2025 წლის 3 ივლისიდან 2025 წლის 1 ოქტომბრამდე პერიოდში იმპორტირებული ნარკოტიკული საშუალებებისა და ფსიქოტროპული ნივთიერებების საბითუმო რეალიზაციის განხორციელებაზე სსიპ - სამედიცინო და ფარმაცევტული საქმიანობის რეგულირების სააგენტოს მიერ თანხმობის გაცემის წესის დამტკიცების შესახებ

1. 2025 წლის 3 ივლისიდან 2025 წლის 1 ოქტომბრამდე პერიოდში იმპორტირებული ნარკოტიკული საშუალებებისა და ფსიქოტროპული ნივთიერებების საბითუმო რეალიზაციის განხორციელებაზე სსიპ – სამედიცინო და ფარმაცევტული საქმიანობის რეგულირების სააგენტოს მიერ თანხმობის გაცემის წესი (შემდგომ – წესი) შემუშავებულია „ნარკოტიკული საშუალებების, ფსიქოტროპული ნივთიერებების, პრეკურსორებისა და ნარკოლოგიური დახმარების შესახებ“ საქართველოს კანონში ცვლილების შეტანის თაობაზე“ საქართველოს კანონის (საქართველოს საკანონმდებლო მაცნე, ვებგვერდი, 02.07.2025, სარეგისტრაციო კოდი: 470070000.05.001.102742) მე-2 მუხლის მე-5 პუნქტის შესაბამისად და განსაზღვრავს 2025 წლის 3 ივლისიდან 2025 წლის 1 ოქტომბრამდე პერიოდში იმპორტირებული ნარკოტიკული საშუალებებისა და ფსიქოტროპული ნივთიერებების საბითუმო  რეალიზაციის განხორციელებაზე სსიპ – სამედიცინო და ფარმაცევტული საქმიანობის რეგულირების სააგენტოს (შემდგომ – სააგენტო) მიერ თანხმობის გაცემის პირობებსა და პროცედურას.

2. ამ წესში გამოყენებულ ტერმინებს აქვს იგივე მნიშვნელობა, რაც განსაზღვრულია „ნარკოტიკული საშუალებების, ფსიქოტროპული ნივთიერებების, პრეკურსორებისა და ნარკოლოგიური დახმარების შესახებ“ საქართველოს კანონით.

3. ეს წესი ვრცელდება ნარკოტიკული საშუალებებსა და ფსიქოტროპულ ნივთიერებებზე, აგრეთვე სპეციალურ კონტროლს დაქვემდებარებულ ფარმაცევტულ პროდუქტთან გათანაბრებულ სამკურნალო საშუალებებზე (მათ შორის, პრეპარატებზე) (შემდგომ – ფარმაცევტული პროდუქტი).

მუხლი 2

1. ფარმაცევტული პროდუქტის საბითუმო რეალიზაციაზე თანხმობის მოსაპოვებლად სააგენტოს წარედგინება განაცხადი და ფარმაცევტული პროდუქტის განაწილების გეგმა-გრაფიკი, ფორმა 1-ის შესაბამისად.

2. განაცხადი უნდა შეიცავდეს ფარმაცევტული პროდუქტის შემძენი ორგანიზაციის შესაბამისი საჭიროების დასაბუთებას და მას უნდა დაერთოს ხელშეკრულება ან სხვა დოკუმენტი, რომელიც გამოხატავს აღნიშნული ორგანიზაციის მიერ ამ პროდუქტის საბითუმო რეალიზაციის განმახორციელებლისგან შეძენის მზაობას.

3. სააგენტო განაცხადის რეგისტრაციიდან 10 სამუშაო დღის ვადაში განიხილავს წარდგენილ განაცხადს და თანდართული დოკუმენტაციის სისრულისა და ამ მუხლის მე-2 პუნქტით გათვალისწინებული დასაბუთების ხარისხის შეფასების შედეგად იღებს ერთ-ერთ შემდეგ გადაწყვეტილებას:

ა) მოთხოვნის დაკმაყოფილების შესახებ;

ბ) მოთხოვნის ნაწილობრივ დაკმაყოფილების შესახებ;

გ) მოთხოვნის დაკმაყოფილებაზე უარის თქმის შესახებ.

4. თუ განაცხადი წარდგენილია ერთდროულად მატერიალური და ელექტრონული ფორმით, ამ მუხლის მე-3 პუნქტით გათვალისწინებული 10-დღიანი ვადის ათვლა დაიწყება ბოლო განაცხადის რეგისტრაციის მომენტიდან.

5. წარდგენილ განაცხადსა და თანდართულ დოკუმენტაციაში ხარვეზის არსებობის შემთხვევაში სააგენტო უფლებამოსილია განაცხადის წარმდგენს განუსაზღვროს დამატებით 3-დღიანი ვადა ხარვეზის აღმოსაფხვრელად და სრულყოფილი დოკუმენტაციის წარსადგენად, რა დროსაც ამ მუხლის მე-4 პუნქტით განსაზღვრული 10-დღიანი ვადის დინება ჩერდება. დოკუმენტაციის ხელახლა წარდგენისას სააგენტო იღებს ამ მუხლის მე-3 პუნქტით გათვალისწინებულ ერთ-ერთ გადაწყვეტილებას.

6. სააგენტოს მიერ ამ მუხლის მე-3 პუნქტის „ბ“ და „გ“ ქვეპუნქტების შესაბამისად მიღებული გადაწყვეტილება უნდა იყოს სათანადოდ დასაბუთებული და აკმაყოფილებდეს საქართველოს ზოგადი ადმინისტრაციული კოდექსის მოთხოვნებს.

მუხლი 3

1. თუ 2025 წლის 3 ივლისიდან ამ ბრძანების ამოქმედებამდე პერიოდში საბითუმო რეალიზაციის განხორციელებაზე თანხმობის მისაღებად სააგენტოსთვის წარდგენილია განაცხადი, რომელიც არ აკმაყოფილებს ამ ბრძანებით განსაზღვრულ მოთხოვნებს,  სააგენტოს ხელახლა უნდა წარედგინოს ამ ბრძანების მოთხოვნათა დაცვით შედგენილი განაცხადი თანდართული დოკუმენტაციით.

2. 2025 წლის 3 ივლისიდან ამ ბრძანების ამოქმედებამდე პერიოდში საბითუმო რეალიზაციის განხორციელების შემთხვევაში საბითუმო რეალიზაციის განმახორციელებელი ამ ბრძანებით გათვალისწინებულ დოკუმენტაციას სააგენტოს წარუდგენს არაუგვიანეს 2025 წლის 14 ივლისისა.

მუხლი 4

ამ წესის დარღვევა გამოიწვევს „წამლისა და ფარმაცევტული საქმიანობის შესახებ“ საქართველოს კანონის XXI¹ თავის (პასუხისმგებლობა ფარმაცევტული პროდუქტის მიმოქცევის სფეროში) შესაბამისი მუხლით განსაზღვრულ პასუხისმგებლობას.

      ფორმა 1

ფარმაცევტული პროდუქტის განაწილების გეგმა-გრაფიკი