„გადასახადების ადმინისტრირების შესახებ“ საქართველოს ფინანსთა მინისტრის 2010 წლის 31 დეკემბრის №996 ბრძანებაში ცვლილების შეტანის თაობაზე

„6. იმ შემთხვევაში, თუ საანგარიშო წლის განმავლობაში სასარგებლო წიაღისეულის მოპოვების ლიცენზიაში განხორციელებული ცვლილების საფუძველზე გაცემულია ლიცენზია-ბრძანება, მოსაკრებლის თანხა გამოიანგარიშება შემდეგი წესით:

ა) იმ ლიცენზიასთან მიმართებით, რომლის მიხედვითაც მოსაპოვებელი რესურსის მოცულობა განსაზღვრულია მოპოვების დღე-ღამური ლიმიტის საფუძველზე, მოსაკრებლის თანხა გამოიანგარიშება შესაბამისი ლიცენზიის მოქმედების დღეთა რაოდენობის პროპორციულად.

მაგალითი 7:

პირს 2009 წლიდან ჰქონდა სასარგებლო წიაღისეულის (მინერალური წყალი (ჩამოსასხმელი)) მოპოვების ლიცენზია 25 წლის მოქმედების ვადით, რომლის მიხედვით მინერალური წყლის (ჩამოსასხმელი) მოსაპოვებელი რესურსის მოცულობა განსაზღვრული იყო მოპოვების დღე-ღამური ლიმიტის საფუძველზე და შეადგენდა წელიწადში 365 000 მ³ -ს, ხოლო ნაკიან წელს – 366 000 მ³-ს.

2026 წლის 18 თებერვალს ლიცენზიაში განხორციელდა ცვლილება, რომლის მიხედვითაც ლიცენზიის საფუძველზე მოსაპოვებელი რესურსის დღე-ღამური მოცულობა გაიზარდა  250 მ³-ით და გაზრდილი მოცულობის (1 000მ³ + 250მ³) მიხედვით დამტკიცდა შესაბამისი ათვისების გეგმა. დამტკიცებული ათვისების გეგმის მიხედვით, 2026  წლის 18 თებერვლიდან წლის ბოლომდე (317 დღე)  ასათვისებელი რესურსის ოდენობა განისაზღვრა 396 250 მ³-ით.

მოცემულ შემთხვევაში:

ვინაიდან ლიცენზიით გათვალისწინებული რესურსის მოპოვება განსაზღვრულია მოპოვების დღე-ღამური ლიმიტის საფუძველზე და აღნიშნულ ლიცენზიაში განხორციელდა ცვლილება, პირის მიერ საგადასახადო ვალდებულება მოსაკრებლის ნაწილში უნდა შესრულდეს შემდეგნაირად:

2026 წლის I კვარტლის საანგარიშო პერიოდის გაანგარიშებაში მოპოვებული/მოსაპოვებელი რესურსის მოცულობა უნდა აისახოს 100 500 მ³ რესურსის მოცულობა. გამომდინარე იქიდან, რომ ლიცენზია, რომელშიც განხორციელდა ცვლილება, მოქმედებდა 48 დღის (48*1 000 მ³) განმავლობაში და ცვლილების შემდგომ გამოცემული ლიცენზია მოქმედებდა 42 დღის განმავლობაში (42*1 250 მ³);

2026 წლის II კვარტლის საანგარიშო პერიოდის გაანგარიშებაში მოპოვებული/მოსაპოვებელი რესურსის მოცულობა უნდა აისახოს 113 750 მ³ (91 * 1 250 მ³);

2026 წლის III კვარტლის საანგარიშო პერიოდის გაანგარიშებაში მოპოვებული/მოსაპოვებელი რესურსის მოცულობა უნდა აისახოს 115 000 მ³ (92 * 1 250 მ³);

2026 წლის IV კვარტლის საანგარიშო პერიოდის გაანგარიშებაში მოპოვებული/მოსაპოვებელი რესურსის მოცულობა უნდა აისახოს 115 000 მ³ (92 * 1 250 მ³).

ბ) იმ ლიცენზიასთან მიმართებით, რომლის მიხედვითაც მოსაპოვებელი რესურსის მოცულობა განსაზღვრულია მოპოვების წლიური გეგმით და ლიცენზიაში ცვლილების განხორციელების შედეგად იცვლება ლიცენზიაზე დამტკიცებული ათვისების გეგმა, ბუნებრივი რესურსებით სარგებლობისათვის მოსაკრებელი გადაიხდება შეცვლილი ათვისების გეგმით  გათვალისწინებული ყოველწლიურად ასათვისებელი მოცულობის მიხედვით, თანაბარ ნაწილებად.

მაგალითი 8:

პირს 2022 წლიდან  ჰქონდა სასარგებლო წიაღისეულის (ქვიშა-ხრეშის) მოპოვების ლიცენზია 5 წლის მოქმედების ვადით, რომლის მიხედვით მოსაპოვებელი რესურსის ჯამური მოცულობა შეადგენდა 200 000 მ³-ს. ლიცენზიაზე დამტკიცებული ათვისების გეგმის შესაბამისად, მოსაპოვებელი რესურსის ოდენობა 2022 წლიდან ყოველწლიურად 40 000 მ³ -ს (200 000 მ³/5) შეადგენდა. 2026 წლის 18 აგვისტოს  ლიცენზიაში განხორციელდა  ცვლილება, რომლის მიხედვითაც ლიცენზიის საფუძველზე მოსაპოვებელი რესურსის ჯამური მოცულობა შეიცვალა.

ვარიანტი I: ლიცენზიის საფუძველზე მოსაპოვებელი რესურსის ჯამური მოცულობა გაიზარდა 220 000 მ³-მდე, ხოლო შეცვლილი ათვისების გეგმის შესაბამისად, 2026 წლისათვის ასათვისებელი რესურსის მოცულობა განისაზღვრა 60 000 მ³-ით.

ვარიანტი II: ლიცენზიის საფუძველზე მოსაპოვებელი რესურსის ჯამური მოცულობა შემცირდა 180 000 მ³-მდე, ხოლო შეცვლილი ათვისების გეგმის შესაბამისად, 2026 წლისათვის ასათვისებელი რესურსის მოცულობა განისაზღვრა 20 000 მ³-ით.

ორივე შემთხვევაში პირს ათვისების გეგმით განსაზღვრულ მოცულობაზე მეტი რესურსი არ მოუპოვებია.

მოცემულ შემთხვევაში:

იმის გათვალისწინებით, რომ სასარგებლო წიაღისეულის ათვისების გეგმა შეიცვალა 2026 წლის 18 აგვისტოს – I ექვსთვიანი საანგარიშო პერიოდის შემდეგ, 2026 წლის I ექვსთვიანი საანგარიშო პერიოდის მიხედვით წარდგენილი გაანგარიშება ექვემდებარება დაზუსტებას. შესაბამისად, 2026 წლის ორივე ექვსთვიანი საანგარიშო პერიოდის მიხედვით წარდგენილ გაანგარიშებაში ასახვას დაექვემდებარება შეცვლილი ათვისების გეგმით 2026 წლისათვის განსაზღვრული ასათვისებელი რესურსის მოცულობის ნახევარი, კერძოდ:

ვარიანტი I – 30 000 მ³ (60 000 მ³ * ½);

ვარიანტი II – 10 000 მ³ (20 000 მ³ * ½).“.