„საქართველოს ფინანსთა სამინისტროს საგამოძიებო სამსახურში სამსახურის გავლის წესის დამტკიცების შესახებ“ საქართველოს ფინანსთა მინისტრის 2009 წლის 25 ნოემბრის №764 ბრძანებაში ცვლილების შეტანის თაობაზე

1. 48-ე მუხლი ჩამოყალიბდეს შემდეგი რედაქციით:

„მუხლი 48. დისციპლინური პასუხისმგებლობა სამსახურის თანამშრომლების მიმართ, რომლებიც ახორციელებენ გამოძიებას

სამსახურის თანამშრომლების მიმართ, რომლებიც ახორციელებენ გამოძიებას, დისციპლინური სახდელის დადება სისხლის სამართლის საპროცესო ნორმების დარღვევის გამო შეიძლება მხოლოდ პროკურორის წარდგინებით ან სასამართლოს კერძო განჩინების საფუძველზე, ხოლო სხვა დარღვევების გამო – საერთო წესით.“.

2. 50-ე მუხლს დაემატოს შემდეგი შინაარსის მე-3 პუნქტი:

„3. ამ მუხლის მე-2 პუნქტით დადგენილი ვალდებულება არ ვრცელდება სამსახურის სპეციალური რაზმის თანამშრომლებზე. იმ შემთხვევაში, თუ სამსახურის მიერ მათთვის მოწყობილი კვალიფიკაციის ამაღლების (მომზადების, გადამზადების) შესაბამისი კურსები შედგება რამდენიმე სასწავლო მოდულისგან და სამსახურის სპეციალური რაზმის თანამშრომელი რომელიმე კონკრეტული სასწავლო მოდულის შუალედურ/საბოლოო გამოცდაზე პირველად მიიღებს უარყოფით შეფასებას, მას მხოლოდ ერთჯერადად მიეცემა უფლება, განმეორებით ჩააბაროს აღნიშნული შუალედური/საბოლოო გამოცდა (მომდევნო სასწავლო მოდულის დაწყებამდე) და მიიღოს დადებითი შეფასება, წინააღმდეგ შემთხვევაში ის დათხოვნილი იქნება სამსახურიდან.“.