებ“ საქართველოს კანონის 36-ე მუხლის შესაბამისად, ვბრძანებ:

1. ,,საქართველოს საბიუჯეტო კლასიფიკაციის შესახებ“ საქართველოს ფინანსთა მინისტრის 2004 წლის 15 მარტის №153 ბრძანებაში (სსმ III, 2004 წ., №30, მუხლი 251) შეტანილ იქნეს შემდეგი ცვლილებები და დამატება:

ა) ბრძანების მე-2 პუნქტით დამტკიცებული №13 დანართის ,,სხვა დანარჩენი საქონელი და მომსახურება“ (2210) დაემატოს 51 პუნქტი შემდეგი რედაქციით:

,,51. დიპლომატიური დაწესებულებების შენახვისა და ატაშატის ხარჯებს;“.

ბ) ბრძანების მე-2 პუნქტით დამტკიცებული №13 დანართის ,,სხვა დანარჩენი საქონელი და მომსახურება“ (2210) ამოღებულ იქნეს მე-18 პუნქტი;

გ) ბრძანების მე-2 პუნქტით დამტკიცებული №13 დანართის ,,ძირითადი კაპიტალის მოხმარება“ (23) ჩამოყალიბდეს შემდეგი რედაქციით:

,,ძირითადი კაპიტალის მოხმარება (23)

ძირითადი კაპიტალის მოხმარება წარმოადგენს საანგარიშო პერიოდის განმავლობაში, ფიზიკური ცვეთის, მორალური ცვეთისა და ჩვეულებრივი შემთხვევითი დაზიანების შედეგად, სახელმწიფო ერთეულის მფლობელობაში არსებული და მის მიერ გამოყენებული ძირითადი აქტივების ღირებულების შემცირებას. მისი ღირებულებითი შეფასება ხორციელდება მოცემული პერიოდის საშუალო ფასებით. ძირითადი კაპიტალის მოხმარება პერსპექტიულ მაჩვენებელს წარმოადგენს და იგი შეიძლება მნიშვნელოვნად განსხვავდებოდეს სახელმწიფოს ფინანსურ ჩანაწერებში ასახული ცვეთის (ამორტიზაციის) სიდიდისაგან, რომელიც ჩვეულებრივ ძირითადი აქტივების საწყისი ღირებულების გამოყენებით დაანგარიშდება.“;

დ) ბრძანების მე-2 პუნქტით დამტკიცებული №13 დანართის ,,სუბსიდიები“ (25) ჩამოყალიბდეს შემდეგი რედაქციით:

,,სუბსიდიები (25)

სუბსიდიები წარმოადგენს საწარმოებსა და ორგანიზაციებზე სახელმწიფო ერთეულის მიერ მიმდინარე მიზნებისათვის უსასყიდლოდ, დაუბრუნებლად გაცემულ ტრანსფერს. ამ მუხლში არ აღირიცხება იმ საჯარო სამართლის იურიდიული პირებისათვის გადასაცემი თანხები, რომელიც შემდგომ გამოიყენება მოსწავლეთა ვაუჩერული სისტემის დასაფინანსებლად, სტუდენტთა გრანტებისა და სტიპენდიების გასაცემად.

ამ მუხლით აღირიცხება საჯარო სამართლის იურიდიულ პირებსა და სხვა სახელმწიფო არაფინანსურ საწარმოებზე მიმდინარე და საოპერაციო ხარჯების დასაფინანსებლად გადაცემული თანხები. ამასთან, საჯარო სამართლის იურიდიული პირისათვის მიმდინარე და საოპერაციო მიზნებისათვის გადასაცემი სახსრები ეკონომიკური შინაარსის მიხედვით შესაძლებელია გადანაწილდეს შესაბამის მუხლებში. საჯარო სამართლის იურიდიული პირებისათვის გადაცემული კაპიტალური ტრანსფერი, რომელიც ზრდის აღნიშნული საჯარო სამართლის იურიდიული პირის აქტივებს, აღირიცხება არაფინანსურ აქტივებში, ხოლო თუ კაპიტალური ტრანსფერი არ ზრდის მის აქტივებს, მაშინ სხვადასხვა კაპიტალურ ხარჯებში (2822) საწარმოებზე გადაცემული კაპიტალური ტრანსფერი აღირიცხება სხვადასხვა კაპიტალური ხარჯების (2822) მუხლში. უცხოეთიდან მიღებული დაფინანსების წყაროებითა და გრანტებით განსახორციელებელი საინვესტიციო პროექტების ფარგლებში გასაცემი სახსრები აგრეთვე აღირიცხება სუბსიდიის მუხლში, გარდა ,,სხვა ხარჯებში“, ,,არაფინანსურ აქტივებსა“ და ,,ფინანსურ ატივებსა და ვალდებულებებში“ ასახული სახსრებისა.

სუბსიდია შეიძლება გაიცეს გაწეული ხარჯების კომპენსაციისათვის, წარმოების დონესა და პროდუქციის სარეალიზაციო ფასზე ზემოქმედებისათვის. ამასთან, სუბსიდია ასევე ითვალისწინებს საწარმოების სახელით განხორციელებულ საპროცენტო გადახდებს. საწარმოებისათვის სესხად გაცემული სახსრები აღირიცხება როგორც ფინანსური აქტივები და არა როგორც სუბსიდია.

სუბსიდიების გადახდა ხდება მხოლოდ მწარმოებლებისათვის და არა საბოლოო მომხმარებლებისათვის. სუბსიდიები წარმოადგენს მხოლოდ მიმდინარე და არა კაპიტალურ ტრანსფერებს. სახელმწიფო ერთეულების მიერ საოჯახო მეურნეობებისათვის ან მათი მომსახურე არაკომერციული ორგანიზაციებისათვის გაწეული ტრანსფერები, მათი დანიშნულების მიხედვით კლასიფიცირდება როგორც სოციალური უზრუნველყოფა (27) ან სხვადასხვა ხარჯები (282). სხვა დონის სახელმწიფო ერთეულებისათვის გადაცემული ტრანსფერების უმრავლესობა კლასიფიცირდება როგორც გრანტი (26). საწარმოების კაპიტალის ფორმირებისათვის, არაფინანსურ აქტივებზე მიყენებული ზარალის კომპენსაციისათვის, ორი ან მეტი წლის განმავლობაში დაგროვებული საოპერაციო დეფიციტის ასანაზღაურებლად განხორციელებული გადახდები კლასიფიცირდება როგორც სხვადასხვა ხარჯები (282).“;

ე) ბრძანების მე-2 პუნქტით დამტკიცებული №13 დანართის ,,სხვადასხვა ხარჯებით“ (282) გათვალისწინებული ,,მიმდინარე“ (2821) ჩამოყალიბდეს შემდეგი რედაქციით:

,,მიმდინარე (2821)

 აღნიშნული მოიცავს:

· კანონმდებლობით დადგენილი ყველა სახის (გარდა საშემოსავლო და საქონლის ღირებულებაში აღრიცხული დამატებული ღირებულების გადასახადისა და საბაჟო მოსაკრებლისა) გადასახადები, საურავები, ჯარიმები, მოსაკრებლები, საკომისიოები და საქართველოს კანონმდებლობით გათვალისწინებული სხვა გადასახდელები;

· წმინდა საგადასახადო კრედიტი. იმ შემთხვევაში, როდესაც საგადასახადო კრედიტის თანხა სცილდება გადასახადის ოდენობას, რომელიც მისაღებია გადასახადის გადამხდელისგან და ზედმეტი თანხა უბრუნდება გადასახადის გადამხდელს, წმინდა გადახდა აისახება როგორც ხარჯი და არა როგორც უარყოფითი გადასახადი;

· სასამართლოებისა და სხვა კვაზი-სამართლებრივი (არბიტრაჟი და სხვა) ორგანოების გადაწყვეტილებებით დაკისრებული საურავები და საჯარიმო სანქციები (მათ შორის, სასამართლოს მიერ იძულების წესით დაკისრებული სააღსრულებო თანხის გადახდის ხარჯები);

· სახელმწიფო ერთეულების მიზეზით ფიზიკური პირების ტრავმირებისა თუ ქონებრივი ზარალის ასანაზღაურებლად, აგრეთვე დაღუპვის შემთხვევაში გადახდილი კომპენსაციები. ასეთი გადახდები შეიძლება იყოს სავალდებულო სასამართლოს გადაწყვეტილების საფუძველზე ან ნებაყოფილობითი სასამართლოს გარეთ მიღწეული შეთანხმების საფუძველზე;

· სხვადასხვა სახის მოვლენებისა და უბედური შემთხვევების დროს დასაფარი ხარჯების ასანაზღაურებლად გადასახდელი სადაზღვევო პრემიები, სადაზღვევო შენატანები, აგრეთვე შენობების, დანადგარებისა და სხვა დაზღვევის ხარჯები. ამგვარი გადახდები ყოველთვის განიხილება, როგორც მიმდინარე ტრანსფერები;

· მოსწავლეთა ვაუჩერები, სახელმწიფო სასწავლო გრანტები და სტიპენდიები, აგრეთვე პრეზიდენტის ან სხვა სახელობის გრანტები და სტიპენდიები და სამეცნიერო გრანტები;

· სტიქიური უბედურებების შედეგად მიყენებული ზიანის ან მიღებული ტრავმების კომპენსირების მიზნით განხორციელებული გადახდები;

· საბაზრო წესით მწარმოებლებიდან საქონლისა და მომსახურების შესყიდვა, რომელიც პირდაპირ საოჯახო მეურნეობებზე გადანაწილდება საბოლოო მოხმარებისათვის, გარდა სოციალური დახმარებებისა;

· სახელმწიფო ჯილდოებზე დაწესებული ფულადი პრემიები;

· უცხოეთიდან მიღებული დაფინანსების წყაროებითა და გრანტებით განსახორციელებელი საინვესტიციო პროექტების ფარგლებში მიმდინარე დანიშ-ნულებით გასაცემი სახსრები იმ შემთხვევაში, თუ პროექტის განმახორციელებელი არ არის საჯარო სამართლის იურიდიული პირი.

· სხვა არაკლასიფიცირებული ხარჯები.“;

ვ) ბრძანების მე-2 პუნქტით დამტკიცებული №14 დანართის ,,ძირითადი აქტივები“ (311) ჩამოყალიბდეს შემდეგი რედაქციით:

,,I. ძირითადი აქტივები (311)

ძირითადი აქტივები არის წარმოებული აქტივები, რომლებიც ერთ წელზე მეტი დროის განმავლობაში მრავალჯერადად ან განუწყვეტლივ გამოიყენება წარმოების ან მომსახურების პროცესში და რომელთა ღირებულებაც შეადგენს 500 ლარს და მეტს. ისეთი საგნები, რომლებსაც ხანგრძლივი სასიცოცხლო ციკლი გააჩნიათ, მაგრამ განკუთვნილი არ არიან მრავალჯერადი გამოყენებისათვის, არ შეიძლება კლასიფიცირდებოდეს როგორც ძირითადი აქტივები (მაგ.: საწვავად გამოყენებადი ნახშირი).

არსებული აქტივების მნიშვნელოვანი გაუმჯობესება, რაც ზრდის მათ საწარმოო სიმძლავრეს, ახანგრძლივებს სასიცოცხლო ციკლს ან ორივეს ერთად, წარმოადგენს კაპიტალურ შეკეთებას და აღირიცხება როგორც ძირითადი აქტივების შეძენა. კაპიტალურ შეკეთებაში იგულისხმება აქტივის განახლება, რეკონსტრუქცია და გაფართოება, რომელიც წარმოადგენს გაანალიზებულ საინვესტიციო გადაწყვეტილებას და იგი ზრდის აქტივის საექსპლუატაციო თვისებებს, სიმძლავრეს ან ახანგრძლივებს აქტივის წინასწარ განსაზღვრულ სასარგებლო მომსახურების პერიოდს. ამასთან, ძირითადი აქტივების სამუშაო მდგომარეობაში შენახვისა და მიმდინარე შეკეთების ხარჯები, რაც გავლენას არ ახდენს მათ საწარმოო სიმძლავრესა და სასიცოცხლო ციკლზე, აღირიცხება როგორც საქონელი და მომსახურება (22).

პოლიციისა და შინაგანი უსაფრთხოების სამსახურების მიერ იარაღისა (მაგალითად: რაკეტები, ჭურვები) და ამ იარაღის ამოქმედებისათვის საჭირო ტექნიკური აღჭურვილობის (მაგ.: რაკეტის გასაშვები საშუალება, საბრძოლო გემები, წყალქვეშა ნავები, ტანკები, თვითმფრინავები), აგრეთვე, შეიარაღებული სატრანსპორტო საშუალების შეძენა განიხილება ძირითად აქტივებად. ამასთან, სამხედრო უწყებების მიერ მსგავსი სახის აღჭურვილობების შეძენა აღირიცხება საქონლისა და მომსახურების (22) მუხლში. აგრეთვე უნდა აღინიშნოს, რომ ისეთი საშუალებების შეძენა, რომელიც გამოსადეგია როგორც სამხედრო, ასევე სამოქალაქო მიზნებისთვის (მაგ.: სამხედრო აეროდრომი, ნავსადგური, საავადმყოფოები, საოფისე ინვენტარი) განიხილება როგორც ძირითადი აქტივების შეძენა. ამასთან, უცხოეთიდან მიღებული დაფინანსების წყაროებითა და გრანტებით განსახორციელებელი საინვესტიციო პროექტების ფარგლებში კაპიტალური დანიშნულებით გაცემული სახსრები, რომელიც გამოიყენება როგორც პროექტის განმახორციელებლის, აგრეთვე სახელმწიფოს (გამონაკლისს წარმოადგენს სხვა დონის სახელმწიფო ერთეულზე გადასაცემად შეძენილი არაფინანსური აქტივები) არაფინანსური აქტივების შესაქმნელად, აღირიცხება არაფინანსურ აქტივებში.

ძირითადი აქტივები მოიცავს:

·      შენობა-ნაგებობებს (3111);

·      მანქანა-დანადგარებს (3112);

·      სხვა ძირითად აქტივებს (3113).“;

ზ) ბრძანების მე-2 პუნქტით დამტკიცებული №15 დანართიდან ამოღებულ იქნეს ,,ფინანსური აქტივებისა და ვალდებულებების და მათზე ოპერაციების კლასიფიკაციის“ შენიშვნა;

თ) ბრძანების მე-2 პუნქტით დამტკიცებული №15 დანართის ,,სესხები“ (3214, 3224, 3314, 3324) ,,და სხვა დებიტორულ/კრედიტორული დავალიანებები“ (3218, 3228, 3318, 3328) ჩამოყალიბდეს შემდეგი რედაქციით:

,,სესხები (3214, 3224, 3314, 3324)

სესხებად იწოდებიან ფინანსური ინსტრუმენტები, რომლებიც წარმოიქმნებიან, როდესაც კრედიტორი პირდაპირ აძლევს დებიტორს სახსრებს და აქტივის მოწმობის სახით ღებულობს არამიმოქცევად დოკუმენტს. ამ კატეგორიაში შეიტანება იპოთეკური კრედიტები და სესხები, განვადებით დაფარვადი კრედი-ტები და სესხები, კრედიტები განვადებით გაყიდვებისათვის, კრედიტები და სესხები სავაჭრო კრედიტების დასაფინანსებლად, შეთანხმება გაყიდვაზე შემდგომი გამოსყიდვით, ფინანსური აქტივები და ვალდებულებები, რომლებიც ფარულად წარმოიქმნება ფინანსური ლიზინგის შედეგად, ასევე, მოთხოვნები ან ვალდებულებები, საერთაშორისო სავალუტო ფონდთან მიმართებაში, რომელსაც კრედიტებისა და სესხების ფორმა აქვს. აგრეთვე, სხვა სახის სესხები და კრედიტები. ჩვეულებრივი, სავაჭრო კრედიტი და მისი მსგავსი დებიტორულ/კრედიტორული დავალიანებები არ ითვლება კრედიტად და სესხად.

საქონლის ფინანსური ლიზინგის პირობით შეძენისას ითვლება, რომ ადგილი აქვს საკუთრების უფლების გადაცემას მეიჯარისაგან მოიჯარეზე, ვინაიდან საკუთრებასთან დაკავშირებული ყველა რისკი და სარგებელი ფაქტიურად, გადადის მოიჯარეზე, იმ შემთხვევაშიც კი, თუ იურიდიული თვალსაზრისით ლიზინგის პირობით იჯარით აღებული საქონელი მეიჯარის საკუთრებად რჩება. ითვლება, რომ საკუთრების უფლების ასეთი ცვლა, ფინანსირდება კრედიტით, რომელიც წარმოადგენს მეიჯარის აქტივს და მოიჯარის ვალდებულებას.

სხვა დებიტორული/კრედიტორული დავალიანებები (3218, 3228, 3318, 3328)

სხვა დებიტორული/კრედიტორული დავალიანებები შედგება სავაჭრო კრედიტებისგან, აგრეთვე, სხვა განსხვავებული მუხლებისგან, რომლებიც მისაღებია ან ექვემდებარება გადახდას.

სავაჭრო კრედიტები გამოყოფილია უშუალოდ საქონლისა და მომსახურების მყიდველებისათვის. ასეთი კრედიტები წარმოადგენენ გადახდის მიღების ჩვეულებრივი გადავადების შედეგს, ასევე გამყიდველებისათვის კრედიტის განზრახ გამოყოფას გაყიდვების დასაფინანსებლად. სავაჭრო კრედიტები არ მოიცავს კრედიტებსა და სესხებს, ფასიან ქაღალდებს, გარდა აქციებისა, ან სხვა ვალდებულებებს, რომლებიც გამოშვებულია ვაჭრობის დასაფინანსებლად. თუ სახელმწიფო ერთეული უშვებს ჩვეულებრივ თამასუქს ან სხვა ფასიან ქაღალდს, რამდენიმე სავაჭრო კრედიტზე გადახდის კონსოლიდირებისათვის, მაშინ ასეთი თამასუქი ან ფასიანი ქაღალდი მიეკუთვნება ფასიან ქაღალდებს, გარდა აქციებისა.“.

2. ბრძანება ამოქმედდეს 2008 წლის 1 იანვრიდან.

ნ. გილაური