„საჯარო სამართლის იურიდიული პირის - საზღვაო ტრანსპორტის სააგენტოს დებულების დამტკიცების შესახებ“ საქართველოს ეკონომიკისა და მდგრადი განვითარების მინისტრის 2011 წლის 14 აპრილის N1- 1/585 ბრძანებაში ცვლილების შეტანის თაობაზე“

1. მე-3 მუხლის მე-2 პუნქტის:

ა) „ჯ“ ქვეპუნქტი ამოღებულ იქნეს;

ბ) „ჰ⁵“ ქვეპუნქტი ჩამოყალიბდეს შემდეგი რედაქციით:

„ჰ⁵) სააგენტოს უფლებამოსილების განხორციელებასთან დაკავშირებულ მონაცემთა ელექტრონული საინფორმაციო ბანკის შექმნა;“;

გ) „ჰ²⁰“ და „ჰ²¹“ ქვეპუნქტები ჩამოყალიბდეს შემდეგი რედაქციით:

„ჰ²⁰) შიდა სახმელეთო წყლებში ნაოსნობაში ჩართული გემის რეგისტრაცია, შიდა სახმელეთო წყლებში ნაოსნობაში ჩართული გემის ტექნიკური რეგულირება და ინსპექტირება;

ჰ²¹) შიდა სახმელეთო წყლებში ნაოსნობაში ჩართული გემის ტექნიკური ზედამხედველობის განმახორციელებელი ორგანიზაციის აღიარება;“. 

2. 13³ მუხლის მე-2 პუნქტი ჩამოყალიბდეს შემდეგი რედაქციით:

„2. დასავლეთ საქართველოს შიდა სახმელეთო წყლების ტრანსპორტის სამმართველო და აღმოსავლეთ საქართველოს შიდა სახმელეთო წყლების ტრანსპორტის სამმართველო:

ა) ახორციელებს შიდა სახმელეთო წყლების გემების წიგნში გემებისა და საზღვაო იპოთეკის რეგისტრაციას;

ბ) ახორციელებს შიდა სახმელეთო წყლებში ნაოსნობაში ჩართული გემებისთვის რეგისტრაციის მოწმობის გაცემას, რეგისტრაციის შეჩერებას, მოხსნასა და შეწყვეტას საქართველოს კანონმდებლობით დადგენილი წესით;

გ) უზრუნველყოფს შიდა სახმელეთო წყლებში ნაოსნობაში ჩართული გემებისთვის უსაფრთხოების წესების შემუშავებას;

დ) ახორციელებს შიდა სახმელეთო წყლებში ნაოსნობაში ჩართული გემების ინსპექტირებას;

ე) ახორციელებს შიდა სახმელეთო წყლებში ნაოსნობაში ჩართული გემის ტექნიკური ზედამხედველობის განმახორციელებელი ორგანიზაციის მონიტორინგს; 

ვ) ახორციელებს სხვა უფლება-მოვალეობებს ამ დებულებისა და საქართველოს კანონმდებლობის შესაბამისად.“.

3. 13⁵ მუხლი ჩამოყალიბდეს შემდეგი რედაქციით:

„მუხლი 13⁵ . ჰიდროგრაფიული სამსახური

1. ჰიდროგრაფიულ სამსახურში შედის კარტოგრაფიის, ჰიდროგრაფიული კვლევისა და სანავიგაციო ნიშნების სამმართველო და სინოპტიკური სამმართველო.

2. კარტოგრაფიის, ჰიდროგრაფიული კვლევისა და სანავიგაციო ნიშნების სამმართველო უზრუნველყოფს:

ა) საქართველოს პასუხისმგებლობის ზონაში, ნავსადგურებში, ნავსადგურების მიმდებარე ტერიტორიასა და საქართველოს სანაპირო ზოლში ჰიდროგრაფიული და გეოდეზიური კვლევების დაგეგმვასა და განხორციელებას;

ბ) საქართველოს სანაპირო ზოლის კვლევას და მისი შედეგების საზღვაო სანავიგაციო რუკებზე ასახვას;

გ) გენერალური რუკების, სამგზავრო-სანავიგაციო და ნავსადგურების რუკების შექმნას, წარმოებასა და პერიოდულ კორექტირებას;

დ) ნავიგაციისთვის მნიშვნელოვანი ცვლილებების იდენტიფიცირებისა და მათი სანავიგაციო რუკებზე ასახვის მიზნით, რეგულარულ მონიტორინგს;

ე) არსებული საზღვაო რუკებისა და პუბლიკაციების კორექტირების მიზნით „ზღვაოსანთა უწყებების” გამოცემასა და შესაბამისი ფორმით გავრცელებას;

ვ) სანავიგაციო საშიშროების და ასევე ზღვაზე მეტეოროლოგიური მდგომარეობის შესახებ ინფორმაციის მიღებას, დამუშავებას;

ზ) საზღვაო სანავიგაციო გაფრთხილებების გავრცელებას ნავიგაციური ტელექსის საშუალებით, დადგენილი საერთაშორისო სტანდარტებისა და სანავიგაციო გაფრთხილებების მსოფლიო სამსახურის (WWNWS) მიერ განსაზღვრული დროითი შუალედებისა და სიხშირეების გათვალისწინებით;

თ) საქართველოს პასუხისმგებლობის ზონაში სანავიგაციო ნიშნების (GPS) მონიტორინგის კომპლექსური სისტემის დანერგვასა და ოპერირებას;

ი) ნავსადგურებში, მათ მისასვლელ არხებსა და მიმდებარე აკვატორიაში განთავსებულ სანავიგაციო ნიშნებზე ავტომატური იდენტიფიცირების სისტემის (AIS) დანერგვასა და ოპერირებას;

კ) მცურავი და სახმელეთო სანავიგაციო მოწყობილობების უწყვეტ და გამართულ მუშაობას, საჭიროების შემთხვევაში ახალი სანავიგაციო ნიშნების განთავსებას და გადაადგილებას საზღვაო უსაფრთხოების სტანდარტების შესაბამისად;

ლ) მშენებარე ნავსადგურების სახმელეთო და მცურავი სანავიგაციო ნიშნებით აღჭურვას;

მ) საზღვაო და სახმელეთო სანავიგაციო ნიშნებზე სარემონტო და სარეკონსტრუქციო სამუშაოების ჩატარებას;

ნ) ამ დებულებითა და საქართველოს კანონმდებლობით განსაზღვრული სხვა უფლება-მოვალეობების შესრულებას.

3. სინოპტიკური სამმართველო უზრუნველყოფს:

ა) ამინდის რეგულარულ მონიტორინგს ტექნიკური და ინფორმაციული საშუალებების გამოყენებით;

ბ) ამინდის პროგნოზირებას და საშტორმო გაფრთხილებების გამოცემას ზღვაზე და ნავსადგურებში ადამიანის სიცოცხლისა და ნავიგაციის უსაფრთხოების უზრუნველსაყოფად;

გ) მეტეოროლოგიური მონაცემებისა და პროგნოზების აღრიცხვას, ბაზის შექმნას, განახლებასა და მათ დაარქივებას დადგენილი წესით;

დ) ამ დებულებითა და საქართველოს კანონმდებლობით განსაზღვრული სხვა უფლება-მოვალეობების შესრულებას.“.