სახელმწიფო შესყიდვის დარეზერვების წესისა და პირობების დამტკიცების შესახებ

1. „სახელმწიფო შესყიდვის დარეზერვების წესი და პირობები“.

2. „შესყიდვის ობიექტების ჩამონათვალი, რომელთა ფარგლებშიც შესაძლებელია შემსყიდველი ორგანიზაციის მიერ სახელმწიფო შესყიდვის დარეზერვება“ (დანართი).

1. „სახელმწიფო შესყიდვის დარეზერვების წესი და პირობები“ (შემდგომში – წესი) შემუშავებულია „სახელმწიფო შესყიდვების შესახებ“ საქართველოს კანონის (შემდგომში – კანონი) საფუძველზე და მისი მიზანია შეზღუდული შესაძლებლობის მქონე პირთა ან სხვა მოწყვლადი ჯგუფების წევრთა  სოციალური და პროფესიული ინტეგრაციის ხელშეწყობა, იმ ეკონომიკური ოპერატორების მხარდაჭერის გზით, რომელთა მიერ დასაქმებული პირების 30% მაინც არის შეზღუდული შესაძლებლობის მქონე პირი ან სხვა მოწყვლადი ჯგუფის წევრი.

2. სახელმწიფო შესყიდვის დარეზერვების ფარგლებში შემსყიდველი ორგანიზაცია უფლებამოსილია, ამ წესით დადგენილი პირობების დაცვით, სახელმწიფო შესყიდვა სახელმწიფო შესყიდვების ერთიან ელექტრონულ სისტემაში (შემდგომში – სისტემა) რეგისტრირებული მხოლოდ იმ ეკონომიკური ოპერატორებისთვის გამოაცხადოს, რომელთა მთავარი მიზანია შეზღუდული შესაძლებლობის მქონე პირთა ან სხვა მოწყვლადი ჯგუფების წევრთა სოციალური და პროფესიული ინტეგრაცია.

3. იმ ეკონომიკურ ოპერატორთა წრე, რომელთათვისაც შესაძლებელია სახელმწიფო შესყიდვის დარეზერვება, განისაზღვრება ამ წესით ან/და სატენდერო დოკუმენტაციით.

4. შემსყიდველი ორგანიზაციის მიერ სახელმწიფო შესყიდვის დარეზერვება შესაძლებელია მხოლოდ ამ დადგენილების დანართით განსაზღვრულ სფეროებსა და CPV კოდების ფარგლებში.

მუხლი 2. ტერმინთა განმარტება

1. ამ წესის მიზნებისთვის მასში გამოყენებულ ტერმინებს აქვს შემდეგი მნიშვნელობა:

ა) სახელმწიფო შესყიდვის დარეზერვება – კანონის 10³ მუხლით გათვალისწინებული მექანიზმი, რომლის ფარგლებშიც კონკრეტულ სახელმწიფო შესყიდვაში მონაწილეობის უფლება ენიჭებათ მხოლოდ კანონით ან/და ამ წესით განსაზღვრულ პირებს, მათი სოციალური და პროფესიული ინტეგრაციის ხელშეწყობის მიზნით;

ბ) შეზღუდული შესაძლებლობის მქონე პირი – „შეზღუდული შესაძლებლობის მქონე პირთა უფლებების შესახებ“ საქართველოს კანონის მე-2 მუხლის „ა“ ქვეპუნქტით განსაზღვრული პირი;

გ) მოწყვლადი ჯგუფი – მარტოხელა მშობლები, მრავალშვილიანი ოჯახების წევრები, სოციალურად დაუცველი ოჯახების წევრები, იძულებით გადაადგილებული პირები (დევნილები), ყოფილი პატიმრები და პირობით მსჯავრდებული პირები, აგრეთვე შეზღუდული შესაძლებლობის მქონე პირები;

დ) დარეზერვებული სახელმწიფო შესყიდვა – სახელმწიფო შესყიდვა, რომლის მიმართაც გამოყენებულია ან შესაძლებელია, გამოყენებულ იქნეს კანონის 10³ მუხლით გათვალისწინებული მექანიზმი;

ე) სოციალური და პროფესიული ინტეგრაცია – ეკონომიკური ოპერატორის მიერ განხორციელებული მიზანმიმართული საქმიანობა, რომელიც უზრუნველყოფს ამ წესით განსაზღვრული მოწყვლადი ჯგუფების წარმომადგენელთა დასაქმების, პროფესიული უნარების განვითარების, სამუშაო გარემოსთან ადაპტაციისა და შრომის ბაზარზე სრულფასოვანი მონაწილეობის ხელშეწყობას;

ვ) სახელმწიფო შესყიდვის გამოცხადება – ამ წესის მიზნებისთვის, სახელმწიფო შესყიდვის გამოცხადებად ჩაითვლება სახელმწიფო შესყიდვის განხორციელება ელექტრონული ტენდერის საშუალებით; 

ზ) ეკონომიკური ოპერატორი – ნებისმიერი ფიზიკური პირი, იურიდიული პირი, პირთა გაერთიანება, სხვა ორგანიზაციული წარმონაქმნი, რომელიც ბაზარზე საქონლის მიწოდებას ან მომსახურების გაწევას სთავაზობს.

2. წესში გამოყენებულ სხვა ტერმინებს აქვს იგივე მნიშვნელობა, რაც კანონში, ასევე, ამ წესის თავისებურებათა გათვალისწინებით, კანონის საფუძველზე მიღებულ/გამოცემულ სახელმწიფო შესყიდვების მარეგულირებელ სხვა კანონქვემდებარე ნორმატიულ აქტებში.

მუხლი 3. დარეზერვებული სახელმწიფო შესყიდვის გამოყენების სფერო

შემსყიდველი ორგანიზაცია უფლებამოსილია, ჯანმრთელობის დაცვის, სოციალურ, კულტურულ ან სოფლის მეურნეობის სფეროში საქონლის ან/და მომსახურების შესყიდვის მიზნით, კანონითა და ამ წესით განსაზღვრული პირობების დაცვით, სახელმწიფო შესყიდვა გამოაცხადოს მხოლოდ იმ ეკონომიკური ოპერატორებისთვის, რომლებიც აკმაყოფილებენ კანონის 10³ მუხლის პირველი და მე-3 პუნქტებით, აგრეთვე ამ წესით განსაზღვრულ მოთხოვნებს, თუ ეს მომსახურება ექცევა ამ დადგენილებით დამტკიცებული CPV კოდების ჩამონათვალში.

მუხლი 4. დარეზერვებულ სახელმწიფო შესყიდვაში მონაწილეობის პირობები

1. ეკონომიკური ოპერატორის საკვალიფიკაციო მონაცემებთან დაკავშირებულ მოთხოვნებს სსიპ – სახელმწიფო შესყიდვების სააგენტოს (შემდგომში – სააგენტო) თავმჯდომარის კანონქვემდებარე ნორმატიული აქტით დადგენილი წესით განსაზღვრავს შემსყიდველი ორგანიზაცია ყოველი კონკრეტული შესყიდვისთვის, ამ წესით დადგენილი თავისებურებების გათვალისწინებით.

2. დარეზერვებულ სახელმწიფო შესყიდვაში მონაწილეობის უფლება აქვს მხოლოდ იმ ეკონომიკურ ოპერატორს, რომელიც ერთდროულად აკმაყოფილებს შემდეგ საკვალიფიკაციო მოთხოვნებს:

ა) ეკონომიკური ოპერატორის საქმიანობის მიზანია ამ დადგენილების მე-3 მუხლით გათვალისწინებული მომსახურების ან/და საქონლის მიწოდება;

ბ) კანონის 10³ მუხლის პირველი პუნქტის გათვალისწინებით,  ეკონომიკურ ოპერატორში დასაქმებულ პირთა არანაკლებ 30%-ს წარმოადგენენ ამ წესის პირველი მუხლის მე-2 პუნქტით განსაზღვრული პირები, ხოლო, თუ ეკონომიკური ოპერატორი ფიზიკური პირია ან ინდივიდუალური მეწარმეა, ეს ფიზიკური პირი ამ წესის პირველი მუხლის მე-2 პუნქტით განსაზღვრულ პირს წარმოადგენს;

გ) იგი ნორმალურ საბაზრო პირობებში ობიექტურად ვერ გაუწევს კონკურენციას სხვა ეკონომიკურ ოპერატორებს, რაც უნდა დასტურდებოდეს შემსყიდველი ორგანიზაციის მიერ ჩატარებული ბაზრის კვლევით ან შესაბამისი დასაბუთებით.

3. შემსყიდველი ორგანიზაცია ეკონომიკური ოპერატორის შერჩევასა და შეფასებას ახორციელებს სააგენტოს თავმჯდომარის კანონქვემდებარე ნორმატიული აქტით დადგენილი წესით, კანონის 10³ მუხლითა და ამ წესით დადგენილი თავისებურებების გათვალისწინებით.

4. გამარჯვებული პრეტენდენტის სატენდერო წინადადებით განსაზღვრული პირობების საფუძველზე, გამარჯვებულ პრეტენდენტსა და შემსყიდველ ორგანიზაციას შორის იდება სახელმწიფო შესყიდვის შესახებ ხელშეკრულება. დარეზერვებული სახელმწიფო შესყიდვის საშუალებით დადებული შესყიდვის ხელშეკრულების მოქმედების ვადა 3 წელს არ უნდა აღემატებოდეს.

მუხლი 5. დარეზერვებული სახელმწიფო შესყიდვის მოცულობა და სხვა შეზღუდვები

1. შემსყიდველი ორგანიზაციის მიერ ერთი საბიუჯეტო წლის განმავლობაში დარეზერვებული სახელმწიფო შესყიდვებისათვის გამოყოფილი ან გახარჯული თანხების ჯამური მოცულობა არ უნდა აღემატებოდეს იმავე საბიუჯეტო წლის შესყიდვების გეგმით გათვალისწინებული შესაბამისი ერთგვაროვანი საქონლის, მომსახურების ან სამუშაოს შესყიდვის საერთო ღირებულების 1%-ს (შემდგომში – დარეზერვების მაქსიმალური ფინანსური ზღვარი).

2. დარეზერვების მაქსიმალური ფინანსური ზღვარი წარმოადგენს შემსყიდველი ორგანიზაციის მიერ დარეზერვებული სახელმწიფო შესყიდვების განხორციელების ზედა ფინანსურ ზღვარს და, ნებისმიერ შემთხვევაში, არ შეიძლება, აღემატებოდეს შესაბამისი საბიუჯეტო წლის შესყიდვების გეგმის ჯამური ღირებულების 1%-ს.

3. დაუშვებელია დარეზერვებული სახელმწიფო შესყიდვის ხელოვნურად დაყოფა ან ნებისმიერი სხვა ქმედება, რომლის მიზანია ან შედეგია კანონითა და ამ მუხლით დადგენილი მონეტარული ზღვრებისა და სხვა მოთხოვნებისათვის თავის არიდება.

დანართი

შესყიდვის ობიექტების ჩამონათვალი, რომელთა ფარგლებშიც შესაძლებელია შემსყიდველი ორგანიზაციის მიერ სახელმწიფო შესყიდვის დარეზერვება