“სახელმწიფო ორგანოებისათვის შენობა-ნაგებობების გადაცემის წესისა და პირების, მათი გამოყენებისა და დაცვის წესის დამტკიცების შესახებ"

სახელმწიფო სარეგისტრაციო კოდი 040.110.020.22.024.008.893

საქართველოს ეკონომიკური განვითარების მინისტრის

ბრძანება №1-1/586

2006 წლის 7 ივლისი

ქ. თბილისი

სახელმწიფო ორგანოებისათვის შენობა-ნაგებობების გადაცემის წესისა და პირობების, მათი გამოყენებისა და დაცვის წესის დამტკიცების შესახებ

„სახელმწიფო საკუთრებაში არსებული შენობა-ნაგებობების სარგებლობის უფლებით გადაცემის შესახებ“ საქართველოს კანონის მე-3 მუხლის მე-10 პუნქტის, „სახელმწიფო საკუთრებაში არსებული შენობა-ნაგებობების სარგებლობის უფლებით გადაცემის წესის დამტკიცების შესახებ“ საქართველოს მთავრობის 2006 წლის 12 ივნისის №110 დადგენილების და და საქართველოს მთავრობის 2004 წლის 10 სექტემბრის №77 დადგენილებით დამტკიცებული საქართველოს ეკონომიკური განვითარების სამინისტროს დებულების შესაბამისად, ვბრძანებ:

1. დამტკიცდეს სახელმწიფო ორგანოებისათვის შენობა-ნაგებობების გადაცემის წესი და პირობები, მათი გამოყენებისა და დაცვის წესი.

2. ეს ბრძანება ამოქმედდეს გამოქვეყნებისთანავე.

ნ. თურნავა

მინისტრის პირველი მოადგილე

სახელმწიფო ორგანოებისათვის შენობა-ნაგებობების გადაცემის წესი და პირობები, მათი გამოყენებისა და დაცვის წესი

    მუხლი 1. ზოგადი დებულებები

1. სახელმწიფო ორგანოებისათვის შენობა-ნაგებობების გადაცემის წესი და პირობები, მათი გამოყენებისა და დაცვის წესი შემუშავებული იქნა „სახელმწიფო საკუთრებაში არსებული შენობა-ნაგებობების სარგებლობის უფლებით გადაცემის შესახებ“ საქართველოს კანონის შესაბამისად. ეს წესი განსაზღვრავს საქართველოს ეკონომიკური განვითარების სამინისტროს მიერ სახელმწიფო ორგანოებისათვის შენობა-ნაგებობების გადაცემის წესსა და პირობებს, ასევე მათი გამოყენებისა და დაცვის წესს.

2. სახელმწიფო ორგანოებს (საკანონმდებლო აღამასრულებელი და სასამართლო ხელისუფლების და პროკურატურის) სახელმწიფო საკუთრებაში არსებული შენობა-ნაგებობები გადაეცემათ საქართველოს ეკონომიკური განვითარების მინისტრის ადმინისტრაციულ-სამართლებრივი აქტის საფუძველზე. აღნიშნულ შემთხვევაში ხელშეკრულება არ ფორმდება. მხარეთა შორის ფორმდება მხოლოდ მიღება-ჩაბარების აქტი.

3. გადაწყვეტილებას სახელმწიფო ორგანოებისათვის სახელმწიფო საკუთრებაში არსებულ შენობა-ნაგებობების გადაცემის თაობაზე იღებს საქართველოს ეკონომიკური განვითარების სამინისტრო.

4. სახელმწიფო საკუთრებაში არსებული შენობა-ნაგებობების სახელმწიფო ორგანოებისათვის გადაცემა ხორციელდება შემდეგი პრინციპების დაცვით:

ა) სახელმწიფო ორგანოებს სახელმწიფო საკუთრებაში არსებული შენობა-ნაგებობები გადაეცემათ მათ კომპეტენციაში არსებული ფუნქციების, ამოცანებისა და საკითხების განსახორციელებლად;

ბ) სახელმწიფო ორგანოებს სახელმწიფო საკუთრებაში არსებული შენობა-ნაგებობები გადაეცემათ უსასყიდლოდ.

    მუხლი 2. სახელმწიფო ორგანოებისათვის სახელმწიფო საკუთრებაში არსებული შენობა-ნაგებობების გადაცემის პირობები

1. სახელმწიფო ორგანოებისათვის სახელმწიფო საკუთრებაში არსებული შენობა-ნაგებობების გადაცემა ხორციელდება:

ა) სახელმწიფო ორგანოების თხოვნის საფუძველზე;

ბ) საქართველოს მთავრობის ინიციატივით სახელმწიფო ორგანოს თანხმობით.

2. ამ მუხლის პირველი პუნქტის „ა“ ქვეპუნქტით გათვალისწინებულ შემთხვევაში სახელმწიფო ორგანოები სახელმწიფო საკუთრებაში არსებული შენობა-ნაგებობების გადაცემის თხოვნით მიმართავენ საქართველოს ეკონომიკური განვითარების სამინისტროს.

3. სახელმწიფო ორგანოების თხოვნა სახელმწიფო საკუთრებაში არსებული შენობა-ნაგებობების გადაცემის თაობაზე უნდა შეიცავდეს შემდეგ მონაცემებს:

ა) სახელმწიფო საკუთრებაში არსებული შენობა-ნაგებობების დასახელება და ადგილმდებარეობა;

ბ) გადაცემის ვადა.

4. საქართველოს ეკონომიკური განვითარების სამინისტრო შემოსულ თხოვნას იხილავს და გადაწყვეტილებას ღებულობს ერთი თვის ვადაში.

5. სახელმწიფო ორგანოებისათვის სახელმწიფო საკუთრებაში არსებული შენობა-ნაგებებების გადაცემის თაობაზე საკითხის დადებითად გადაწყვეტის შემთხვევაში, საქართველოს ეკონომიკური განვითარების მინისტრი გამოსცემს ადმინისტრაციულ-სამართლებრივ აქტს – სახელმწიფო საკუთრებაში არსებული შენობა-ნაგებობების სახელმწიფო ორგანოსათვის გადაცემის შესახებ.

    მუხლი 3. სახელმწიფო ორგანოებისათვის გადაცემული, სახელმწიფო საკუთრებაში არსებული შენობა-ნაგებობების გამოყენების და დაცვის წესი

1. საქართველოს ეკონომიკური განვითარების სამინისტრო სახელმწიფო ორგანოებისათვის სახელმწიფო საკუთრებაში არსებული შენობა-ნაგებობების გადაცემის თაობაზე საკითხის დადებითად გადაწყვეტის შემთხვევაში, 1 თვის ვადაში გამოსცემს შესაბამის ადმინისტრაციულ-სამართლებრივ აქტს, რომელშიც აღინიშნება:

ა) სახელმწიფო ორგანოს დასახელება;

ბ) სახელმწიფო საკუთრებაში არსებული შენობა-ნაგებობების დასახელება, მისამართი, შენობა-ნაგებობების და მასზე დამაგრებული მიწის ნაკვეთის მონაცემები და საბალანსო ღირებულება;

გ) შენობა-ნაგებობის გადაცემის ვადა;

დ) სახელმწიფო ორგანოს ვალდებულება, რომ:

დ.ა) შენობა-ნაგებობები გამოიყენოს პირდაპირი დანიშნულებით მის კომპეტენციაში არსებული ფუნქციების, ამოცანებისა და საკითხების განსახორციელებლად;

დ.ბ) დაიცვას მოქმედი კანონმდებლობით დადგენილი შენობა-ნაგებობების ექსპლუატაციისა და სანიტარიული ნორმები;

დ.გ) გადაიხადოს შენობა-ნაგებობების ექსპლუატაციის კომუნალური გადასახადები (მათ შორის ელექტროენერგიის მოხმარების საფასური მოქმედი ტარიფის შესაბამისად);

დ.ე) დაუყოვნებლივ აცნობოს ეკონომიკური განვითარების სამინისტროს, თუ შენობა-ნაგებობა განადგურდა ან დაზიანდა;

დ.ვ) უზურნველყოს შენობა-ნაგებობა გარეშე პირთა ხელყოფისაგან და სხვა საფრთხისაგან;

დ.ზ) საჭიროების შემთხვევაში შენობა-ნაგებობას ჩაუტაროს სარემონტო სამუშაოები.

2. საქართველოს ეკონომიკური განვითარების მინისტრის მიერ სახელმწიფო ორგანოსათვის სახელმწიფო საკუთრებაში არსებული შენობა-ნაგებობების გადაცემის თაობაზე ადმინისტრაციულ-სამართლებრივი აქტის გამოცემიდან 20 დღის ვადაში სახელმწიფო ორგანოსა და საქართველოს ეკონომიკური განვითარების სამინისტროს შორის ფორმდება მიღება-ჩაბარების აქტი, რომელიც უნდა შეიცავდეს შემდეგ მონაცემებს:

ა) სახელმწიფო ორგანოს დასახელება;

ბ) სახელმწიფო საკუთრებაში არსებული შენობა-ნაგებობების დასახელება და მისამართი

გ) შენობა-ნაგებობების და მასზე დამაგრებული მიწის ნაკვეთის მონაცემები;

დ) საბალანსო ღირებულება.

    მუხლი 4. სახელმწიფო ორგანოებისათვის სახელმწიფო საკუთრებაში არსებული შენობა-ნაგებობების გადაცემასთან დაკავშირებული ადმინისტრაციულ-სამართლებრივი აქტის ძალადაკარგულად ან/და ბათილად ცნობა

1. სახელმწიფო ორგანოებისათვის სახელმწიფო საკუთრებაში არსებული შენობა-ნაგებობების გადაცემის თაობაზე საქართველოს ეკონომიკური განვითარების მინისტრის ადმინისტრაციულ-სამართლებრივი აქტის ძალადკარგულად და ბათილად ცნობის საკითხები რეგულირდება მოქმედი კანონმდებლობით.

2. ეკონომიკური განვითარების მინისტრის ადმინისტრაციულ-სამართლებრივი აქტის ძალადაკარგულად ან ბათილად ცნობის შემთხვევაში სახელმწიფო ორგანოსა და საქართველოს ეკონომიკური განვითარების სამინისტროს შორის ფორმდება შესაბამისი მიღება-ჩაბარების აქტი.

3. სახელმწიფო ორგანოსათვის სახელმწიფო საკუთრებაში არსებული შენობა-ნაგებობის გადაცემის პერიოდში წამოჭრილი სადაო საკითხები განიხილება მოქმედი კანონმდებლობის თანახმად.