საჯარო სამართლის იურიდიული პირის − დანაშაულის პრევენციის, არასაპატიმრო სასჯელთა აღსრულებისა და პრობაციის ეროვნული სააგენტოს ცალკეულ მოსამსახურეთა სამსახურებრივი ფორმის ტანსაცმლის ნიმუშისა და გამოყენების წესის დამტკიცების თაობაზე

მუხლი 1. რეგულირების სფერო

ეს წესი განსაზღვრავს საქართველოს იუსტიციის სამინისტროს მმართველობის სფეროში მოქმედი საჯარო სამართლის იურიდიული პირის − დანაშაულის პრევენციის, არასაპატიმრო სასჯელთა აღსრულებისა და პრობაციის ეროვნული სააგენტოს (შემდგომ – სააგენტო) ცალკეულ მოსამსახურეთა სამსახურებრივი ფორმის ტანსაცმლის ნიმუშებსა (დანართი №1) და გამოყენების საკითხებს.

მუხლი 2. სამსახურებრივი ფორმის ტარება

1. სამსახურებრივი მოვალეობის შესრულებისას სამსახურებრივ ფორმას ატარებს:

ა) პრობაციის ოფიცერი;

ბ) სააგენტოს შიდა კონტროლის დეპარტამენტის მოსამსახურე;

გ) სააგენტოს ორგანიზაციული მხარდაჭერის დეპარტამენტის ელექტრონული ზედამხედველობის ცენტრის მოსამსახურე;

დ) სააგენტოს მოსამსახურე, რომელიც პირთა უშუალო მომსახურებას ახორციელებს.

2. სააგენტოს ამ მუხლის პირველი პუნქტით გათვალისწინებულ მოსამსახურეებს (შემდგომ – მოსამსახურე) სამსახურებრივი ფორმით უზრუნველყოფს სააგენტო.

მუხლი 3. სამსახურებრივი ფორმის ტარებისას გასათვალისწინებელი მოთხოვნები

1. მოსამსახურე სამსახურებრივ ფორმას ატარებს სამსახურებრივი მოვალეობის შესრულებისას, ოფიციალური შეხვედრებისა და ვიზიტების დროს.

2. მოსამსახურე ვალდებულია მოუფრთხილდეს სამსახურებრივ ფორმას და გამოიყურებოდეს მოწესრიგებულად.

3. მოსამსახურეს ეკრძალება სამსახურებრივ ფორმასთან ერთად საიუველირო ნაკეთობების ან სხვა სახის ხელოვნური მორთულობების თვალსაჩინოდ ტარება. დასაშვებია ერთად საქორწინო ბეჭდის, მაჯის საათისა და ოპტიკური სათვალის სამსახურებრივ ფორმასთან ტარება.

4. მოსამსახურის მიერ ამ წესის შეუსრულებლობა შესაძლებელია გახდეს დისციპლინური წარმოების დაწყების საფუძველი.