“საქართველოს გარემოს დაცვისა და ბუნებრივი რესურსების სამინისტროს სახელმწიფო საქვეყწყებო დაწესებულების – დაცული ტერიტორიების დეპარტამენტის დებულების დამტკიცების შესახებ" საქართველო გარემოს დაცვისა და ბუნებრივი რესურსების მინისტრის 2006 წლის 11 იანვრის №9 ბრძანებაში ცვლილებებისა და დამატებების შეტანის თაობაზე"

სახელმწიფო სარეგისტრაციო კოდი 360.050.000.22.023.008.791

საქართველოს გარემოს დაცვისა და ბუნებრივი რესურსების მინისტრის

ბრძანება №478

2006 წლის 15 ივნისი

ქ. თბილისი

,,საქართველოს გარემოს დაცვისა და ბუნებრივი რესურსების სამინისტროს სახელმწიფო საქვეუწყებო დაწესებულების – დაცული ტერიტორიების დეპარტამენტის დებულების დამტკიცების შესახებ” საქართველოს გარემოს დაცვისა და ბუნებრივი რესურსების მინისტრის 2006 წლის 11 იანვრის №9 ბრძანებაში ცვლილებებისა და დამატებების შეტანის თაობაზე

,,ნორმატიული აქტების შესახებ” საქართველოს კანონის 36-ე მუხლის საფუძველზე, ვბრძანებ:

1. ,,საქართველოს გარემოს დაცვისა და ბუნებრივი რესურსების სამინისტროს სახელმწიფო საქვეუწყებო დაწესებულების – დაცული ტერიტორიების დეპარტამენტის დებულებაში (სსმ III, 17.01.2006, №6, მუხ. 47) შეტანილ იქნეს შემდეგი ცვლილებები და დამატებები:

ა) დებულების მე-5 მუხლის მე-2 პუნქტი ჩამოყალიბდეს შემდეგი რედაქციით:

,,2. დეპარტამენტის თავმჯდომარეს ჰყავს ერთი მოადგილე, რომელსაც, მისივე წარდგინებით, თანამდებობაზე ნიშნავს და თანამდებობიდან ათავისუფლებს მინისტრი.”;

ბ) დებულების მე-5 მუხლის მე-3 პუნქტის ,,ვ” ქვეპუნქტი ჩამოყალიბდეს შემდეგი რედაქციით:

,,ვ) მინისტრს თანამდებობაზე დასანიშნად წარუდგენს დეპარტამენტის ტერიტორიული ორგანოების ხელმძღვანელების და მოადგილეების (მათი არსებობის შემთხვევაში) კანდიდატურებს”;

გ) დებულების მე-5 მუხლის მე-3 პუნქტის ,,ზ” ქვეპუნქტი ჩამოყალიბდეს შემდეგი რედაქციით:

,,ზ) თანამდებობაზე ნიშნავს და თანამდებობიდან ათავისუფლებს დეპარტამენტის ცენტრალური აპრატის საშტატო განრიგით გათვალისწინებულ საჯარო მოსამსახურეებს”;

დ) დებულების მე-5 მუხლის მე-3 პუნქტს დაემატოს შემდეგი შინაარსის ,,რ” და ,,ს” ქვეპუნქტები:

,,რ) თანამდებობაზე ნიშნავს და თანამდებობიდან ათავისუფლებს საჯარო სამართლის იურიდიულ პირებად შექმნილი დაცული ტერიტორიების დირექციების დირექტორის მოადგილეებს;

ს) ითანხმებს დეპარტამენტის ტერიტორიული ორგანოების საშტატო ნუსხით განსაზღვრული თანამშრომლების კანდიდატურებს”;

ე) დებულების მე-5 მუხლს დაემატოს შემდეგი შინაარსის მე-4 პუნქტი:

,,4. დეპარტამენტის თავმჯდომარის მოადგილე:

ა) დეპარტამენტის თავმჯდომარის არყოფნის დროს დეპარტამენტის თავმჯდომარის მოვალეობას ასრულებს დეპარტამენტის თავმჯდომარის მოადგილე;

ბ) პასუხისმგებელია დეპარტამენტის განვითარების, დაგეგმვის სამმართველოებისა და დეპარტამენტის ტერიტორიული ორგანოების საქმიანობაზე, მათ მიერ შემუშავებული სამართლებრივი აქტების ზუსტ შესრულებაზე და ანგარიშვალდებულია დეპარტამენტის თავმჯდომარისა და მინისტრის წინაშე.”;

ვ) დებულების მე-7 მუხლის მე-3 პუნქტს დაემატოს შემდეგი შინაარსის ,,ვ”, ,,ზ”, ,,თ” და ,,ი” ქვეპუნქტები:

ვ) დეპარტამენტის ცენტრალური აპარატის მატერიალურ-ტექნიკური უზრუნველყოფა;

ზ) საკადრო საკითხებთან დაკავშირებით ნომენკლატურის ფარგლებში ბრძანებების პროექტების მომზადება როგორც თანამშრომელთა თანამდებობაზე დანიშვნის, გათავისუფლების, გადაადგილების და დაწინაურების, ასევე მათი წახალისება-დაჯილდოებისა და კანონმდებლობით გათვალისწინებულ შემთხვევებში მათთვის დისციპლინური პასუხისმგებლობის დადების შესახებ;

თ) შრომითი დისციპლინის კონტროლი, რეკომენდაციების შემუშავება, ზომების მიღება-დარღვევებისა და ხარვეზების გამოვლენის თავიდან ასაცილებლად;

ი) დაცული ტერიტორიების მცველების (რეინჯერი) კვალიფიკაციის ამაღლებისა და წვრთნის საქმიანობის წარმართვა და კოორდინაცია“.

2. ბრძანება ამოქმედდეს გამოქვეყნებისთანავე.

გ. პაპუაშვილი