„ყვარლის მუნიციპალიტეტის მერიის ჯანმრთელობისა და სოციალური დაცვის სამსახურის დებულების დამტკიცების შესახებ“ ყვარლის მუნიციპალიტეტის საკრებულოს 2018 წლის 18 იანვრის N10 დადგენილებაში ცვლილების შეტანის თაობაზე

1. დადგენილებით დამტკიცებული დანართის (სამსახურის დებულების) პირველი მუხლის მე-5 პუნქტი ჩამოყალიბდეს შემდეგი რედაქციით:

„5. სამსახური შედგება სამსახურის ხელმძღვანელისა და შემდეგი მეორადი სტრუქტურული ერთეულებისგან (განყოფილებებისგან):

ა) ბავშვის უფლებების დაცვისა და მხარდაჭერის განყოფილება;

ბ) სოციალური უზრუნველყოფისა და ჯანმრთელობის დაცვის განყოფილება.“.

2. დადგენილებით დამტკიცებულ დანართს (სამსახურის დებულებას) დაემატოს  მე-6 მუხლი შემდეგი რედაქციით:

„მუხლი 6. სოციალური უზრუნველყოფისა და ჯანმრთელობის დაცვის განყოფილება

1. სოციალური უზრუნველყოფისა და ჯანმრთელობის დაცვის განყოფილების ფუნქციებია:

ა) ჯანმრთელობის დაცვის მუნიციპალური პროგრამების შემუშავება და მათი განხორციელების კოორდინაცია;

ბ) სოციალური დაცვისა და დასაქმების მუნიციპალურ პროგრამათა შემუშავება და მათი განხორციელების კოორდინაცია;

გ) მუნიციპალიტეტის ტერიტორიაზე მცხოვრები იძულებით გადაადგილებულ პირთა, ვეტერანთა, უმწეო მდგომარეობაში მყოფთა და სხვა სოციალური კატეგორიის ბენეფიციართა აღრიცხვა, მათი სოციალური დაცვის ხელშეწყობა;

დ) უსახლკაროთა რეგისტრაცია და მათი თავშესაფრით უზრუნველყოფის მიზნით შესაბამისი ღონისძიებების გატარება;

ე) წინადადებების შემუშავება ჯანმრთელობისა და სოციალური დაცვის დაწესებულებათა შექმნისა და რეორგანიზაციის საკითხებზე;

ვ) საზოგადოებრივი ჯანდაცვის სფეროში მუნიციპალიტეტისათვის დელეგირებული უფლებამოსილების განხორციელება;

ზ) კომპეტენციის ფარგლებში სოციალური და ჯანმრთელობის დაცვის სფეროში მოქმედ სახელმწიფო უწყებებთან, არასამთავრობო და საერთაშორისო ორგანიზაციებთან თანამშრომლობა;

თ) მოქმედი კანონმდებლობითა და მუნიციპალიტეტის სამართლებრივი აქტებით განსაზღვრული სხვა ფუნქციების განხორციელება.

2. განყოფილება თავისი კომპეტენციის ფარგლებში უზრუნველყოფს სოციალური და ჯანმრთელობის დაცვის მუნიციპალური სერვისების ხელმისაწვდომობასა და საქმიანობის გამჭვირვალობას.“.