„საჯარო დაწესებულებაში სტაჟირების გავლის წესის დამტკიცების თაობაზე“ საქართველოს მთავრობის 2023 წლის 15 მაისის №177 დადგენილებაში ცვლილების შეტანის შესახებ

„მუხლი 2​¹

1. საქართველოს პრემიერ-მინისტრის გადაწყვეტილებით, 2025 წლის პირველი სექტემბრიდან საჯარო დაწესებულებებში, ასევე საჯარო დაწესებულებების სისტემაში შემავალ საჯარო და კერძო სამართლის იურიდიულ პირებში (გარდა კულტურული, საგანმანათლებლო, სამეცნიერო, კვლევითი, სასპორტო, რელიგიური და წევრობაზე დაფუძნებული საჯარო და კერძო სამართლის იურიდიულ პირებისა) გამოცხადდეს ანაზღაურებადი სტაჟირების კონკურსი, შემდეგი პირობების გათვალისწინებით:

ა) სტაჟირების პერიოდი განისაზღვროს 2025 წლის 1 ოქტომბრიდან 31 დეკემბრის ჩათვლით;

ბ) სტაჟიორის კონკურსზე განაცხადის წარდგენის ვადად განისაზღვროს 2025 წლის 1 სექტემბრიდან 2025 წლის 10 სექტემბრის ჩათვლით პერიოდი, გამოცხადებული კონკურსების შესაბამისად;

გ) სტაჟირებაზე განაცხადის წარდგენა განხორციელდეს საქართველოს მთავრობის ადმინისტრაციის მიერ ადმინისტრირებულ ვებგვერდზე − www.hr.gov.ge;

დ) სტაჟიორის შესარჩევი კონკურსი გამოცხადდეს შესაბამისი სტრუქტურული ერთეულ(ებ)ის ან/და სწავლის სფეროების შესაბამისი კლასიფიკატორების მიხედვით;

ე) საჯარო დაწესებულება უფლებამოსილია, სტაჟიორის შესარჩევი კონკურსი გამოაცხადოს მისი სისტემის ფარგლებში, კონსოლიდირებული კონკურსის სახით;

ვ) სტაჟიორად შეიძლება, მიღებულ იქნეს საქართველოს ქმედუნარიანი მოქალაქე, რომელიც აკმაყოფილებს შემდეგ მოთხოვნებს:

ვ.ა) იცის სახელმწიფო ენა;

ვ.ბ) სწავლობს უმაღლესი განათლების პირველ საფეხურზე  (დამამთავრებელი სასწავლო წლის შემთხვევაში) ან მეორე საფეხურზე ან დასრულებული აქვს უმაღლესი განათლების პირველი ან მე-2 საფეხური 2024-2025 სასწავლო წლის გაზაფხულის სემესტრში;

ზ) შერჩევის მნიშვნელოვან კრიტერიუმად განისაზღვროს სტაჟირების მსურველი პირის აკადემიური მოსწრება (ქულათა სისტემა – 71 − 100 ქულის მაჩვენებელი ან/და GPA 2.7 − 4.0) – გასაუბრებისას თანაბარი კანდიდატების შემთხვევაში, უპირატესობა მიენიჭოთ უმაღლესი მოსწრების კანდიდატებს;

თ)  საჯარო დაწესებულებებმა და საჯარო დაწესებულებების სისტემაში შემავალმა საჯარო და კერძო სამართლის იურიდიულმა პირებმა, სტრუქტურული ერთეულის შესაბამისად, სპეციფიკიდან გამომდინარე, განსაზღვრონ სტაჟიორთა დამატებითი საკვალიფიკაციო მოთხოვნები:

თ.ა) პროფესია (შესაბამისი განათლება);

თ.ბ)  შესაბამისი უცხო ენის ცოდნა (საჭიროების შემთხვევაში);

ი) სტაჟირების მსურველმა პირმა უნდა წარადგინოს:

ი.ა) პირადობის მოწმობის ასლი;

ი.ბ) ინფორმაცია ამ პუნქტის „ვ.ბ“ და „ზ“ ქვეპუნქტებთან დაკავშირებით.  განათლების დამადასტურებელი უცხოენოვანი დოკუმენტაციის შემთხვევაში − ნათარგმნი და დამოწმებული ნოტარიულად;

ი.გ) სამოტივაციო წერილი;

კ)  საჯარო დაწესებულება და საჯარო დაწესებულებების სისტემაში შემავალი საჯარო და კერძო სამართლის იურიდიული პირი  უფლებამოსილნი არიან, საგანმანათლებლო დაწესებულებიდან გამოითხოვონ სტაჟირების მსურველი პირის შესახებ ამ პუნქტის „ვ.ბ“, „ზ“ და „თ.ა“ ქვეპუნქტებით გათვალისწინებული შესაბამისი ინფორმაცია/დოკუმენტაცია;

ლ) სტაჟირების მსურველი პირის შეფასებას განახორციელებს შესაბამისი დაწესებულების ხელმძღვანელის მიერ შექმნილი კომისია. კონსოლიდირებული კონკურსის შემთხვევაში, კომისიის შემადგენლობა განისაზღვრება საჯარო დაწესებულების ხელმძღვანელის მიერ, საჯარო დაწესებულებისა და მის სისტემაში შემავალი დაწესებულებების უფლებამოსილი პირების მონაწილეობით;

მ ) კონკურსი ჩატარდეს ორ ეტაპად:

მ.ა) პირველი ეტაპი – განაცხადების გადარჩევა;

მ.ბ) მეორე ეტაპი – გასაუბრება;

ნ) საჯარო დაწესებულება, ასევე საჯარო დაწესებულების სისტემაში შემავალი საჯარო და კერძო სამართლის იურიდიულ პირი უფლებამოსილნი არიან, ამ მუხლის შესაბამისად გამოცხადებულ სტაჟირების კონკურსში მონაწილე კანდიდატს, რომელიც გამოცხადდა კონკურსის მეორე ეტაპზე − გასაუბრებაზე, იმავე ან/და საჯარო დაწესებულების სისტემაში მოქმედი სხვა დაწესებულების მიერ განსაზღვრული დამატებითი საკვალიფიკაციო მოთხოვნების გათვალისწინებით, შესთავაზონ სტაჟირების ხელშეკრულების გაფორმება იმავე ან/და საჯარო დაწესებულების სისტემაში მოქმედ სხვა დაწესებულებაში. კანდიდატის თანხმობის შემთხვევაში, შესაბამისი დაწესებულება იღებს გადაწყვეტილებას მასთან სტაჟირების ხელშეკრულების გაფორმებასთან დაკავშირებით;

ო) პირი სტაჟიორად არ მიიღება, თუ:

ო.ა) იგი ნასამართლევია განზრახი დანაშაულისთვის;

ო.ბ) იგი საჯარო სამსახურიდან გათავისუფლდა დისციპლინური გადაცდომის ჩადენისთვის და დისციპლინური გადაცდომის ჩადენისთვის გათავისუფლებიდან 1 წელი არ გასულა;

ო.გ) მან სტაჟიორად მიღებისას არ წარადგინა საქართველოს კანონმდებლობით დადგენილი ფორმის ნარკოლოგიური შემოწმების ცნობა ან წარდგენილი ნარკოლოგიური შემოწმების ცნობა ადასტურებს მის მიერ ნარკოტიკული საშუალების მოხმარების ფაქტს;

ო.დ) იგი სასამართლომ მხარდაჭერის მიმღებად ცნო, თუ სასამართლოს გადაწყვეტილებით სხვა რამ არ არის განსაზღვრული;

ო.ე) თუ სტაჟირების მსურველი პირის მიერ იმავე საჯარო დაწესებულებაში 2022 წლის 1 ნოემბრიდან გავლილი სტაჟირების საერთო ვადა შეადგენს 12 თვეს.

2. ამ მუხლის პირველი პუნქტით განსაზღვრულ დაწესებულებებში სტაჟიორს შრომის ანაზღაურება მიეცემა „შრომის ანაზღაურების შესახებ“ საქართველოს კანონის 17¹ მუხლით გათვალისწინებული შრომის ანაზღაურების ზღვრული ოდენობის ფარგლებში.

3. იმ საჯარო დაწესებულებაში სტაჟირება, სადაც მუშაობა ითვლება საჯარო სამსახურად, ჩაითვლება საჯარო სამსახურის სტაჟში, ხოლო საჯარო დაწესებულებაში შემავალ საჯარო ან/და კერძო სამართლის იურიდიულ პირში სტაჟირება − საერთო სტაჟში/სამუშაო გამოცდილებაში.

4. განაცხადის გამოგზავნით კანდიდატი ადასტურებს, რომ იცნობს და ეთანხმება კონკურსის შესახებ შეტყობინებაში მოცემულ მოთხოვნებს, ფუნქციებსა და პირობებს. ასევე ის თანახმაა, თავის განაცხადში მითითებული პერსონალური მონაცემები, „პერსონალურ მონაცემთა დაცვის შესახებ“ საქართველოს კანონის მოთხოვნათა შესაბამისად, დამუშავდეს სტაჟიორის შერჩევის მიზნებით და ასევე გამოთქვამს თანხმობას ამავე კონკურსის ფარგლებში კანდიდატის შესახებ საჭირო ინფორმაციის/დოკუმენტის მოძიების/გადამოწმების თაობაზე.

5. სტაჟიორის კონკურსის ჩატარებასა და სტაჟირების გავლასთან დაკავშირებული სხვა საკითხები მოწესრიგდეს ამ დადგენილებით დამტკიცებული „საჯარო დაწესებულებაში სტაჟირების გავლის წესის“ შესაბამისად.

6. ამ დადგენილებით დამტკიცებული „საჯარო დაწესებულებაში სტაჟირების გავლის წესის“ პირველი მუხლის მე-2 პუნქტით გათვალისწინებულ საჯარო დაწესებულებებს ეთხოვოთ, 2025 წელს სტაჟირების კონკურსი ჩაატარონ მათი შესაბამისი დებულებებით, ამ მუხლით განსაზღვრული პირობების გათვალისწინებით და აგრეთვე შერიგებისა და სამოქალაქო თანასწორობის საკითხებში საქართველოს სახელმწიფო მინისტრის აპარატმა იხელმძღვანელოს ამ დადგენილებით დამტკიცებული „საჯარო დაწესებულებაში სტაჟირების გავლის წესის“ VIII თავით –„სტაჟირების სპეციალური წესით“, ამ მუხლით განსაზღვრული პირობების გათვალისწინებით.“.