„ელექტრონული კომუნიკაციების სფეროში მომსახურების მიწოდებისა და მომხმარებელთა უფლებების დაცვის შესახებ რეგლამენტის დამტკიცების თაობაზე“ საქართველოს კომუნიკაციების ეროვნული კომისიის 2006 წლის 17 მარტის №3 დადგენილებაში ცვლილების შეტანის შესახებ

„ნორმატიული აქტების შესახებ“ საქართველოს ორგანული კანონის მე-20 მუხლის მე-4 პუნქტის შესაბამისად, საქართველოს კომუნიკაციების ეროვნული კომისია ადგენს:

„ელექტრონული კომუნიკაციების სფეროში მომსახურების მიწოდებისა და მომხმარებელთა უფლებების დაცვის შესახებ რეგლამენტის დამტკიცების თაობაზე“ საქართველოს კომუნიკაციების ეროვნული კომისიის 2006 წლის 17 მარტის №3 დადგენილების (სსმ III, 23.03.2006 წ., №39, მუხლი 468) 8³ მუხლის მე-2 პუნქტის შემდეგ დაემატოს შემდეგი შინაარსის 2¹ პუნქტი:

ელექტრონული საკომუნიკაციო მომსახურების მიმწოდებელი უფლებამოსილია ელექტრონული საკომუნიკაციო მომსახურების  მიწოდების თაობაზე ამ დადგენილების ამოქმედებამდე გაფორმებულ ხელშეკრულებაში მითითებული აბონენტის მაიდენტიფიცირებელი მონაცემები გადაამოწმოს სსიპ „სახელმწიფო სერვისების განვითარების სააგენტოს“ მონაცემთა ბაზაში ამ დადგენილების ამოქმედებიდან 6 თვის ვადაში. აბონენტის მაიდენტიფიცირებელი მონაცემების სსიპ „სახელმწიფო სერვისების განვითარების სააგენტოს“ მონაცემთა ბაზაში არსებულ მონაცემებთან შეუსაბამობის შემთხვევაში აბონენტი ვალდებულია ელექტრონული საკომუნიკაციო მომსახურების მიმწოდებლისგან აღნიშნულის შესახებ ინდივიდუალური შეტყობინების მიღებიდან 30 დღის ვადაში შესაბამისობაში მოიყვანოს პირადი მონაცემები. აღნიშნულ ვადაში აბონენტის მიერ პირადი მონაცემების განუახლებლობის შემთხვევაში ელექტრონული საკომუნიკაციო მომსახურების მიმწოდებელი უფლებამოსილია აბონენტს შეუწყვიტოს ელექტრონული საკომუნიკაციო მომსახურების მიწოდება. 

ეს დადგენილება ამოქმედდეს გამოქვეყნებისთანავე.