„საჯარო სამართლის იურიდიული პირის – საქართველოს ხალხური სიმღერისა და ცეკვის სახელმწიფო აკადემიური ანსამბლი „რუსთავის“ დებულების დამტკიცების შესახებ“ საქართველოს განათლების, მეცნიერების, კულტურისა და სპორტის მინისტრის 2019 წლის 7 მარტის №47/ნ ბრძანებაში ცვლილების შეტანის თაობაზე

ა) 3¹ პუნქტი ჩამოყალიბდეს შემდეგი რედაქციით:

„3¹. ანსამბლის დირექტორს სამხატვრო ხელმძღვანელთან შეთანხმებით თანამდებობაზე ნიშნავს და ათავისუფლებს მინისტრი.“;

ბ) მე-5 პუნქტი ჩამოყალიბდეს შემდეგი რედაქციით:

„5. ანსამბლის სამხატვრო ხელმძღვანელი:

ა) ახორციელებს ანსამბლის შემოქმედებით ხელმძღვანელობას, მასვე ეკისრება ანსამბლის წარმომადგენლობა და პერსონალურად აგებს პასუხს მისი საქმიანობის სწორად წარმართვაზე;

ბ) დირექტორთან შეთანხმებით განკარგავს ანსამბლის საკუთრებაში არსებულ ქონებასა და უზრუნველყოფს ფულადი სახსრების მიზნობრივ და სწორ ხარჯვას;

გ) მინდობილობის გარეშე წარმოადგენს ანსამბლს ყველა ინსტანციის სასამართლოში როგორც საქართველოში, ისე მის ფარგლებს გარეთ;

დ) დირექტორის წარდგინებით ამტკიცებს ანსამბლის სტრუქტურასა და სტრუქტურული ერთეულების დებულებებს;

ე) საქართველოს ორგანული კანონის „საქართველოს შრომის კოდექსი“ შესაბამისად წარმართავს ანსამბლის შრომით ურთიერთობებს; დებს შრომით ხელშეკრულებებს ანსამბლის შემოქმედებით პერსონალთან;

ვ) დირექტორთან შეთანხმებით დებს შრომით ხელშეკრულებებს ანსამბლის ადმინისტრაციულ-ტექნიკურ და დამხმარე პერსონალთან;

ზ) დირექტორთან შეთანხმებით ამტკიცებს ანსამბლის შინაგანაწესს;

თ) საქართველოს კულტურის სამინისტროს (შემდგომ – სამინისტრო) თანხმობით ამტკიცებს ანსამბლის ბიუჯეტს, საშტატო ნუსხასა და სახელფასო ფონდს;

ი) კანონმდებლობით დადგენილი წესით, უფლებამოსილია თანამშრომლების მიმართ გამოიყენოს წახალისებისა და დისციპლინური პასუხისმგებლობის ზომები;

კ) უზრუნველყოფს ანსამბლის მაღალმხატვრულ შემოქმედებით დონეს;

ლ) ადგენს ანსამბლის რეპერტუარს და განსაზღვრავს სარეპერტუარო პოლიტიკას;

მ) ანსამბლის სამხატვრო ხელმძღვანელი უფლებამოსილია მოახდინოს მის კომპეტენციას მიკუთვნებული ცალკეული უფლებამოსილებების დელეგირება ანსამბლის დირექტორზე (უფლებამოსილების დელეგირება სამხატვრო ხელმძღვანელს არ ათავისუფლებს ანსამბლის საერთო საქმიანობაზე პასუხისმგებლობისაგან);

ნ) კომპეტენციის ფარგლებში გამოსცემს ინდივიდუალურ სამართლებრივ აქტებს;

ო) ახორციელებს კანონმდებლობითა და სხვა სამართლებრივი აქტებით განსაზღვრულ უფლებამოსილებებს.“;

გ) მე-7 პუნქტი ჩამოყალიბდეს შემდეგი რედაქციით:

„7. ანსამბლის დირექტორი:

ა) სამხატვრო ხელმძღვანელთან შეთანხმებით წარმართავს ანსამბლის ადმინისტრაციულ-ორგანიზაციულ და ფინანსურ საქმიანობას;

ბ) სამხატვრო ხელმძღვანელს წარუდგენს წინადადებებს ადმინისტრაციულ-ტექნიკური და დამხმარე პერსონალის მოწვევისა და გათავისუფლების შესახებ;

გ) სამხატვრო ხელმძღვანელთან შეთანხმებით დებს გარიგებებს, დადგენილი წესით ხსნის ანგარიშებს საბანკო დაწესებულებებში;

დ) კომპეტენციის ფარგლებში, აწარმოებს მოლაპარაკებებს, ამყარებს ურთიერთობებს იურიდიულ და ფიზიკურ პირებთან;

ე) ახორციელებს კანონმდებლობითა და სხვა სამართლებრივი აქტებით განსაზღვრულ უფლებამოსილებებს.“.