„საქართველოს ფინანსთა სამინისტროს საგამოძიებო სამსახურში სამსახურის გავლის წესის დამტკიცების შესახებ“ საქართველოს ფინანსთა მინისტრის 2009 წლის 25 ნოემბრის №764 ბრძანებაში ცვლილების შეტანის თაობაზე

1. 39-ე მუხლი ჩამოყალიბდეს შემდეგი რედაქციით:

„მუხლი 39. სამსახურის თანამშრომლის სამსახურიდან დათხოვნა შტატების შემცირების, სამსახურის, მისი სტრუქტურული ქვედანაყოფის ან ტერიტორიული ორგანოს რეორგანიზაციის ან/და ლიკვიდაციის გამო

 1. სამსახურის რეორგანიზაცია მოიცავს  მისი ინსტიტუციური მოწყობის შეცვლას, რის შედეგადაც მიიღება სამსახურის ნაწილობრივ ან მთლიანად ახალი ორგანიზაციული სტრუქტურა და რასაც თან ახლავს შტატების გადაადგილება ან/და შემცირება.

2. რეორგანიზაციის პროცესში სამსახური განსაზღვრავს იმ თანამდებობებს (შტატებს), რომლებიც ექვემდებარება გადაადგილებას ან/და შემცირებას და სამსახურის იმ თანამშრომლების სიას, რომელთა თანამდებობებიც (შტატები) მცირდება ან/და რომელთა მიმართაც იცვლება  შრომითი ურთიერთობების არსებული პირობები.

3. რეორგანიზაციის შედეგად სამსახურიდან მოსალოდნელი გათავისუფლების (დათხოვნის) შესახებ თანამშრომელს წერილობით უნდა ეცნობოს გათავისუფლებამდე (დათხოვნამდე) 1 თვით ადრე. აღნიშნული შეტყობინება სამსახურის თანამშრომელმა უნდა დაადასტუროს ხელმოწერით. ამ ვადის დარღვევის შემთხვევაში თანამშრომელს, ამ მუხლის მე-4 პუნქტით გათვალისწინებული კუთვნილი კომპენსაციის გარდა, ეძლევა 1 თვის თანამდებობრივი სარგო.

4. სამსახურის რეორგანიზაციის შედეგად თანამშრომლის სამსახურიდან გათავისუფლების (დათხოვნის) შემთხვევაში, მას ეძლევა კომპენსაცია 1 თვის თანამდებობრივი სარგოს ოდენობით. სამსახური ვალდებულია მოახდინოს სამსახურის თანამშრომელთან საბოლოო ანგარიშსწორება და დაუბრუნოს მას შრომის წიგნაკი, აგრეთვე სხვა საბუთები.“.

2. მე-40 მუხლის:

ა) პირველი პუნქტი ამოღებულ იქნეს;

ბ) მე-4 პუნქტი ჩამოყალიბდეს შემდეგი რედაქციით:

„4. ორგანიზაციულ-საშტატო ღონისძიებებში იგულისხმება სტრუქტურული ერთეულის (ან ერთეულების) შემცირება (გაერთიანება-გაყოფა) შტატების შემცირების გარეშე, სტრუქტურული ერთეულებისათვის ფუნქციების დამატება ან გამოკლება.“.