„გზისპირა ზონაში საგზაო ინსპექტირების წესის დამტკიცების შესახებ“ საქართველოს მთავრობის 2025 წლის 22 იანვრის №18 დადგენილებაში ცვლილების შეტანის თაობაზე

დოკუმენტის სტრუქტურა

განმარტებების დათვალიერება

დაკავშირებული დოკუმენტები

დოკუმენტის მონიშვნები

„გზისპირა ზონაში საგზაო ინსპექტირების წესის დამტკიცების შესახებ“ საქართველოს მთავრობის 2025 წლის 22 იანვრის №18 დადგენილებაში ცვლილების შეტანის თაობაზე
დოკუმენტის ნომერი	29
დოკუმენტის მიმღები	საქართველოს მთავრობა
მიღების თარიღი	23/01/2026
დოკუმენტის ტიპი	საქართველოს მთავრობის დადგენილება
გამოქვეყნების წყარო, თარიღი	ვებგვერდი, 26/01/2026
სარეგისტრაციო კოდი	310150000.10.003.025578

PDF გადმოწერა

„გზისპირა ზონაში საგზაო ინსპექტირების წესის დამტკიცების შესახებ“ საქართველოს მთავრობის 2025 წლის 22 იანვრის №18 დადგენილებაში ცვლილების შეტანის თაობაზე

მუხლი 1

„ნორმატიული აქტების შესახებ“ საქართველოს ორგანული კანონის მე-20 მუხლის მე-4 პუნქტის შესაბამისად, „გზისპირა ზონაში საგზაო ინსპექტირების წესის დამტკიცების შესახებ“ საქართველოს მთავრობის 2025 წლის 22 იანვრის №18 დადგენილებაში (www.matsne.gov.ge, 23/01/2025, 310150000.10.003.024908) შეტანილ იქნეს ცვლილება და დადგენილებით დამტკიცებული „გზისპირა ზონაში საგზაო ინსპექტირების წესის“:

1. მე-14 მუხლის:

ა) მე-2 პუნქტს „ბ“ ქვეპუნქტის შემდეგ დაემატოს შემდეგი შინაარსის „გ“ – „ვ“ ქვეპუნქტები:

„გ) ECMT-ს ციფრულ სისტემაში:

გ.ა) ECMT სანებართვო დოკუმენტის საინფორმაციო დოკუმენტს;

გ.ბ) სააღრიცხვო წიგნში ან რეისის საინფორმაციო დოკუმენტში დაფიქსირებულ მონაცემებს;

დ) ECMT სერტიფიკატების შევსების სისწორესა და ურთიერთშესაბამისობას ECMT სანებართვო დოკუმენტის საინფორმაციო დოკუმენტთან;

ე) სატვირთო ავტომობილისა და მისაბმელის (ნახევარმისაბმელის) გზისთვის ვარგისობის ტესტის სერტიფიკატს;

ვ) ECMT-ს ციფრულ სისტემაში მოძიებულ ECMT სანებართვო დოკუმენტს და, სურვილის შემთხვევაში, ავსებს ინფორმაციას და აკეთებს შესაბამის აღნიშვნას. გამოვლენილი დარღვევის შემთხვევაში, აწესებს სანქციებს, ECMT-ს ციფრული სისტემის (DS) საკუთარი ანგარიშიდან ახდენს კონტროლის შედეგის ასახვას.“;

ბ) მე-4 პუნქტი ჩამოყალიბდეს შემდეგი რედაქციით:

„4. სანებართვო დოკუმენტის მოთხოვნებიდან გამომდინარე, თუ გადამზიდველმა/მძღოლმა ვერ წარადგინა ამ წესის დანართ №5-ის მე-18, 22-ე და 23-ე პუნქტებით გათვალისწინებული სათანადო დოკუმენტაცია, სამინისტროს შესაბამისი დანაყოფი, სააგენტოს უფლებამოსილი პირის შეტყობინების შემდეგ, უფლებამოსილია, მძღოლს შეუზღუდოს ამ სატრანსპორტო საშუალებით გადაადგილება შესაბამისი დოკუმენტების წარდგენამდე.“.

2. დანართ №2-ის მე-17 პუნქტი ჩამოყალიბდეს შემდეგი რედაქციით:

„17

მძღოლის ბარათის არქონა და/ან წარმოუდგენლობა; მძღოლი ფლობს და/ან იყენებს ერთზე მეტ მძღოლის ბარათს.“.

3. დანართ №5-ის:

ა) მე-18 და მე-19 პუნქტები ჩამოყალიბდეს შემდეგი რედაქციით:

„18.

საერთაშორისო საავტომობილო სატვირთო გადაზიდვის განხორციელება სანებართვო დოკუმენტის გარეშე (სტატუსი: არ გააჩნია, ჩამორთმეული, ვადაგასული, გადაცემულია სხვა პირზე), ECMT სანებართვო დოკუმენტის შემთხვევაში, წარმოდგენილი სავალდებულო დოკუმენტების (ციფრული ან დაბეჭდილი ფორმით მხოლოდ თეთრ ქაღალდზე) საფუძველზე, შეუძლებელია ინსპექტირების განხორციელება.

19.

საერთაშორისო საავტომობილო სატვირთო გადაზიდვის სანებართვო დოკუმენტი დაზიანებულია (არ იკითხება მონაცემები, ECMT სანებართვო დოკუმენტის შემთხვევაში − დაბეჭდილი ფორმით წარმოდგენილ საინფორმაციო დოკუმენტში).“;

ბ) 23-ე და 24-ე პუნქტები ჩამოყალიბდეს შემდეგი რედაქციით:

„23.

ECMT მრავალმხრივი სანებართვო დოკუმენტით სატრანსპორტო ოპერაციის განხორციელებისას, გადამზიდველმა/მძღოლმა ვერ წარმოადგინა შესაბამი სააღრიცხვო წიგნი ელექტრონული ფორმით ან რეისის საინფორმაციო დოკუმენტი ციფრული ან დაბეჭდილი ფორმით, მხოლოდ თეთრ ქაღალდზე, ან წარმოდგენილი ინფორმაცია არ შეესაბამება ECMT სანებართვო დოკუმენტს.

24.

ECMT მრავალმხრივი სანებართვო დოკუმენტით სატრანსპორტო ოპერაციის განხორციელებისას, გადამზიდველის/მძღოლის მიერ წარმოდგენილ სააღრიცხვო წიგნში (ელექტრონული ფორმით ან რეისის საინფორმაციო დოკუმენტი ციფრული ან დაბეჭდილი ფორმით, მხოლოდ თეთრ ქაღალდზე) არ იკითხება შესაბამისი მონაცემები.“;

გ) 26-ე პუნქტი ჩამოყალიბდეს შემდეგი რედაქციით:

„26.

ECMT მრავალმხრივი სანებართვო დოკუმენტით სატრანსპორტო ოპერაციის განხორციელებისას გადამზიდველმა/მძღოლმა დაარღვია ტერიტორიული შეზღუდვა (A,GR, H, I, RUS).“;

დ) 29-ე პუნქტი ჩამოყალიბდეს შემდეგი რედაქციით:

„29.

ECMT მრავალმხრივი სანებართვო დოკუმენტით სატრანსპორტო ოპერაციის განხორციელებისას, გადამზიდველმა/მძღოლმა წარმოადგინა ლამინირებული ECMT სერტიფიკატები.“.

მუხლი 2

დადგენილება ამოქმედდეს გამოქვეყნებისთანავე და გავრცელდეს 2026 წლის 1 იანვრიდან წარმოშობილ სამართლებრივ ურთიერთობებზე.

პრემიერ-მინისტრი ირაკლი კობახიძე