“საქართველოს საგარეო საქმეთა სამინისტროს საკონსულო დეპარტამენტის დებულების დამტკიცების თაობაზე" საქართველოს საგარეო საქმეთა მინისტრის 2006 წლის 31 იანვრის №44 ბრძანებაში ცვლილების შეტანის შესახებ"

სახელმწიფო სარეგისტრაციო კოდი 480.010.000.22.030.008.543

საქართველოს საგარეო საქმეთა მინისტრის

ბრძანება №152

2006 წლის 27 აპრილი

ქ. თბილისი

,,საქართველოს საგარეო საქმეთა სამინისტროს საკონსულო დეპარტამენტის დებულების დამტკიცების თაობაზე“ საქართველოს საგარეო საქმეთა მინისტრის 2006 წლის 31 იანვრის №44 ბრძანებაში ცვლილების შეტანის შესახებ

,,საქართველოს საგარეო საქმეთა სამინისტროს დებულების დამტკიცების შესახებ“ საქართველოს მთავრობის 2005 წლის 16 ნოემბრის №206 დადგენილებით დამტკიცებული დებულების მე-5 მუხლის პირველი პუნქტის ,,დ“ ქვეპუნქტის საფუძველზე, ვბრძანებ:

1. ,,საქართველოს საგარეო საქმეთა სამინისტროს საკონსულო დეპრტამენტის დებულების დამტკიცების თაობაზე“ საქართველოს საგარეო საქმეთა მინისტრის 2006 წლის 31 იანვრის №44 ბრძანებით (სსმ III, 08.02.2006, №17, მუხ. 203) დამტკიცებულ საქართველოს საგარეო საქმეთა სამინისტროს საკონსულო დეპარტამენტის დებულების მე-5 მუხლი ჩამოყალიბდეს შემდეგი რედაქციით:

     „მუხლი 5. დეპარტამენტში შემავალი სტრუქტურული ქვედანაყოფები, მათი ძირითადი ამოცანები და ფუნქციები:

1. საკონსულო დაცვის სამმართველო, რომლის ძირითადი ამოცანები და ფუნქციებია:

ა) საკონსულო სფეროში არსებული საკანონმდებლო და სხვა ნორმატიული აქტების პროექტების შემუშავება, ამ სფეროში საქართველოს კანონმდებლობის საერთა­შორისო სამართლის ნორმებთან შესაბამისობაში მოყვა­ნის მიზნით წინადადებების შემუშავება;

ბ) საზღვარგარეთის სახელმწიფოებთან საქართველოს საკონსულო ურთიერთობების სახელშეკრულებო, სამართლებრივი ბაზის განვითარება და სრულყოფა საზღვარგარეთ საქართველოს ფიზიკური და იურიდიული პირების უფლებებისა და კანონიერი ინტერესების დაცვის მიზნით;

გ) საკონსულო სამართლის სფეროში შემავალ ნორმატიულ აქტებზე და საქმეებზე დასკვნების მომ-ზადება;

დ) საზღვარგარეთ საქართველოს საკონსულო დაწესებულებების გახსნისა და დახურვის სამართლებრივი უზრუნველყოფა;

ე) საპატიო კონსულთა საქმიანობის სამართლებრივი უზრუნველყოფა;

ვ) საკონსულო პატენტის მომზადება;

ზ) საკონსულო ეგზეკვატურის მომზადება;

თ) საზღვარგარეთ საქართველოს საკონსულო დაწესებულებებისათვის სამართლებრივი კონსულტა-ციის გაწევა;

ი) საქართველოსა და უცხო ქვეყნის სასამართლო და სამართალდამცავი ორგანოებისათვის სამართლებრივი დახმარების აღმოჩენის პროცესში მონაწილეობის მიღება;

კ) ექსტრადაციისა და მსჯავრდებულების გადაცემასთან დაკავშირებული საკითხების განხილვა-გადაწყვეტაში მონაწილეობის მიღება;

ლ) საქართველოს საკონ­სულო ურთიერთობათა სრულყოფისათვის განსახორციელებელ ღონისძიებათა შესახებ წინადადებების შემუშავება;

მ) საქართველოს საკონსულო დაწესებულებათა და საქართველოს საპატიო კონსულთა საქმიანობის ანალიზი და აღნიშნულის თაობაზე საინფორმაციო დასკვნის სისტემატური მომზადება;

ნ) საქართველოს საპატიო კონსულის ინსტიტუტის განვითარების შესახებ წინადადებების შემუშავება;

ო) საზღვარგარეთის კანონმდებლობის შესახებ ინ­ფორმაციის მოპოვება;

პ) საქართველოს მოქალაქეთა საკონსულო დაცვის ხარისხის ასამაღლებლად საინ­ფორ­მაციო მასალისა და წინადადებების მომზადება;

ჟ) საკონსულო სფეროში არსებულ საერთაშორისო ხელშეკრულებებთან საქართველოს მიერთების შესახებ წინადადებების მომზადება;

რ) საზღვარგარეთ საქართველოს მოქალაქეთა მიგრა­ციულ გადაადგილებასთან დაკავშირებული საკითხების შესწავლა და კომპეტენციის ფარგლებში მიგრა­ციული პროცესების მართვაში მონაწილეობა;

ს) საზღვარგარეთ საქართველოს საკონსულო დაწესე­ბულებების გახსნასა და დახურვის მიზანშეწონი­ლობის შესახებ საკითხების შესწავლა და რეკო­მენდაციების მომზადება;

ტ) საზღვარგარეთის სახელმწიფოებთან ეკონომიკური ურთიერთკავშირების განვითარება-გაღრმავების სფეროში საქართველოს საკონსულო დაწესებულებათა მუშაობის ანალიზი და მათი სრულყოფისათვის წინადადებათა მომზადება;

უ) საქართველოს მოქალაქეთა და იურიდიულ პირთა ინტერესების დაცვასთან დაკავშირებით წარმოქმნილ პრობლემათა ოპერატიული გადაწყვეტა იმ უცხო ქვეყანაში, სადაც არ არის დაარსებული საქართველოს დიპლომატიური წარმომადგენლობა ან საკონსულო დაწესებულება;

ფ) საზღვარგარეთ გამოსაყენებლად განკუთვნილი საქარ­თველოს ოფიციალური დოკუმენტებისა და უცხო სახელმწიფოს დიპლომატიური წარმომადგენლობებისა და საკონსულო დაწესებულებების მიერ გაცემულ ან დამოწმებულ ოფიციალურ დოკუმენტებზე გამცემი ორგანოს ბეჭდის და/ან პირის ხელმოწერის ნამდვილობის დამოწმება (ლეგალიზაცია);

ქ) საქართველოსა და უცხო ქვეყნის უწყებებიდან დოკუმენტების გამოთხოვა;

ღ) სამოქალაქო აქტების რეგისტრაციისა და სანოტარო საქმიანობაში, აგრეთვე საზღვარგარეთ საქართველოს მოქალაქეთა გარ­დაც­­ვალების შემთხვევაში, საქართველოს დიპლომატიური წარმომადგენლობებისა და საკონსულო დაწესებულებებისათვის დახ­მარე­ბის გაწევა;

ყ) საზღვარგარეთ დაპატიმრებულ, დაკავებულ ან სხვაგ­ვარად თავისუფლებაშეზღუდულ საქართველოს მოქალაქეთა შესახებ საკონსულო დაწესებულებებიდან შემოსული ინფორმაციის საქართველოს სამართალ­დამცავი ორგანოებისათვის მიწოდება;

შ) საქართველოში დაკავებულ უცხოელთა შესახებ ინფორმაციის მიწოდება შესაბამისი ქვეყნის კომპეტენტური ორგანოებისათვის;

ჩ) მოქალაქეთა იმ კერძო წერილებზე მუშაობა, რაც შეეხება საზღვარგარეთ მათი საკონსულო დაცვის უზრუნველყოფას.

2. საპასპორტო და მოქალაქეობის საკითხთა სამმართველო, რომლის ძირითადი ამოცანები და ფუნქციებია:

ა) საქართველოს მოქალაქეობასთან დაკავშირებული საკითხების განხილვა-გადაწყვეტაში მონაწილეობის მიღება, უცხო ქვეყნის მოქალაქისათვის საქართველოს მოქალაქეობის მინიჭების საკითხებზე წარმოდგენილი დოკუმენტაციის შესწავლა და საქართველოს საგარეო საქმეთა სამინისტროს მოქალაქეობის კომისიისათვის წარდგენა;

ბ) სხვა სახელმწიფოში მყოფ საქართველოს მოქალაქეებზე საქართველოს პასპორტის გაცემა, თუ იმ სახელმწიფოში არ არსებობს საქართველოს დიპლომატიური წარმომადგენლობა ან საკონსულო დაწესებულება;

გ) საქართველოს მოქალაქის პასპორტების, დასაბრუნებელი მოწმობისა და სხვა სამგზავ­რო დოკუმენტებისა და პირადობის მოწმობების გაცემაში, პასპორტების მოქმედების ვადის გაგრძელე­ბაში საქართველოს დიპლომატიური წარმომადგენლო­ბებისა და საკონსულო დაწესებულებებისათვის დახმა­რება;

დ) საქართველოს დიპლომატიური და სამსახურებრივი პასპორტების გაცემა, ჩამორთმევა, შენახვა, მათში ცვლილებების შეტანა და გაუქმება.

3. სავიზო ურთიერთობების სამმართველო, რომლის ძირითადი ამოცანები და ფუნქციებია:

ა) კანონმდებლობით დადგენილ შემთხვევებსა და ფარგლებში საქართველოს ვიზების გაცემა, მოქმედების ვადის გაგრძელება და გაუქმება;

ბ) საზღვარგარეთ საქართველოს საკონსულო დაწესე­ბულებათა სავიზო საქმიანობის ზოგადი კოორდინაცია;

გ) საქართველოს სავიზო ეტიკეტების, ანკეტებისა და სხვა სავიზო დოკუმენტაციის ფორმების შემუშავებაში მონაწილეობის მიღება;

დ) საქართველოში უკანონო მიგრანტთა გამოსავლენად შესაბამის უწყებებთან დადგენილი წესით თანამშრომ­ლობა;

ე) საზღვარგარეთ საქართველოს დიპლომატიურ წარმომადგენლობათა და საკონსულო დაწესებულებათა ინფორმირება იმ პირთა შესახებ, რომელთაც ეკრძალე­ბათ საქართველოში შემოსვლა;

ვ) საზღვარგარეთის ქვეყნების სავიზო რეჟიმის ცვლილებების შესახებ ინფორმაციის მოპოვება და ანალიზი;

ზ) დიპლომატიური და სამსახურებრივი პასპორტების მფლობელ პირთა სავიზო უზრუნველყოფა;

თ) შესაბამისი სახელმწიფო დაწესებულების შუამდგომლობის საფუძველზე, საზღვარგარეთ სამსახურებრივ მივლინებით მიმავალი ოფიციალური დელეგაციებისა და საჯარო მოხელეთა სავიზო უზრუნველყოფა;

ი) შესაბამისი სამედიცინო დაწესებულების შუამდგომლობის საფუძველზე, საზღვარგარეთ გადაუდებელი მკურნალობის მიზნით, ასევე მძიმე ავადმყოფი ახლო ნათესავის მოსანახულებლად ან გარდაცვლილი ახლო ნათესავის გადმოსასვენებლად მიმავალ პირთა სავიზო უზრუნველყოფა;

კ) შესაბამისი სახელმწიფო დაწესებულების შუამდგომლობის საფუძველზე, საზღვარგარეთ საერთაშორისო სამეცნიერო კონფერენციებზე, სემინარებზე, კულტურულ და სპორტულ ღონისძიებებზე მიმავალ პირთა სავიზო უზრუნველყოფა;

ლ) საერთაშორისო ხელშეკრულებების საფუძველზე საზღვარგარეთ მიმავალ პირთა სავიზო უზრუნველყოფა;

მ) საქართველოს დიპლომატიური წარმომადგენლობებისა და საკონსულო დაწესებულებების თანამშრომელთა მოწვევით მიმავალ პირთა სავიზო უზრუნველყოფა;

ნ) განსაკუთრებულ შემთხვევებში, საქართველოს საგარეო საქმეთა მინისტრის, ან მინისტრის მოადგილის დავალებით საზღვარგარეთ მიმავალ პირთა სავიზო უზრუნველყოფა.“.

2. ეს ბრძანება ამოქმედდეს 2006 წლის პირველი მაისიდან.

გ. ბეჟუაშვილი