„სსიპ – ანზორ ერქომაიშვილის სახელობის საქართველოს ხალხური სიმღერის ანსამბლ „მართვეს“ დებულების დამტკიცების შესახებ“ საქართველოს კულტურის, სპორტისა და ახალგაზრდობის მინისტრის 2022 წლის 11 მაისის №05/10 ბრძანებაში ცვლილების შეტანის თაობაზე

1. მე-2 მუხლის მე-3 პუნქტის „ვ“ ქვეპუნქტი ჩამოყალიბდეს შემდეგი რედაქციით:

„ვ) კანონმდებლობით დადგენილი წესით, მხოლოდ უნაღდო ანგარიშსწორების პრინციპის განუხრელად დაცვით, განსაზღვროს ბილეთების, სხვა პროდუქციისა და კულტურული მომსახურების რეალიზაციის წესი და დაადგინოს მათი ღირებულება;“.

2. მე-3 მუხლის:

ა) მე-2 პუნქტი ჩამოყალიბდეს შემდეგი რედაქციით:

„2. ანსამბლს ხელმძღვანელობს დირექტორი.“;

ბ) მე-3 პუნქტი ჩამოყალიბდეს შემდეგი რედაქციით:

„3. ანსამბლის დირექტორს თანამდებობაზე ნიშნავს და ათავისუფლებს საქართველოს კულტურის მინისტრი (შემდგომ – მინისტრი).“;

გ) მე-4 პუნქტი ჩამოყალიბდეს შემდეგი რედაქციით:

„4. სამხატვრო ხელმძღვანელს მინისტრთან შეთანხმებით თანამდებობაზე ნიშნავს და ათავისუფლებს ანსამბლის დირექტორი.“;

დ) მე-5 პუნქტი ჩამოყალიბდეს შემდეგი რედაქციით:

„5. ანსამბლის დირექტორი:

ა) ახორციელებს ანსამბლის შემოქმედებით ხელმძღვანელობას, მასვე ეკისრება ანსამბლის წარმომადგენლობა და პერსონალურად აგებს პასუხს მისი საქმიანობის სწორად წარმართვაზე;

ბ) პასუხისმგებელია ანსამბლის საკუთრებაში არსებულ ქონებაზე და ფულადი სახსრების მიზნობრივად და სწორად ხარჯვაზე;

გ) კომპეტენციის ფარგლებში გამოსცემს ინდივიდუალურ-სამართლებრივ აქტებს;

დ) მინდობილობის გარეშე წარმოადგენს ანსამბლს ყველა ინსტანციაში როგორც საქართველოში, ისე მის ფარგლებს გარეთ;

ე) ამტკიცებს ანსამბლის სტრუქტურასა და შინაგანაწესს;

ვ) საქართველოს ორგანული კანონის „შრომის კოდექსი“ შესაბამისად წარმართავს ანსამბლის შრომით ურთიერთობებს; დებს შრომით ხელშეკრულებებს ანსამბლის შემოქმედებით და ადმინისტრაციულ-ტექნიკურ პერსონალთან;

ზ) საქართველოს კულტურის სამინისტროს (შემდგომ – სამინისტრო) თანხმობით, ამტკიცებს ანსამბლის ბიუჯეტს, საშტატო ნუსხასა და სახელფასო ფონდს;

თ) უზრუნველყოფს ანსამბლის მაღალმხატვრულ შემოქმედებით დონეს;

ი) ადგენს ანსამბლის რეპერტუარს და განსაზღვრავს სარეპერტუარო პოლიტიკას;

კ) დებს გარიგებებს, დადგენილი წესით ხსნის ანგარიშებს საბანკო დაწესებულებებში;

ლ) აწარმოებს მოლაპარაკებებს, ამყარებს ურთიერთობებს იურიდიულ და ფიზიკურ პირებთან;

მ) უფლებამოსილია მოახდინოს მის კომპეტენციას მიკუთვნებული ცალკეული ფუნქციების დელეგირება, რაც მას არ ათავისუფლებს ანსამბლის საერთო საქმიანობაზე პასუხისმგებლობისაგან;

ნ) ახორციელებს კანონმდებლობით ნებადართულ სხვა საქმიანობას.“;

ე) მე-6 პუნქტი ჩამოყალიბდეს შემდეგი რედაქციით:

„6. სამხატვრო ხელმძღვანელი:

ა) ხელს უწყობს ანსამბლის დირექტორის საქმიანობას შემოქმედებითი მიმართულებით;

ბ) მონაწილეობს ანსამბლის რეპერტუარის შედგენასა და სარეპერტუარო პოლიტიკის განსაზღვრაში;

გ) ანსამბლის დირექტორს წარუდგენს წინადადებებს/რეკომენდაციებს ანსამბლის მაღალმხატვრული შემოქმედებითი დონის უზრუნველყოფის მიზნით;

დ) ანსამბლის დირექტორთან შეთანხმებით ახორციელებს კანონმდებლობით ნებადართულ სხვა საქმიანობას.“;

ვ) მე-7 პუნქტი ჩამოყალიბდეს შემდეგი რედაქციით:

„7. ანსამბლის დირექტორის არყოფნის შემთხვევაში, მის მოვალეობას ასრულებს მინისტრის ინდივიდუალური ადმინისტრაციულ-სამართლებრივი აქტის საფუძველზე განსაზღვრული პირი.“.

3. მე-4 მუხლის მე-2 და მე-3 პუნქტები ჩამოყალიბდეს შემდეგი რედაქციით:

„2. ანსამბლის სტრუქტურულ ერთეულს ხელმძღვანელობს უფროსი, რომელსაც თანამდებობაზე ნიშნავს და თანამდებობიდან ათავისუფლებს ანსამბლის დირექტორი.

3. ანსამბლის სტრუქტურული ერთეულის უფლებამოსილებებსა და საქმიანობის წესს განსაზღვრავს ანსამბლის დირექტორი.“.