„ექსტენსიური აკვაკულტურის ნებართვის გაცემის წესისა და პირობების დამტკიცების შესახებ“ საქართველოს მთავრობის 2021 წლის 6 ივლისის №326 დადგენილებაში ცვლილების შეტანის თაობაზე

1. „ა“ ქვეპუნქტი ჩამოყალიბდეს შემდეგი რედაქციით:

„ა) ნებართვის მიღებიდან 6 თვის ვადაში სააგენტოს წარუდგინოს წყლის ობიექტისა და თევზსამეურნეო საქმიანობის მართვის გეგმა (შემდგომში – მართვის გეგმა), რომლის შემუშავების, დამტკიცებისა და მასში ცვლილების შეტანის წესი განისაზღვრება მინისტრის ბრძანებით. ამ მოთხოვნის დაუცველობა წარმოადგენს ნებართვის გაუქმების უპირობო საფუძველს;“.

2. „ი“ ქვეპუნქტი ჩამოყალიბდეს შემდეგი რედაქციით:

„ი) მართვის გეგმის დამტკიცებამდე წყალსატევის დათევზიანება განახორციელოს სააგენტოსთან შეთანხმებით, ხოლო მართვის გეგმის დამტკიცების შემდეგ – მხოლოდ მართვის გეგმით განსაზღვრული წესით;“.

3. „ლ“ ქვეპუნქტი ჩამოყალიბდეს შემდეგი რედაქციით:

„ლ) სააგენტოსა და სსიპ − სურსათის ეროვნულ სააგენტოს დაუყოვნებლივ აცნობოს თევზის ან/და სხვა ჰიდრობიონტის დაავადების, მისი საბინადრო გარემოს გაუარესების, განადგურების საშიშროების წარმოშობის ან/და დაღუპვის შესახებ;“.

4. „ო“, „პ“ და „ჟ“ ქვეპუნქტები ჩამოყალიბდეს შემდეგი რედაქციით:

„ო) ყოველწლიურად, პირველი აპრილიდან პირველ მაისამდე პერიოდში, დეპარტამენტს წარუდგინოს სრული ანგარიში სანებართვო პირობებისა და მართვის გეგმით გათვალისწინებული ღონისძიებების შესრულების თაობაზე (მათ შორის, თევზსამეურნეო ღონისძიებების გატარების, თევზის რესურსის მარაგების აღრიცხვისა და თევზის რესურსით სარგებლობის შესახებ, სახეობებისა და ოდენობების მიხედვით);

პ) ხელი არ შეუშალოს მისთვის გადაცემულ წყლის ობიექტზე, სააგენტოს თანხმობის საფუძველზე, სამეცნიერო-კვლევითი სამუშაოების ჩატარებას. ამ შემთხვევაში ნებართვის მფლობელს წინასწარ უნდა ეცნობოს სამეცნიერო-კვლევითი სამუშაოების ჩატარების შინაარსისა და ვადების შესახებ;

ჟ) უზრუნველყოს წყალსატევში წყლის რაციონალური გამოყენება. დაიცვას წყალსარგებლობის დადგენილი წესები, ნორმები და რეჟიმი, ხოლო, თუ წყალსატევი გამოიყენება ენერგეტიკული, საირიგაციო, სასმელი დანიშნულებით, არ დაუშვას თევზის მოხვედრა სამელიორაციო ან/და სხვა სისტემებში, ამ წესის საფუძველზე გაფორმებული ხელშეკრულების შესაბამისად. საქმიანობის განხორციელებისას არ დაუშვას წყალსატევის დაბინძურება, დანაგვიანება და დაშრეტა, უზრუნველყოს წყლის რესურსებზე მავნე ზემოქმედების თავიდან აცილება და მისი შედეგების ეფექტიანი ლიკვიდაცია;“.