,,ადიგენის მუნიციპალიტეტის ტერიტორიაზე რეგისტრირებული, მუდმივად მცხოვრები მოსახლეობის ადგილობრივი ბიუჯეტიდან დახმარების სოციალური პროგრამის დამტკიცების შესახებ“ ადიგენის მუნიციპალიტეტის საკრებულოს 2014 წლის 2 სექტემბრის №46 დადგენილებაში ცვლილების შეტანის თაობაზე

ა) დადგენილებით დამტკიცებული დანართი №1-ის  მე-2 მუხლის პირველი პუნქტის „ბ“ ქვეპუნქტი ჩამოყალიბდეს შემდეგი რედაქციით:

„ბ) ოჯახს, რომელსაც სტიქიური მოვლენების შედეგად (ხანძარი, მიწისძვრა, ღვარცოფი, წყალდიდობა და სხვა სტიქიური მოვლენები) დაუზიანდა საცხოვრებელი სახლი და არ გააჩნია მისი შეკეთების სახსრები;“;

ბ) დადგენილებით დამტკიცებული დანართი №1-ის  VI თავის სათაური ჩამოყალიბდეს შემდეგი რედაქციით:

„VI თავი

საქართველოს ტერიტორიული მთლიანობისთვის ომებში (სამაჩაბლო, აფხაზეთი) დაღუპული  მებრძოლის ოჯახის დახმარება.“;

გ) დადგენილებით დამტკიცებული დანართი №1-ის  მე-15 მუხლი ჩამოყალიბდეს შემდეგი რედაქციით:

„მუხლი 15. დახმარების  სახე და ოდენობა

საქართველოს ტერიტორიული მთლიანობისთვის ომებში (სამაჩაბლო, აფხაზეთი) დაღუპული მებრძოლების ოჯახებს საანგარიშო წლის პერიოდში ადგილობრივი ბიუჯეტიდან დახმარება გაეწევათ ერთჯერადად – აღდგომის დღესასწაულზე (გარდამავალი თარიღი) – 400 (ოთხასი) ლარის ოდენობით.“;

დ) დადგენილებით დამტკიცებული დანართი №1-ის  VII თავის სათაური ჩამოყალიბდეს შემდეგი რედაქციით:

„თავი VII

გარდაცვლილ ომის ვეტერანთა ოჯახის სარიტუალო მომსახურება.“;

ე) დადგენილებით დამტკიცებული დანართი №1-ის  მე-18 მუხლი ჩამოყალიბდეს შემდეგი რედაქციით:

„მუხლი 18. დახმარების  სახე და ოდენობა

გარდაცვლილ, ომის ვეტერანთა ოჯახს სარიტუალო მომსახურებისათვის ადგილობრივი ბიუჯეტიდან დახმარება დაკრძალვის ხარჯების  სახით  გაეწევა  ერთჯერადად – 250  (ორას ორმოცდაათი) ლარის ოდენობით.“.