„საჯარო სამართლის იურიდიული პირის – გარემოს ეროვნული სააგენტოს დებულების დამტკიცების თაობაზე“ საქართველოს გარემოს დაცვისა და სოფლის მეურნეობის მინისტრის 2023 წლის 29 დეკემბრის №2-978 ბრძანებაში ცვლილების შეტანის შესახებ

„ნორმატიული აქტების შესახებ“ საქართველოს ორგანული კანონის მე-20 მუხლის მე-4 პუნქტისა და 22-ე მუხლის მე-9 პუნქტის საფუძველზე, ვბრძანებ :

„საჯარო სამართლის იურიდიული პირის – გარემოს ეროვნული სააგენტოს დებულების დამტკიცების თაობაზე“ საქართველოს გარემოს დაცვისა და სოფლის მეურნეობის  მინისტრის  2023  წლის  29  დეკემბრის  №2-978  ბრძანებაში  (ვებგვერდი, 29/12/2023; სარეგისტრაციო კოდი:  040030000.22.023.016847) შეტანილ იქნეს ცვლილება და ბრძანებით დამტკიცებული დებულების:

1. მე-2 მუხლის „ჰ³²“ ქვეპუნქტი ჩამოყალიბდეს შემდეგი რედაქციით:

„ჰ³²) ცხოველთა სამყაროს ობიექტების ან/და მცენარეების, აგრეთვე სოკოების (ბუნებრივი გარემოდან ამოღებით ან მის გარეშე, არამანიპულაციური ქმედებების განხორციელება) სამეცნიერო-კვლევითი საქმიანობის განხორციელებაზე კანონმდებლობით გათვალისწინებული თანხმობების გაცემა.“.

2.  მე-5 მუხლის „დ“ ქვეპუნქტი ამოღებულ იქნეს.

3. მე-14 მუხლს დაემატოს შემდეგი შინაარსის  „ც²“ ქვეპუნქტი:

„ც²) 2027 წლის 1 სექტემბრამდე, საქართველოს კანონმდებლობით დადგენილი წესით, ზედაპირული წყლის ობიექტებში დამაბინძურებელ ნივთიერებათა ზღვრულად დასაშვები ჩაშვების ნორმების, ასევე ზედაპირული წყლის ობიექტებიდან წყლის ამოღების ტექნიკური პირობების პროექტების განხილვა და შეთანხმება, აგრეთვე წყალსარგებლობის ელექტრონულ მონაცემთა ბაზის წარმოება.“.

4. მე-14 მუხლის „ „ძ“ ქვეპუნქტი ჩამოყალიბდეს შემდეგი რედაქციით:

„ძ) სამეცნიერო-კვლევითი მიზნებისთვის ცხოველთა სამყაროს ობიექტების, მცენარეებისა და სოკოების ბუნებრივი გარემოდან ამოღებაზე (მათ შორის, დროებით ამოღებაზე) და არამანიპულაციური  ქმედებების  განხორციელებაზე  თანხმობის  გაცემის  მიზნით წარდგენილი განაცხადების განხილვა და შესაბამისი გადაწყვეტილებების მომზადება.“.