„საკრედიტო საგარანტიო სქემის სახელმწიფო პროგრამის დამტკიცების შესახებ“ საქართველოს მთავრობის 2019 წლის 29 მარტის №163 დადგენილებაში ცვლილების შეტანის თაობაზე

„7. კონკრეტულ სესხთან დაკავშირებით საკრედიტო გარანტიის გაცემის შემთხვევაში, ბენეფიციარს იმავე სესხზე შეუძლია, ისარგებლოს „აწარმოე საქართველოში“ სახელმწიფო პროგრამის დამტკიცების შესახებ“ საქართველოს მთავრობის 2014 წლის 30 მაისის №365 დადგენილებით დამტკიცებული „თავი I⁵. უნივერსალური ინდუსტრიული ნაწილით“ (შემდგომში − უნივერსალური ინდუსტრიული ნაწილი), რომლის შემთხვევაში, მოქმედებს ქვემოთ მოცემული პირობები:

ა) ამ პროგრამის დანართ №1-ის ნაცვლად მიზნობრივი ეკონომიკური საქმიანობების ჩამონათვალი განისაზღვრება უნივერსალური ინდუსტრიული ნაწილის დანართ №1-ით;

ბ) უნივერსალური ინდუსტრიული ნაწილით სარგებლობის შემთხვევაში, ამ პროგრამის მე-4 მუხლის მე-9 პუნქტისგან განსხვავებით, საკრედიტო გარანტიით სარგებლობის საკომისიოს მოცულობის დადგენისას სააგენტო, სესხის გარანტირებული ნაწილის მოცულობის გათვალისწინებით, იყენებს დიფერენცირებულ მიდგომას სესხის ძირი თანხის 60%-ის ჩათვლით მოცულობასა და სესხის ძირი თანხის 60%-ის ზემოთ ოდენობაზე;

გ) ამ პროგრამის მე-5 მუხლის პირველი პუნქტით განსაზღვრული მოთხოვნების ნაცვლად მოქმედებს უნივერსალური ინდუსტრიული ნაწილის 12²⁹ მუხლის პირველი პუნქტი;

დ) ამ პროგრამის მე-6 მუხლის პირველი და მე-2 პუნქტებით  განსაზღვრული პირობების ნაცვლად მოქმედებს უნივერსალური ინდუსტრიული ნაწილის 12³⁰ მუხლის მე-2 და მე-3 პუნქტებით გათვალისწინებული პირობები;

ე) ამ პროგრამის მე-10 მუხლის პირველი პუნქტის ნაცვლად მოქმედებს უნივერსალური ინდუსტრიული ნაწილის 12³⁰ მუხლის მე-8 პუნქტის „ე“ და „ვ“ ქვეპუნქტების შესაბამისად დადგენილი მოთხოვნები;

ვ) უნივერსალური ინდუსტრიული ნაწილით სარგებლობა დაუშვებელია ამ პროგრამის ფარგლებს გარეთ უკვე არსებული სესხის რეფინანსირებით/რესტრუქტურიზებით;

ზ) თუ ბენეფიციარი სარგებლობს ამ პროგრამითა და უნივერსალური ინდუსტრიული ნაწილით, მის მიმართ ორივე პროგრამის ფარგლებში, ჯამურად, სესხების მოცულობა არ უნდა აჭარბებდეს 10 მლნ ლარს.“.